ភ្នំពេញ ៖ មនុស្សប្រុសស្រី៣នាក់និង វត្ថុតាងមានក្រដាសកត់កន្ទុយលេខ១ ដុំ និងលុយមួយចំនួនត្រូវបាននគរបាលប៉ុស្ដិ៍បឹងត្របែកដែលចុះទៅបង្ក្រាបប្រាប់ថាជាមេកន្ទុយលេខដ៏ធំ ។ ក្នុងការចុះបង្ក្រាបមេកន្ទុយលេខខាងលើនេះបានប្រព្រឹត្ដទៅនៅវេលាម៉ោង៣និង៣០នាទីរសៀល ថ្ងៃទី១៧ ខែធ្នូឆ្នាំ២០១៤ ស្ថិតនៅក្នុងផ្សារលក់ត្រី ហៅផ្សារបឹងត្របែកបា្លហ្សា តាមបណ្ដោយផ្លូវលេខ ១០៥ ក្នុងសង្កាត់បឹងត្របែកខណ្ឌចំការមន ។
ក្នុងប្រតិបត្ដិការចុះបង្ក្រាបទីតាំង ខាងលើនេះ សមត្ថកិច្ចដកហូតបាន វត្ថុតាងមួយចំនួនមានដូចជាលុយជិត ៩០ម៉ឺនរៀល ក្រដាស១ដុំ និងឃាត់ខ្លួន អ្នកកត់និងអ្នកចាក់៣នាក់ផងដែរ ។
ប្រភពព័ត៌មានបានឱ្យដឹងថាអ្នកកត់ កន្ទុយលេខត្រូវបានគេស្គាល់ឈ្មោះ ចែណា ភេទស្រីអាយុ៣៧ឆ្នាំ និងបុរស២នាក់ទៀត មិនត្រូវបានគេស្គាល់អត្ដសញ្ញាណទេដោយពួកគេមិនប្រាប់ ឈ្មោះ ។
គួរបញ្ជាក់ផងដែរថា ក្នុងករណីបង្ក្រាបទីតាំងកត់កន្ទុយលេខខាងលើនេះត្រូវបានមន្ដ្រីនគរបាលប៉ុស្ដិ៍បឹងត្របែកប្រាប់ថាជាទីតាំងចាក់កន្ទុយលេខដ៏ធំមួយទើបកម្លាំងចុះមកបង្ក្រាប ចំពោះ មជ្ឈដ្ឋានជុំវិញដែលបានឃើញក្នុង ហេតុការណ៍នោះបានឱ្យដឹងដែរថាទីតាំងកត់កន្ទុយលេខនេះ គ្រាន់តែជាកូន កញ្ច្រែងតូចមួយប៉ុណ្ណោះគាត់កត់ដើម្បី ចិញ្ចឹមជីវភាពដែលកំពុងខ្វះខាត បែរជាលោកមេប៉ុស្ដិ៍មកចាប់ចំកន្លែងដែល តូចបែបនេះទៅវិញចុះទីតាំងធំៗដែល មាននៅក្នុងសង្កាត់បឹងត្របែកដែរម្ដេចមិនព្រមចុះទៅចាប់ឱ្យអស់ បែរជាមកចាប់ទីតាំងកត់កន្ទុយលេខដ៏តូច នេះទៅវិញ ?
ប្រភពដដែលបានបន្ដទៀតថា សមត្ថកិច្ចទាំងនោះ គាត់ចាប់ទីតាំងណា ដែលគ្មានបង់ប្រាក់ឱ្យពួកគាត់តែប៉ុណ្ណោះ ពួកគាត់មិនហ៊ានចាប់ទីតាំងកត់កន្ទុយលេខឬចាក់បាល់ធំៗនិងបើកចំហទ្វារមិនខ្លាច អាជ្ញាធរនោះទេដោយសារតែទីតាំង ភ្នាល់បាល់ឬកន្ទុយលេខទាំងនោះ បានផ្ដល់លាភសក្ការទៅឱ្យមន្ដ្រីនគរបាល ទាំងនោះដូច្នេះប្រជាពលរដ្ឋសំណូម ពរដល់មន្ដ្រីគ្រប់ជាន់ថ្នាក់ គួរតែមានវិធានការបង្ក្រាបទីតាំងកត់កន្ទុយលេខឬភ្នាល់បាល់ដែលមាននៅក្នុងទឹកដីខណ្ឌចំការមន ដោយកុំគិតថាទីតាំងតូចឬធំ និងទីតាំងខ្លះទៀត ដែលលួចផ្ដល់លាភសក្ការៈជូនមន្ដ្រីទាំងនោះ ៕
ព័ត៌មានជាតិ
មតិយោបល់