កំពង់ស្ពឺ ៖ កម្មករ-ការនីរោងចក្រនូ ខប ដែលមានទីតាំងជាប់ផ្លូវជាតិលេខ៤១ ស្ថិតក្នុងឃុំលំហាច ស្រុកអង្គឈ្នួល ខេត្តកណ្តាល បាននាំគ្នាដើរមកកាន់ផ្លូវជាតិលេខ៤ និងព្យាយាមបិតផ្លូវត្រង់ចំណុចថ្លល់បំបែកជា៤ ផ្សារថ្នល់ទទឹង ឃុំដំណាក់អំពិល ស្រុកអង្គឈ្នួល ព្រំប្រទល់ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីវេលាម៉ោង ៨ និង ៤៥នាទី ព្រឹកថ្ងៃទី០៨ ខែធ្នូ ឆ្នាំ២០១៤នេះ ប៉ុន្តែមិនបានសម្រេចនោះទេ ព្រោះអាជ្ញាមានសមត្ថកិច្ច បានទប់ស្កាត់ទាន់ពេលវេលា ។
ក្រុមអ្នកតវ៉ាបាននិយាយថា ពួកគាត់ជាកម្មករបំរើការងារក្នុង រោងចក្រនូ ខបប្រមាណ ១០០០នាក់ បានផ្ទុះកូដកម្មរយៈពេល ៧ថ្ងៃកន្លងមកហើយ ដើម្បីទាមលក្ខការងារចំនួន ១២ចំណុច ប៉ុន្តែក្នុងពេលចរចាដោះស្រាយគ្នាបានឯកភាព លើចំណុចជាច្រើនសល់តិចតួចប៉ូណ្ណោះ ។ ពួកគាត់បន្តថា កម្មករ-ការនីទាំងអស់ដែលនាំគ្នាកូដកម្មនោះ មានបំណងបានវិលចូលធ្វើការវិញ នៅព្រឹកថ្ងៃច័ន្អដើមសប្តាហ៍ ថ្ងៃទី០៨ ខែធ្នូនេះ ប៉ុន្តែស្រាប់តែទទួលព័ត៌មានថា ថៅកែរោងចក្របញ្ឈប់កម្មករ ទាំងអស់ដែលចូលរួមធ្វើកូដកម្ម និងមិនបើកប្រាក់ខែឲ្យឡើយ ទើបកម្មករនាំគ្នាតវ៉ា ហើយមានគោលបំណងទៅទាមទារដល់ក្រសួងការងារ ប៉ុន្តែត្រូវបានសមត្ថកិច្ចប៉ូលិសស្រុកអង្គឈ្នួល ស្ទាក់ផ្លូវមិនអនុញ្ញាតិទៅភ្នំពេញ ក៍នាំគ្នាដើរពីរោងចក្រមកកាន់ផ្លូវជាតិលេខ៤ ត្រង់ថ្នល់បំបែកផ្សារថ្នល់ទទឹង ក្នុងគោលបំណងបិតផ្លូវជាតិ សុំការអត្តរាគមន៍ទៅថ្នាក់លើជួយដោះស្រាយ ។
ក្រុមកម្មករបានបន្តថា គ្រាន់តែពួកគាត់ឡើងបិតផ្លូវជាតិលេខ៤ភ្លាម ស្រាប់តែកំលាំងប៉ូលិសជាច្រើននាក់មានខែល និងដំបងឫស្សីគ្រប់ដៃចេញមករុញកម្មករ គំរាមវ៉ៃបើករឹងបិតផ្លូនោះ ។ ប្រភពបន្តថា ដោយសារតែការគំរាមបែបនេះ កម្មករបានដកថយវិញ ម្យ៉ាងមានការសម្របសម្រួលគ្នា ដើម្បីរកដោះណោះស្រាយគ្នាបន្តទៀត ។
