សៀមរាប៖ ការបញ្ចប់អំពើហឹង្សាលើស្ត្រី និង ក្មេងស្រី តាមរយៈនៃការតាក់តែងច្បាប់ និង ការផ្តល់ធនធាន ព្រមជាមួយនឹងការធ្វើគោលនយោបាយ ដើម្បីលុបបំបាត់លក្ខ័ណ្ឌទាំងឡាយ ដែលនាំឲ្យមានភាពងាយរងគ្រោះដល់ស្ត្រីនិងក្មេងស្រី វាគឺជាតួនាទីដ៏សំខាន់ និង នាំមុខគេរបស់សមាជិកសភា លើការលើកកម្ពស់សុខភាព សិទ្ធិស្ត្រី និងការអភិវឌ្ឍ ។
ជាមួយនឹងកិច្ចការទាំងនេះ រដ្ឋសភានៃព្រះរាជាណាចក្រកម្ពុជា បានធ្វើជាម្ចាស់ផ្ទះ រៀបចំកិច្ចប្រជុំសមាជិកសភាតំបន់លើកទី៣ ស្តីពីការលុបបំបាត់អំពើហឹង្សាប្រឆាំងស្ត្រីនិងក្មេងស្រី រយៈពេល២ថ្ងៃនៅលើទឹកដីប្រវត្តិសាស្ត្រសៀមរាប ( ថ្ងៃទី២៤ និង ថ្ងៃទី២៥ ខែតុលាឆ្នាំ២០១៤ ) ក្រោមការចូលរួមពីសំណាក់សមាជិកសភា មកពីបណ្តាប្រទេសចំនួន១៩ ក្នុងតំបន់អាស៊ីអាគ្នេយ៍ និង ប៉ាស៊ីហ្វិក និងមានបន្តរៀបចំកិច្ចប្រជុំ សម្រាប់ថ្ងៃទី២៦ ខែតុលានេះផងដែរ របស់គណកម្មាធិការសមាជិកសភាបុរសថ្នាក់តំបន់ លើប្រធានបទតែមួយនេះ គឺការលុបបំបាត់អំពើហឹង្សាលើស្ត្រី និង ក្មេងស្រី ។
ឯកឧត្តមបណ្ឌិត ប៉ែន បញ្ញា ប្រធានគណកម្មាធិការសមាជិកសភាបុរស ប្រឆាំងអំពើហឹង្សាលើស្ត្រីនិងក្មេងស្រី បានលើកឡើងថា៖ អំពើហឹង្សាលើស្ត្រី និងក្មេងស្រី វាមានភាពស៊ាំញាំ និង ងាយរីករាលដាល ។ ឯកឧត្តម បានបញ្ជាក់ថា ការជួញដូរមនុស្ស ការរៀបអាពាហ៍ពិពាហ៍នៅក្នុងវ័យខ្ចីពេក គឺនៅក្នុងវ័យអនីតិជននៅឡើយ និង ការដែលមានកង្វះខាតគោលនយោបាយសិទ្ធិការពារសុខភាពបន្តពូជ វាគឺជាស្ថានភាព នៃការលេចធ្លាយឲ្យមានអំពើហឹង្សាលើស្ត្រី និង ក្មេងស្រី ។ ឯកឧត្តមបណ្ឌិត ក៏បានបញ្ជាក់បន្ថែមដែរថា អំពើហឹង្សាលើស្ត្រីនិងក្មេងស្រី វាមិនមែនត្រឹមតែជាបញ្ហារបស់ស្ត្រីប៉ុណ្ណោះទេ ដូចនេះហើយ ទើបសមាជិកសភាបុរស មានជំហរដ៏ជាក់លាក់មួយ ក្នុងការគៀងគរ តស៊ូមតិ និងមានការគាំទ្រដល់សិទ្ធិរបស់ស្ត្រី តាមរយៈនៃការធ្វើគោលនយោបាយ ។
