ខេត្តប៉ៃលិន ៖ បច្ចុប្បន្ននេះល្បែងកន្ទុយលេខ និងល្បែងស៊ីសងមួយចំនួនទៀតនៅក្នុង ខេត្តប៉ៃលិន កំពុងតែធ្វើឲ្យជះឥទ្ធិពលដ៏អាក្រក់បំផុតដល់គោលនយោបាយភូមិ-ឃុំ មានសុវត្ថិភាពទាំង០៩ចំណុចរបស់ក្រសួងមហាផ្ទៃ ប៉ុន្តែអាជ្ញាធរ និងសមត្ថកិច្ច សង្ងំស្ងៀមមិនធ្វើការបង្ក្រាប ប្រហែលជាខ្លាចបែកឆ្នាំងបាយ។
ប្រភពពីប្រជាពលរដ្ឋបានឲ្យដឹងថា៖ ល្បែងស៊ីសង(បៀ) និង កន្ទុយលេខ ជាច្រើនកន្លែង ត្រូវបានគេនាំគ្នាលេង ថែមទាំងដាក់លក់យ៉ាងអនាធិបតេយ្យ ក្នុងផ្សារសាមគ្គី(ផ្សារប៉ាហ៊ី) ក្នុងក្រុងប៉ៃលិន និងផ្សាព្រំលើ ក្នុងស្រុកសាលាក្រៅ ព្រមទាំងផ្សារប៉ាងរលឹម ដោយគ្មានខ្លាចក្រែងរអែងច្បាប់អ្វីបន្តិចនោះទេ។ ប្រភពបន្តថា៖ មេល្បែងទាំងអស់នេះអាចប្រព្រឹត្តទៅបានក៏ដោយសារមានការឃុបឃិតគ្នាជាមួយអាជ្ញាធរ និងសមត្ថកិច្ច បើកដៃឲ្យដែរ ដែលមានកូនកញ្ច្រែងជាច្រើននាក់ដើរកត់នៅក្នុងផ្សារទាំង៣និងនៅតាមផ្ទះ ប្រមូលលុយរាប់ម៉ឺនដុល្លាក្នុង១ថ្ងៃៗ ដែលទង្វើរទាំងនេះហាក់បីដូចជាផ្គើនចំពោះមុខច្បាប់ ។ ប្រភពបន្តទៀតថា៖មេឆ្នោតដែលទទូលកូនកញ្ជ្រែន មកពីស្រុកសាលាក្រៅ និងភូមិឃុំមួយចំនួនក្នុងខេត្ត កំពុងធ្វើសកម្មភាពលក់ ឈ្មោះ មេ៤៣ ភេទស្រី រស់នៅភូមិអូរតាពុកក្រោម សង្កាត់ទូលល្វា ក្រុងប៉ៃលិន និងឈ្មោះ ភេទស្រី រស់នៅភូមិអូរតាពុកលើ សង្កាត់ប៉ៃលិនក្នុងប៉ៃលិន ប្រហែលជាលោកអធិការ និងលោកស្នងការ បានសើមមាត់សើមកខ្លះ ហើយមើលទៅបានជាសង្ងំស្ងៀមយ៉ាងដូច្នេះ។
ពាក់ព័ន្ធទៅនឹងបញ្ហានេះ អ្នកឆ្លើយឆ្លងព័ត៌មានទូរស័ព្ទទៅលោក លឹម វាសនា អធិការក្រុងប៉ៃលិន បានឱ្យដឹងថា៖ ករណីមេកន្ទុយលេខឆ្នោត កំពុងតែបើកលេងក្នុងនិងក្រៅផ្សារសាមគ្គី ខាងសមត្ថកិច្ចនៃអធិការក្រុង តែងតែចុះទៅស៊ើបអង្កេត ដើម្បីចាប់យកមកអប់រំ លុះពេលពួកគេក្រឡេកឃើញសមត្ថកិច្ចទៅដល់ក្បែរពួកគេ រត់ចែកជើងគ្នាអស់រលីង លុះពេលស្ងាត់ៗពួកគេបន្តសកម្មភាពល្បែងទាំងនេះទៅទៀត ។ ហើយបើសួរអំពីមេឆ្នោតធំៗ មានប៉ុន្មានកន្លែងនៅក្នុងក្រុងប៉ៃលិន ខាងលោកអត់បានដឹងរឿងនេះទេ ហើយខាងលោកក៏អត់បានពាក់ព័ន្ធទៅនឹងអ្នកញៀនល្បែងទាំងនេះដែរ ខាងលោកក៏ រង់ចាំតែទទួលបញ្ជាពីថ្នាក់លើដើម្បីចុះបង្ក្រាបប៉ុណ្ណោះ ។
ចំណែកលោក ជា ចាន់ឌិន ស្នងការនគរបាលខេត្តប៉ៃលិន បានមានប្រសាសន៏តាមទូរស័ព្ទថា៖ ចំពោះបញ្ហានេះលោកធ្វើការបង្គ្រាបដែរ ប៉ុន្តែនៅពេលចុះម្តងៗគឺមិនដែលជូបប្រទះជាក់ស្តែងនោះទេ ៕
មតិយោបល់