សមត្ថកិច្ចប៉ូលិសដែលបានចុះមកទប់ស្កាត់ ការព្យាយាមបិទផ្លូវជាតិលេខ៤ពីសំណាក់ក្រុមបាតុករ បាននិយាយថា បើសិនបងប្អូនកម្មករ-ការនីធ្វើកូដកម្មទាមទារលក្ខខណ្ឌការងារជាមួយថៅកែរោងចក្រ សមត្ថកិច្ចមិនហាមឃាត់ទេ ប៉ុន្តែបើបិទផ្លូវជាតិលេខ៤វាខុសច្បាប់ ។ សមត្ថកិច្ចបន្តថា ការតវ៉ារបស់កម្មករ មិនត្រូវបានហាមឃាត់ទេ តែត្រូវធ្វើតាមនិតិវិធី និងគោរពច្បាប់ជាមូលដ្ឋាន ពេលធ្វើកូកម្មសមត្ថកិច្ចគ្រាន់តែចុះទៅដើម្បីរៀបចំសណ្តាប់ធ្នាប់ ការពារសន្តិសុខព្រោះខ្លាចកើតមានអំពើហឹង្សារ ។
ភាគីរោចក្រ នូ ខប បានចេញសេចក្តីជួនដំណឹងមួយ ចុះថ្ងៃទី០៦ ខែធ្ននេះថា ដល់កម្មករ-ការនីទាំងអស់ដែល ត្រូវត្រឡប់ចូលធ្វើការងារវិញ ព្រោះការធ្វើបាតុកម្មរបស់បងប្អូនមានរយៈ០៦ថ្ងៃកន្លងមកហើយ គិតចាប់តាំងពីថ្ងៃទី០១ រហូតដល់ ទី០៦ ខែធ្នូនេះ ។ បើយោងតាមបទបញ្ជាផ្ទៃក្នុងក្រុមហ៊ុន កម្មករមិនព្រមចូលធ្វើការនៅថ្ងៃនេះទេ មានន័យថា បងប្អូនបានបោះបង់ការងារចោល ។ ការជួនដំណឹងរបស់រោចក្របានឱ្យដឹងទៀតថា អាជ្ញធរមានសមត្ថកិច្ច មានតួនាទីហាមឃាត់ជនណាដែលមានបំណងបំផ្លិចបំផ្លាញទ្រព្យសម្បត្តក្រុមហ៊ុន និងរារាំងកម្មករមិនអោយចូលធ្វើការ ជាពិសេសបើធ្វើមានប្រាក់ឈ្នួលមិនធ្វើការគ្មានប្រាក់ឈ្នួល ។
សូមរំលឹងថាកម្មករ-ការរោងចក្រនូ ខប ប្រមាណ១០០០នាក់បានផ្ទុះកូកម្មទាមទារលក្ខខណ្ឌការងារចំនួន ១២ចំណុចសំខាន់ ចាប់ពីថ្ងៃទី០១ រហូតដល់ថ្ងៃទី០៨ ខែធ្នូ មិនទាន់បញ្ចប់នៅឡើយទេ ហើយក្នុងអំឡុងពេលជជែកដោះស្រាយគ្នា ត្រូវរ៉ូវគ្នាជិតអស់ហើយនៅសល់តែ២ចំណុចប៉ុណ្ណោះ ទី១ទាមទារបាយសម្រាប់ថ្ងៃត្រង់មួយពេល ឬប្រាក់២៦ដុល្លា ក្នុងមួយខែ និងទី២សុំកុំកាត់លុយកម្មករការនីក្នុងអំឡុងពេលមានកូដកម្ម ។
លោក មាន សំណាង អធិការស្រុកអង្គឈ្នួលបាននិយាយ ក្នុងវ៉ូងកូដករថា រាល់ចំណុចដែលបានស្នើរសុំ គឺបានឯកភាពគ្នាចប់សព្វគ្រប់ហើយ នៅសល់តែរឿងប្រាក់បាយថ្លៃត្រង់ ២៦ដុល្លាប៉ុណ្ណោះ ហើយរឿងនេះខាងសហជីពសុំចរចាផ្ទាល់ជាមួយថៅហេតុអីបានជានៅមានតវ៉ាបែបនេះទៀត ៕
មតិយោបល់