កំពង់ឆ្នាំង៖លោកមេឃុំអណ្តូងស្នាយនិងលោកអភិបាលស្រុករលាប្អៀរបានប្រតិកម្មនៅព្រឹកថ្ងៃទី០១ ខែធ្នូឆ្នាំ២០១៤នេះថាៈរណ្តៅដាក់សំរាមសាធារណៈមួយកន្លែងនៅចំណុចខ្សាច់ស ក្នុងឃុំអណ្តូងស្នាយ ត្រូវបានគេឈូសលុបយកដីធ្វើជាកម្មសិទ្ធ ធ្វើអោយក្រុមអនាម័យដឹកសំរាមពីទីផ្សាររបស់ស្រុក គ្មានអន្លុងសំរាប់ចោលសំរាម ជាហេតុធ្វើអោយពួកគេយកសំរាមទៅចាក់ចោលពេញព្រៃក្បែរអន្លុងសំរាមចាស់។
លោក សោម វឺន អភិបាលស្រុករលាប្អៀរបាននិយាយអោយដឹងថា៖ នៅព្រឹកថ្ងៃទី០១ ខែធ្នូ ឆ្នាំ២០១៤នេះ លោក សុខ យ៉ាន មេឃុំអណ្តូងស្នាយបានមកត្អូញត្អែរររាយការណ៍អោយដឹងថា៖អន្លុងធ្លាប់ចោលសំរាមជាសាធារណៈជាយូរឆ្នាំមកហើយនៅចំណុចខ្សាច់សរបស់ឃុំអណ្តូងស្នាយ ត្រូវបានលោក យង់ សៅវុឌ្ឍី អនុប្រធានមន្ទីរសង្គមកិច្ចអតីតៈយុទ្ធជននិងយុវនិតិសប្បទាខេត្តកំពង់ឆ្នាំងបានអៈអាងថាជាដីកម្មសិទ្ធរបស់លោក ហើយកាលពី៣ថ្ងៃមុននេះ លោកបានជួលគ្រឿងចក្រមកឈួសឆាយលុប
រណ្តៅសំរាមនោះអស់ទៅហើយ ដែលធ្វើអោយក្រុមអនាម័យដឹកសំរាមពីទីផ្សារក្នុងស្រុក គ្មានកន្លែងចោលសំរាមឡើយ ធ្វើអោយពួកគេដឹកសំរាមយកទៅចាក់ចោលពាសវាលពាសកាលពេញព្រៃ។ករណីខាងលើនេះលោកមេឃុំអណ្តូងស្នាយស្នើសុំ អាជ្ញាធរស្រុកជួយដោះស្រាយអោយមានទីកន្លែងចោលសំ រាមវិញផង បើមិនដូច្នោះទេពិតជាគ្មានកន្លែងចោលសំរាមឡើយ។
ទាក់ទងនិងករណីខាងលើនេះអ្នកយកព័ត៌មានយើងបានទទួលព័ត៌មានពីលោក យង់ សៅវុឌ្ឍី តាមទូរស័ព្ទនៅរសៀលថ្ងៃទី០១ ខែធ្នូ ឆ្នាំ២០១៤នេះថា៖ចំណុចដីខ្សាច់ស មានទំហំ៤៥ហិកតា ដែលមានអន្លុងសំរាមនៅក្នុងចំណុចនេះទំហំប្រមាណ២០ម គុណនិង ៣០ម គឺជាកម្មសិទ្ធរបស់ឯកឧត្តម ឡួយ សឹមឈៀង បានកាន់កាប់ជាយូរណាស់មកហើយ។នៅក្នុងឆ្នាំ២០០៨ ឯកឧត្តម ឡូយ សឹមឈៀង បានលក់ផ្ទេរដីទាំងអស់នេះអោយលោករដ្ឋលេខាធិការម្នាក់នៅទីក្រុងភ្នំពេញ និងរូបលោកកាន់កាប់បន្តមក ហើយនៅឆ្នាំ២០១០ ក្រុមការងារវាស់វែងដីធ្លីរបស់មន្ទីរសុរិយោដីខេត្ត ដឹកនាំដោយលោក ចេង ញ៉ាន់ អភិបាលរងខេត្ត បានចុះវាស់វែងធ្វើកំណត់ហេតុស្របច្បាប់រួចហើយ ឯកសារនេះលោកបានរក្សាទុកនៅក្នុងដៃ។ក្នុងករណីប្រតិកម្មរឿងអន្លុងសំរាមខាងលើនេះ លោកនិងសំរួលដោះស្រាយជីករណ្តៅដាក់សំរាមថ្មីមួយកន្លែងទៀតទំហំ៣០ម គុណនិង ៣០ម ដែលនៅក្បែរគ្នា ជួនអាជ្ញាធរឃុំអណ្តូងស្នាយវិញ ហើយនៅល្ងាចថ្ងៃទី០១ ខែធ្នូ ឆ្នាំ២០១៤នេះ លោកបានអោយគ្រឿងចក្រឈូសឆាយព្រៃសំរាប់ជីករណ្តៅសំរាប់ដាក់សំរាមនេះរួចហើយ។
លោក សោម វឺន អភិបាលស្រុករលាប្អៀរបានអោយអ្នកយកព័ត៌មានយើងដឹងនៅល្ងាចថ្ងៃទី០១ ខែធ្នូ ឆ្នាំ២០១៤នេះថា៖ប្រសិនបើលោក យង់ សៅវុឌ្ឍី សប្បទានដី និងជួយជីករណ្តៅដាក់សំរាប់ដាក់សំរាមជូនឃុំអណ្តូងស្នាយវិញមែននោះ ករណីវិវាទរឿងរណ្តៅដាក់សំរាមខាងលើនេះពិតជាត្រូវបញ្ចប់មិនពិបាកដោះស្រាយទៀតឡើយ។ម្យ៉ាងវិញទៀតលោកសំណូមពរ ដល់ លោក យង់សៅ វុឌ្ឍី មេត្តាជួយថតចំលងឯកសារកាន់កាប់ដីធ្លីដែលថាស្របច្បាប់របស់លោកទំហំ៤៥ហិកតានោះ អោយអាជ្ញាធរឃុំ និងស្រុកបានដឹងផង ដើម្បីអោយអាជ្ញាធរមូលដ្ឋាន និងប្រជាពលរដ្ឋបានដឹងឮ ជៀសវាងការប៉ះពាល់គ្នាទៅថ្ងៃក្រោយទៀត៕
មតិយោបល់