កំពង់ឆ្នាំង៖ ឯ.ឧ អភិបាលខេត្តកំពង់ឆ្នាំងបានថ្លែងបែបនេះ នៅក្នុងពិធីចែកអំណោយជូនប្រជាពលរដ្ឋក្រីក្រ និងរងគ្រោះដោយគ្រោះធម្មជាតិនានាចំនួន៥០០គ្រួសារ នៅក្នុងស្រុករលាប្អៀរ។ពិ ធីនេះបានធ្វើឡើងនៅក្នុងសាលាស្រុករលាប្អៀរ នាព្រឹកថ្ងៃទី១៨ ខែធ្នូ ឆ្នាំ២០១៤។
នៅក្នុងពិធីចែកអំណោយខាងលើនេះឯ.ឧ ឈួរ ច័ន្ទឌឿន បានថ្លែងអោយដឹងថា៖«កាលពីយប់ម៉ិញ ខ្ញុំបានទទួលទូរស័ព្ទរាយការណ៍ពីប្រជាពលរដ្ឋទាំងកណ្តាលយប់ថា មានការចែកចាយថ្នាំញៀន២កន្លែងនៅក្នុងមូលដ្ឋានមួយ តែពេលពួកគាត់រាយការណ៍ទៅមន្ត្រីនគរបាលប៉ុស្តិៗ បានឆ្លើយថា គេមិនហ៊ានបង្ក្រាបទេព្រោះប៉ះចំគ្នាឯងទុកអោយខាងខេត្តគេធ្វើចុះ។ករណីនេះ ឯ.ឧបានព្រមានថា បើសមត្ថកិច្ចមិនធ្វើ អាជ្ញាធរមិនគិតគូរ តើទុកអោយចៅហ្វាយខេត្តធ្វើឬ? បញ្ហានេះមានតែចាត់ការសមត្ថកិច្ចវិញហើយ ព្រោះថាករណីនេះបើមិនចាត់ការបង្ក្រាបគ្រឿងញៀនទេ មានតែឃុបឃិតគ្នា ដែលអាជ្ញាធរ និងសមត្ថកិច្ចខេត្តត្រូវតែស្រាវជ្រាវរកអោយឃើញ។
ទន្ទឹមនេះដែរ ឯ.ឧ ក៍បានអំពាវនាវដល់ប្រជាពលរដ្ឋ អាជ្ញាធរ សមត្ថកិច្ចគ្រប់មូលដ្ឋាន ត្រូវ តែសហការគ្នារាយការណ៍ និងបង្ក្រាបបទល្មើសគ្រប់រូបភាព ដោយអនុវត្តការពង្រឹងគោលនយោ បាយភូមិឃុំមានសុវត្ថិភាពទាំង៩ចំណុចអោយបានម៉ឺងម៉ាត់ និងចាត់ការអោយបានតាមផ្លូវច្បាប់ ទើបនៅតាមមូលដ្ឋានមានសន្តិសុខ និងសណ្តាប់ល្អប្រសើរ។
នៅក្នុងពិធីចែកអំណោយនេះ លោក ថោង ចំរើន ប្រធានមន្ទីរសង្គមកិច្ច អតីតយុទ្ធជន និង យុវនីតិសម្បទាខេត្តបានរាយការណ៍អោយដឹងថា៖ក្រោយពីទទួលបានព័ត៌មាន និងតាមសំណើ របស់លោកអភិបាលស្រុករលាប្អៀរ អំពីស្ថានភាពរបស់បងប្អូនប្រជាពលរដ្ឋក្រីក្រ បងប្អូនរងគ្រោះដោយគ្រោះធម្មជាតិ និងរងគ្រោះមហន្តរាយជាយថាហេតុផ្សេងៗចំនួន៥០០គ្រួសារនៅតាមមូលដ្ឋាននានាក្នុងស្រុករលាប្អៀរ ដើម្បីសំណើរសុំទៅថ្នាក់លើ និងប្រមុខរាជរដ្ឋាភិបាល។ទើបថ្ងៃនេះឯ.ឧ ឈួរ ច័ន្ទឌឿន អភិបាលខេត្តកំពង់ឆ្នាំងតំណាងអោយប្រមុខរាជរដ្ឋាភិបាល បាននាំយកអំណោយខាងលើនេះរបស់ប្រមុខរាជរដ្ឋាភិបាល តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកំពង់ឆ្នាំង ធ្វើការចែកអំណោយនេះដល់ប្រជាពលរដ្ឋរងគ្រោះទាំង ៥០០គ្រួសារ ក្នុង១គ្រួសារៗទទួលបានអង្ករ៥០គីឡូ,មុងមួយ,កន្ទេលមួយ,និងទឹកត្រីមួយយួរ។
ឯ.ឧ ឈួរ ច័ន្ទឌឿន ក៍បានសំណូមពរ និងណែនាំផងដែរដល់ប្រជាពលរដ្ឋទាំងអស់ត្រូវយកចិត្តទុកដាក់ដល់សុវត្ថិភាពផ្ទាល់ខ្លួនក្នុងការធ្វើដំណើរតាមផ្លូវទឹក ការពារកុំអោយកុមារលង់ទឹក និងនៅផ្ទះម្នាក់ឯង ជាពិសេសត្រូវរក្សាអនាម័យហូបចុកស្អាត រស់នៅស្អាត នៅក្នុងគ្រួសារ ដើម្បីបញ្ជៀសនូវជម្ងឺដង្កាត់ផ្សេងៗ។អំណោយទាំងនេះ ត្រូវបានផ្តល់ជូនតែចំពោះជនរងគ្រោះ និងជនក្រីក្រប៉ុណ្ណោះ ដែលអាចជួយសំរាលការខ្វះខាតបានមួយគ្រាផងដែរ ដែលនេះគឺជាការគិតគូរយកចិត្តទុកដាក់របស់ប្រមុខរាជរដ្ឋាភិបាលចំពោះជនរងគ្រោះគ្រប់មូលដ្ឋាន៕
មតិយោបល់