​ក្រុមហ៊ុន​ផលិតកម្ម​កូរ៉េខាងត្បូង SM Entertainment បាន​ច្រានចោល​ព័ត៌មាន​ថា ក្រុមហ៊ុន​លក់ទំនិញ​អន​ឡាញ​យក្ស​ចិន Alibaba ចង់​ទិញ​ភាគហ៊ុន​។​
​សារព័ត៌មាន Reuters បាន​ចុះផ្សាយ​ថា ក្រុមហ៊ុន SM Entertainment នៅ​ថ្ងៃ​អង្គារ​ទី​២៥​ខែវិច្ឆិកា បាន​ច្រានចោល​ព័ត៌មាន​ថា Alibaba កំពុង​ពិចារណា​ចង់​ទិញ​ភាកហ៊ុន​របស់​ខ្លួន​។ ការច្រានចោល​នេះ ត្រូវបាន​ធ្វើឡើង​ក្រោយពេល សារព័ត៌មាន​ក្នុងស្រុក Korea Economic Daily បាន​ចុះផ្សាយ​ថា ក្រុមហ៊ុន​ទាំង​ពីរ​កំពុង​តែ​ពិភាក្សា​រឿង​ទិញ​-​លក់​ភាគហ៊ុន​ក្នុង​ទ្រង់ទ្រាយ​ធំ​។​
​នៅក្នុង​សេចក្ដី​ថ្លែង​ការ​របស់ SM Entertainment បានបញ្ជាក់​ថា “​វា​ជា​រឿង​មិន​ពិត​” ហើយ​ក្រុមហ៊ុន​មិន​បាន​ពិភាក្សា​អ្វី​នោះ​ទេ ជាពិសេស​គឺ​មិន​ចង់​មាន​ដៃគូរ​សហការ​ច្រើន ជាពិសេស​គឺ​ក្រុមហ៊ុន​ចិន​តែម្ដង​។​
​គួរ​បញ្ជាក់​ផង​ដែរ​ថា SM Entertainment ជា​ក្រុមហ៊ុន​ផលិតកម្ម​មួយ​ដែល​គ្រប់គ្រង​ក្រុម​តារាចម្រៀង​ជាច្រើន​ដូចជា Girls’ Generation, Super Junior និង EXO ដែល​បច្ចុប្បន្ន​ក្រុម​ទាំងនេះ​កំពុង​តែ​ពេញនិយម​នៅ​ក្នុង​ប្រទេស​ចិន និង​ជប៉ុន​៕​