ភ្នំពេញ៖ បញ្ហាបាត់រថយន្តកំពុងក្លាយជាប្រធានបទដ៏ក្តៅគគុក បន្ទាប់ពីម៉ូតូ ដោយមានក្រុមចោរដ៏សកម្ម ទាំងនៅរាជធានីភ្នំពេញ និងបណ្តាខេត្តនានា ធ្វើសកម្មភាពលួច ទាំងថ្ងៃទាំងយប់ ធ្វើឲ្យប្រជាពលរដ្ឋដែលជាម្ចាស់រថយន្តចតលើចំណីផ្លូវសាធារណៈ និង មុខផ្ទះក្តី មានការព្រួយបារម្ភយ៉ាងខ្លាំង ជាមួយនឹងទ្រព្យសម្បត្តិដែលខំរកស៊ី និងសន្សំលុយទិញ ទម្រាំនឹងបាននេះ ។
ជាក់ស្តែង រថយន្តឡិចស៊ីស Rx 300 របស់តារាសម្តែង ពេជ្រ អាវីហ្សា ត្រូវបានជនសង្ស័យធ្វើសកម្មភាពលួច កាលពីយប់ថ្ងៃទី ១៣ ខែ តុលា នេះ នៅចំណុចមុខហាងស៊ុប “យីហោស៊ុបគោ ៤០ តាមបណ្តោយផ្លូវ ៦៣” ដែលក្លាយជាប្រធានបទថ្មីទៀត សម្រាប់ម្ចាស់យានយន្តគ្រប់រូបគួរគិតពិចារណា ដោយការយកចិត្តទុកដាក់ លើទ្រព្យសម្បត្តិរបស់ខ្លួន ជាពិសេសរថយន្តតែម្តង ដែលជាគោលដៅដ៏សំខាន់ របស់ចោរនាពេលបច្ចុប្បន្ន ។
ប្រភពមួយបានទម្លាយឲ្យដឹងថា ករណី កើតចោរកម្មលួចរថយន្ត នេះវាកើតឡើង ពីឃ្លាំងរថយន្ត កាប់សាច់មួយចំនួន ដោយរថយន្តដែលត្រូវបានក្រុមចោរលួចនោះ យកទៅចូលឃ្លាំងកាប់សាច់ ដោយតួរថយន្តទាំងអស់ត្រូវបែងចែក ជារបស់បម្រុង ដើម្បីលក់ទៅដល់ឈ្មួញបន្ត ទៀត រួចលក់ទៅកាន់អតិថិជនវិញ ខណៈដែលរថយន្តរបស់អតិថិជន ខូចខាតកន្លែងណាមួយក្នុងចំណោមតួរថយន្ត ត្រូវផ្លាស់ប្តូរភ្លាមៗតែម្តង ។ ករណីនេះ វាកំពុងតែគឃ្លើនដាក់សមត្ថកិច្ចក្នុងតំបន់ ដែលគ្មានសមត្ថភាពបង្ក្រាប ដោយមិនបានបើកភ្នែកមើល ឃ្លាំងកាប់សាច់រថយន្តមួយចំនួន ដែលគ្មានច្បាប់ត្រឹមត្រូវ ។
នេះវាមិនមែនជាលើកទី ១នោះទេ ករណីរថយន្តបាត់ នៅរាជធានីភ្នំពេញ ក៏ប៉ុន្តែ បើបាត់ហើយគឺគ្មានថ្ងៃនឹងវិលវិញឡើយ ហើយក៏គ្មានសមត្ថកិច្ចណាមួយអាចដោះស្រាយជូនបានដែរ៕
មតិយោបល់