ភ្នំពេញ ៖ ក្មេងស្ទាវ៤នាក់ ក្នុងចំណោមជាង១០នាក់ ត្រូវបានកម្លាំងនគរបាលឃាត់ខ្លួនយកមកសួរនាំនៅប៉ុស្តិ៍នគរបាលរដ្ឋបាលចោមចៅ ខណៈនាំគ្នារត់អូសដាវសាំម៉ូរ៉ៃ និងកាំបិត ដែករត់គេចខ្លួន ពេលឃើញកម្លាំងនគរបាលជិះម៉ូតូល្បាតតាមមូលដ្ឋាន ។
ហេតុការណ៍នេះកើតឡើងកាលពីវេលាម៉ោង ១០ និង១០ នាទីយប់ ថ្ងៃទី២០ ខែតុលា ឆ្នាំ២០១៤ នៅចំណុចមុខបន្ទប់ផ្ទះជួល ផ្លូវលំ ស្ថិតក្នុងភូមិព្រៃទា សង្កាត់ចោចៅ ខណ្ឌពោធិ៍សែនជ័យ។
ក្មេងទំនើងទាំង៤នាក់នោះទី១មានឈ្មោះថា សុះ ធឿន អាយុ២០ឆ្នាំ ទី២ឈ្មោះ រឿន កេន អាយុ២៥ឆ្នាំ ទី៣ឈ្មោះ យ៉េន សិដ្ឋ អាយុ២៥ឆ្នាំ ទី៤ឈ្មោះ យឹង គឹមយឿន អាយុ២០ឆ្នាំ អ្នកទាំង៤នាក់នេះមានមុខរបរជាកម្មករធ្វើប៉ៅអីបត់ហើយស្នាក់នៅផ្ទះជួលម្តុំភូមិព្រៃទា និងមាន ស្រុកកំណើតរួមគ្នា នៅភូមិត្នោត ឃុំកំពុងស្វាយ ស្រុកកំពុងស្វាយ ខេត្តកំពង់ធំ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុកម្លាំងនគរបាលមានគ្នា៤នាក់ បានជិះម៉ូតូពីរគ្រឿង ល្បាតតាមមូលដ្ឋាន ខណៈមកដល់ចំណុចកើតហេតុ ក៏ជួបនឹងក្រុមក្មេងស្ទាវជាង១០នាក់ អង្គុយនៅលើគ្រែ មុខបន្ទប់ជួល ។ ពេលនោះក្រុមក្មេងស្ទាវទាំងនោះនាំគ្នាអូសដាវ សាំម៉ូរ៉ៃ និងកាំបិត រួមជាមួយដែកអក្សអិល រត់គេចចេញពីកម្លាំងនគរបាល ធ្វើឱ្យមានការសង្ស័យ ហើយកម្លាំងនគរបាលក៏បានដេញចាប់បានយុវជនចំនួន៤នាក់ ដកហូតដាវសាំម៉ូរ៉ៃ៣ដើម កាំបិតមួយ ដែកអក្សអិល ចំនួន២កំណាត់ យកទៅកាន់ប៉ុស្តិ៍នគរបាលរដ្ឋបាលចោមចៅដើម្បីធ្វើការអប់រំ ។
ក្រោយពីធ្វើការអប់រំ ក្មេងស្ទាវទាំង៤នាក់នេះត្រូវបានកម្លាំងនគរបាលអោយក្មេងទំនើងទាំង៤នាក់ នោះហៅឪពុកម្តាយមកទទួលយកនិងដោះលែងឱ្យត្រឡប់ទៅផ្ទះវិញទាំងយប់៕
មតិយោបល់