ព័ត៌មានការស្លាប់របស់អ្នករចនាម៉ូដ Oscar de la Renta បានធ្វើឲ្យឧស្សាហកម្មកម្សាន្តលើពិភពលោកភ្ញាក់ផ្អើល ជាខ្លាំង ។
ទំព័រព័ត៌មាន Variety បានរាយការណ៍ឲ្យដឹងថា អ្នករចនាម៉ូតជើងចាស់ Oscar de la Renta បានស្លាប់នៅអាយុ ៨២ ឆ្នាំ ដោយសារជំងឺមហារីក ។ គាត់ជាអ្នករចនាម៉ូតរ៉ូបដ៏ស្រស់ឆើយឆាយជាច្រើន សម្រាប់តារាល្បីជាច្រើនជំនាន់ បង្ហាញខ្លួននៅលើកម្រាលព្រំក្រហម។
នៅដើមឆ្នាំ ១៩៦០ លោក Oscar de la Renta កូនកាត់ពីរសាសន៍សាធារណៈរដ្ឋដូមីនីខេននិងអាមេរិក បានក្លាយជាអ្នករចនាម៉ូដដ៏ល្បាញល្បី សម្រាប់អតីត ស្ត្រីទី ១របស់អាមេរិក Jackie Kennedy និងជាស្ថាបនិកម៉ូដផ្ទាល់ ក្នុងទីក្រុង New York ។
តារាសម្តែងជាច្រើន ដែលបានស្លៀករ៉ូបច្នៃម៉ូដដោលោកផ្ទាល់ បង្ហាញខ្លួននៅលើកម្រាលព្រំក្រហម រួមមាន Audrey Hepburn, Cameron Diaz, Nicole Kidman, Oprah Winfrey, Kristen Stewart, Penelope Cruz និង Jessica Chastain ។ ថ្មីៗនេះដែរ លោកក៏បានរចនាម៉ូដរ៉ូបអាពាហ៍ពិពាហ៍ឲ្យប្រពន្ធ George Clooney នាង Clooney Amal ផងដែរ ។
កើតក្នុងគ្រួសារមួយ នៅរដ្ឋ Dominican លោក de la Renta បានទៅដល់ប្រទេសអេស្ប៉ាញ ដើម្បីសិក្សា គូរគំនូរ ដោយរួមសហការជាមួយនឹង Cristobal Balenciaga មុននឹងទៅធ្វើការនៅប៉ារីស ឲ្យ Lanvin និង Balmain ។ ក្រោយមកលោកបានផ្លាស់ទៅធ្វើការនៅ ជាមួយនឹងដៃគូ Elizabeth Arden ។
ការស្លាប់នេះដែរ តារាចម្រៀងបែបស្រុកស្រែនាង Taylor Swift ក៏បានចែករំលែក លើ Instagram របស់នាងផងដែរ ដោយសរសេរថា “អ្នករចនាម៉ូដដែលខ្ញុំពេញចិត្ត និងស្រលាញ់ បានស្លាប់ទៅហើយ ” ៕
មតិយោបល់