ក្រុងប៉ោយប៉ែត៖ជ្រូកចំនួន៨០ក្បាល លោតឆ័ត្រចេញមកតាមច្រករបៀង ត្រូវគេដឹកជញ្ជូនយកមកលក់បែបអាណាធិបតេយ្យក្នុងខេត្តបន្ទាយមានជ័យ គ្មានការត្រួតពិនិត្យពីមន្ត្រីជំនាញ ហើយតៃកុងឡានដឹកជ្រូកខាងលើនោះ ដើរបង់លុយអោយកុងត្រូលជជុះតាមផ្លូវជាតិលេខ៥ ពីប៉ោយប៉ែត ទៅខេត្តបន្ទាយមានជ័យ យ៉ាងរំភើយបំផុត។
សូមបញ្ជាក់ថា នៅរសៀលថ្ងៃទី៧ ខែតុលា ឆ្នាំ២០១៤នេះ នៅចំណុចកុងត្រូលជជុះជញ្ជីងថ្លឹងកូនដំរី តាមបណ្តោយផ្លូវជាតិលេខ៥ ពីលិចមកកើតគេបានសង្កេតឃើញរថយន្តកូរ៉េចំណុះ៥តោនបានដឹកជ្រូកចំនួន៨០ក្បាល ហើយបានឈប់បង់លុយជូនម្ចាស់កុងត្រូលជជុះ របស់មន្ត្រីជញ្ជីងនៅភូមិកូនដំរី សង្កាត់និមិត្ត ក្រុងប៉ោយប៉ែត ដែលម្ចាស់រថយន្តខាងលើនោះ បានលួចប្រាប់អ្នកកាសែតថា គេបង់លុយជារៀងរាល់លើកជូនទៅម្ចាស់កុងត្រូលជជុះគ្រប់ទីកន្លែង តាមបណ្តោយផ្លូវជាតិលេខ៥ ពីប៉ោយប៉ែតទៅខេត្តបន្ទាយមានជ័យ ជារៀងរាល់ថ្ងៃ ដើម្បីងាយស្រួលកុំអោយមានការចាប់ស្ទាក់ពីមុខពីក្រោយពីមន្ត្រីណាមួយនោះ។
គួរំលឹកដែលថា បទល្មើសនៅតាមព្រំដែនកម្ពុជាថៃ កំពុងមានការកើនឡើងយ៉ាងគំហុកដូចជាការលួចនាំចូលឈើគ្រញូង ជ្រូកក្រហម មាន់ងាប់ មាន់រស់ និងគ្រឿងបរិភោគផ្សេងៗមួយចំនួនធំទៀត ក្រៅពីនោះ ក៏មានការអោយពលករចេញដូចទឹកបាក់ទំនប់ផងដែរ ទង្វើរបែបនេះប្រជាពលរដ្ឋជាច្រើន កំពុងសង្ស័យថា ទំនងជាថ្នាក់លើ ថ្នាក់ខេត្ត ត្រូវរ៉ូវគ្នាជាមួយនិងមន្ត្រីប៉ូលិស មន្ត្រីប៉េអឹម មន្ត្រីទាហ៊ាន នៅតាមព្រំដែនកម្ពុជាថៃទេដឹង ទើបបទល្មើសដឹកជញ្ជូនកើតមានជាហូរហែរទាំងយប់ទាំងថ្ងៃចេញពីប្រទេសថៃយ៉ាងដូច្នោះ ។
ប្រជាពលរដ្ឋនៅតាមព្រំដែនកម្ពុជាថៃបានលើកឡើងថា មានច្រករបៀងមួយកន្លែងដែលមានឈ្មោះបឹងសាគូរ គ្រប់គ្រងដោយមន្ត្រីប៉ូលិសអង្គភាពការពារព្រំដែនគោកលេខ៩១១ បានអនុញ្ញាតិអោយទំនិញគេចពន្ធជាច្រើន រួមទាំងបទល្មើសសេដ្ឋកិច្ចមួយចំនួនទៀត ត្រូវបានគេនាំចេញនិងចូល ដូចទឹកបាក់ទំនប់ហើយក្នុងមួយថ្ងៃៗ ចំណូលនៅចំណុចច្រកនេះមានការកើនឡើងខ្ពស់ជាងច្រកទ្វារអន្តរជាតិប៉ោយប៉ែតទៅទៀត ព្រោះថា មិនមានគយ មិនមានមន្ត្រីកាំកុងត្រូល និងមន្ត្រីជំនាញឈរចាំបង់ពន្ធនោះឡើយ គឺមានតែប៉ូលិសដែលជាម្ចាស់ទឹកម្ចាស់ដីប៉ុណ្ណោះ ដែលរកចំណូលបានយ៉ាងស្រួលដូចបកចេកអ៊ឹចឹង ដោយឡែកម្ចាស់រថយន្តដែលដឹកជ្រូកក្រហមចេញពីថៃនោះ បានប្រាប់អ្នកាសែតថា ជ្រូកមានចំនួន៨០ក្បាលបានដឹកចេញពីតំបន់ច្រកបឹងសាគូរមែន តែគាត់បានបង់ពន្ធផ្លូវជាច្រើនកន្លែង ដើម្បីងាយស្រួលកុំអោយគេចាប់ស្ទាក់បង្កអោយមានការកកស្ទះដំណើររកស៊ីរបស់ពួកគាត់ តៃកុងឡានដ៏ដែលក៏បានបន្តទៀតថា ការដឹកជ្រូកចេញពីព្រំដែនកម្ពុជាថៃនោះ គឺពុំមានការត្រួតពិនិត្យពីមន្ត្រីជំនាញនោះទេ។
លោក ចាប សុផារឹទ្ធ ប្រធានការិយាល័យ ប្រឆាំងងបទល្មើសសេដ្ឋកិច្ចរបស់ស្នងកានគបាលខេត្តបន្ទាយមានជ័យ បានប្រាប់តាមទូរស័ព្ទថា ជ្រូកទាំងនោះពិតមានចំនួន៨០ក្បាលមែនតែគេបានបង់ពន្ធគ្រប់ទៅកន្លែងអស់ហើយ ដូចឆ្នេះខាងលោកពិតជាមានការលំបាកទប់ស្កាត់មែន គឺយើងបានត្រឹមតែដឹងព័ត៏មានជាក់លាក់តែប៉ុណ្ណោះមិនអាចធ្វើអ្វីគេបាននោះទេ៕
មតិយោបល់