នៅក្នុងព្រះរាជប្រកាសរបស់សម្តេចព្រះសង្ឈទាំងពីគណៈនាឱកាសបិទអង្គប្រជុំអនុសំវច្ចរមហាសន្និបាទមន្ត្រីសង្ឈទូទាំងប្រទេសលើកទី២៣ដែលប្រព្រឹត្តិទៅនៅសាលសន្និសិទចតុមុខនាល្ងាចថ្ងៃទី១៨ ខែធ្នូ ឆ្នាំ២០១៤ នេះបានស្នើដល់សុំដល់ស្ថាប័នពាក់ព័ន្ធមានរដ្ឋសភា ព្រឹទ្ធសភា រាជរដ្ឋាភិបាល និងគ្រប់ គណបក្សនយោបាយទាំងអស់សូមមេត្តាកំណត់និតិវិធីសមស្របយ៉ាងណាដើម្បី ឲ្យព្រះសង្ឃ ភិក្ខុ សាមណេរ ព្រះពុទ្ធសាសនាខ្មែរស្ថិតនៅជាអព្យាក្រិតបានបំពេញកាតព្វកិច្ចជាស្រែបុណ្យដ៏ប្រសើរផូរផង់ ថែមទៀត និងទ្រទ្រង់ព្រះពុទ្ធសាសនាដែលជាសាសនារបស់រដ្ឋឲ្យស្ថិតស្ថេរគង់វង់ ជៀសវាងនូវការចូលរួម ធ្វើសកម្មភាពគាំទ្រ ឬប្រឆាំងគណបក្សនយោបាយ និងចូលរួមបោះឆ្នោតដើម្បីគាំទ្រគណបក្សនយោបាយ ដើម្បីជាការលើកកម្ពស់សេចក្តីថ្លៃថ្នូររបស់ព្រះសង្ឃ គង់នៅជាបូជនីយបុគ្គលរបស់ពុទ្ធបរិស័ទទាំងឡាយ ក្នុងព្រះរាជណាចក្រកម្ពុជា និងដល់អ្នកដែលមានសេចក្តីជ្រះថ្លា ។
ក្រៅពីការស្នើសុំខាងលើនេះ ព្រះរាជសង្ឃប្រកាសក៏បានស្នើសុំទៅរាជរដ្ឋាភិបាលតាមរយៈ ក្រសួងធម្មការ នឹងសាសនារៀបចំកម្មវីធីសិក្សារបស់ពុទ្ធិកៈសិក្សាគណៈធម្មយុទ្ធចាប់ពីសាលាធម្មវិន័យ ពុទ្ធិកបឋមសិក្សា មធ្យមសិក្សា ឧត្តមសិក្សា និងក្រោយឧត្តមសិក្សា និងនិតិវិធីនៃការជ្រើសរើស សមណនិស្សិតឲ្យចូលសិក្សាគ្រប់កំរិតនៃឆ្នាំសិក្សាព្រមទាំងឲ្យមានកញ្ចប់ថវិកាសម្រាប់ទ្រទ្រង់ពុទ្ធិកសិក្សា ឲ្យបានសមស្របតាមក្រសួងអប់រំយុវជន និងកីឡាផងដែរ ។
សូមជម្រាប់ថាអង្គប្រជុំអនុសំវច្ចរមហាសន្និបាតមន្ត្រីសង្ឃទូទាំងប្រទេសបានប្រារពឡើងរយៈពេល ២ ថ្ងៃគឺនៅថ្ងៃទី១៧ និង ១៨ ខែធ្នូ ឆ្នាំ២០១៤ ដោយមានការនិមន្ត និងអញ្ជើញពីមន្ត្រីសង្ឃ មន្ត្រីក្រសួង និងមន្ទីធម្មការរាជធានីខេត្តទូទាំងប្រទេស។ អង្គប្រជុំនេះបានប្រកាសបិទនៅល្ងាចថ្ងៃទី១៨ នៅសាល សន្និសិទចតុមុខក្រោមអធិបតីភាពលោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ ទំនងជាមួយរដ្ឋសភា ព្រឹទ្ធសភា និងអធិការកិច្ច ។
នៅក្នុងពិធីប្រកាសបិតលោកជំទាវឧបនាយរដ្ឋមន្ត្រីបានលើកឡើងថា ក្នុងរយៈពេល២ថ្ងៃ នៃអង្គប្រជុំអនុសំវច្ចរមហាសន្និបាតមន្ត្រីសង្ឃទូទាំងប្រទេសឆ្នាំ២០១៤នេះ សម្រេចបាននូវលទ្ធផលដ៏មាន សារៈសំខាន់ និងធំធេងសម្រាប់វិស័យសាសនា ហើយពិតជាបានរូមចំនែកយ៉ាងទាន់ពេលវេលាក្នុងការ ឆ្លើយតបនិងបញ្ហាដែលកំពុងកើតមានមានពេលបច្ចុប្បន្នរបស់ព្រះសង្ឈ និងពុទ្ធសាសនិក ដែលត្រូវរួម គ្នាធ្វើការផ្សព្វផ្សាយបានឲ្យទូលំទូលាយ ដើម្បីទប់ស្កាត់លោភៈ ទោសៈ មោហៈ អំពើអកុសលទាំងឡាយ ដែលនាំទៅដល់ក្តីអន្តរាយទ្រព្យសម្បត្តិ សេចក្តីសុខ ជីវិតមនុស្ស និងសន្តិសុខសណ្តាប់ធ្នាប់សង្គម ។
លោកជំទាវបន្តថារាជរដ្ឋាភិបាលកម្ពុជាបានខិតខំប្រឹងប្រែងក្នុងការអភិវឌ្ឍន៍វិស័យព្រះពុទ្ធសាសនាដើម្បីជាប្រយោជន៍ក្នុងការរួមចំនែកពង្រឹងសាមគ្គីភាព ការលើកកម្ពស់វប្បធម៌ នៃការយោគយល់គ្នា ក្នុងចំណោមពុទ្ធសាសនិកក៏ដូចជាប្រជាជនកម្ពុជាទាំងអស់ទាំងពេលបច្ចុប្បន្ន និងទៅអនាគត់ ។ ជាងនេះ ទៅទៀតដើម្បីរួមគ្នាកសាងកម្ពុជាឲ្យក្លាយទៅជាសង្គមមួយដែលគ្មានអំពើហឹង្សា គ្មានការរំលោភសិទ្ធិ និងសេចក្តីថ្លៃថ្នូររបស់មនុស្ស ចូលរួមធ្វើឲ្យសង្គមកម្ពុជានៅតែរឹងមាំ ប្រជាជនប្រកបដោយចំនេះដឹង ជ្រៅជ្រះ មានសីលធម៌ គុណធម៌ ចរិយាធម៌ សាមគ្គីធម៌ និងជាប្រទេសដែលសំបូររុងរឿង ៕
ព័ត៌មានជាតិ
មតិយោបល់