កិច្ចប្រជុំរបស់សមាជិកសភាតំបន់ ស្តីពីការលុបបំបាត់អំពើហឹង្សាលើស្ត្រី និងក្មេងស្រីលើកទី៣នេះ គឺជាកិច្ចខិតខំប្រឹងប្រែងរួមគ្នា រវាងវេទិកា សភាអាស៊ី ដើម្បីប្រជាជននិងការអភិវឌ្ឍ ( AFPPD ) រដ្ឋាភិបាលអូស្ត្រាលី និង មូលនិធិអង្គការសហប្រជាជាតិដើម្បីប្រជាជន ( UNFPA ) និងមានកិច្ចសហការគាំទ្រពីសមាគមសមាជិកសភាកម្ពុជា ដើម្បីប្រជារាស្ត្រនិងការអភិវឌ្ឍ ( CAPPD ) ។
នៅក្នុងសន្និសីទសារព័ត៌មានក្រោយកិច្ចប្រជុំនេះ បានរៀបចំឡើងនាយប់ថ្ងៃទី២៥ ខែតុលា ឆ្នាំ២០១៤ ក្រោមវត្តមានរបស់លោក ឈិត គឹមយាត អនុប្រធានគណកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និង ព័ត៌មាននៃព្រឹទ្ធសភាជាតិកម្ពុជា និងមានការចូលរួមផងដែរ AFPPD , UNFPA , សមាជិកាសភាកម្ពុជា អូស្ត្រាលី និង នេប៉ាល់ ។
ក្នុងសន្និសីទសារព័ត៌មាននេះ បានបង្ហាញឲ្យដឹងថា ៖ លទ្ធផលនៃកិច្ចប្រជុំ គឺទទួលបានផ្លែផ្កាដ៏ល្អប្រសើរ ជាមួយនេះ កិច្ចប្រជុំបានចេញនូវសេចក្តីថ្លែងការរួមមួយ មានចំនួន១៧ចំណុច ឆ្ពោះទៅរកការរៀបចំផែនការកម្មវិធី បង្កើនសកម្មភាពរបស់សមាជិកសភា ជាមួយនឹងការប្តេជ្ញាចិត្តរួមគ្នា ខិតខំប្រឹងប្រែងជម្រុញ ការតាក់តែង-ការអនុវត្តច្បាប់ ការលើកកម្ពស់ការការពារសិទ្ធិរបស់ស្ត្រី ធានាឲ្យមានសមភាពយេនឌ័រ ដើម្បីបញ្ចប់អំពើហិង្សាលើស្ត្រី និង ក្មេងស្រី ។ លោកស្រី ឡោក ខេង សមាជិកាសភាកម្ពុជា បានថ្លែងនៅក្នុងសន្និសីទសារព័ត៌មាននោះថា បុរស គឺជាវីរជន ក្នុងបុព្វហេតុ នៃការលុបបំបាត់អំពើហិង្សាលើស្ត្រី និងក្មេងស្រី ។ ដូច្នេះមនុស្សប្រុស គឺត្រូវតែជា បុរសល្អក្នុងសង្គមដើម្បីរួមគ្នាលុបបំបាត់នូវអំពើហិង្សាទោះបីអំពើហិង្សាដែលតែងកើតមានឡើងក្នុងកង្វះសេដ្ឋកិច្ចគ្រួសារក្រីក្រហើយអ្នកមានសេដ្ឋកិច្ចថ្កុំថ្កើនក៏មានកើតអំពើហិង្សានេះផងដែរដូច្នេះបុរសយើងទាំងអស់គ្នាដែលជាដៃគូនាំគ្នាចូលរួមធ្វើការផ្សព្វផ្សាយទៅតាមមូលដ្ឋានរបស់ខ្លួនសំខាន់តាមរយៈបណ្តាញសារព័ត៌មាននេះតែម្តង ៕
មតិយោបល់