Jack Ma ត្រូវបានពិភពលោកទាំងមូលទទួលលោកថា ជាសហគ្រិនជោគជ័យបំផុតនៅក្នុងឆ្នាំ ២០១៤ ជាមួយនឹងការលក់ IPO ទទួលបានប្រាក់ ២៥ពាន់លានដុល្លារអាមេរិក ដែលបានជំរុញឲ្យលោកក្លាយជាកំពូលមហាសេដ្ឋីលំដាប់ទី១របស់ចិន។
បន្ទាប់ពីទទួលបានភាពជោគជ័យយ៉ាងខ្លាំងស្ទើតែមិននឹកស្មានដល់នោះ Jack ត្រូវបានក្រុមអ្នកជំនួញ និងបណ្ដាញសារព័ត៌មានជាច្រើនស្នើសុំធ្វើបទសម្ភាសន៍ បង្ហាញពីវិធីសាស្ត្រដែលនាំឲ្យលោកជោគជ័យនៅក្នុងឆ្នាំ ២០១៤។
នៅក្នុងកិច្ចសម្ភាសន៍មួយ លោក Jack Ma បាននិយាយថា ៣ចំណុច ដែលនាំឲ្យ Alibaba ឬរូបលោកផ្ទាល់ជោគជ័យគឺ៖
០១) ជួយបុគ្គលិកដែលមានទេព្យកោសល និងមានជំនាញ
សហគ្រិនជោគជ័យភាពច្រើនតែងតែនិយាយដូចគ្នាថា ក្រុមហ៊ុនមួយជោគជ័យទៅបាន មិនមែនអាស្រ័យលើបុគ្គលិកម្នាក់នោះទេ ហើយក៏មិនមែនអាស្រ័យលើសហគ្រិនផ្ទាល់ដែរ ពោលគឺអាស្រ័យលើការជួយជ្រុំជ្រែងពីសំណាក់មនុស្សជាច្រើននៅក្នុងក្រុមហ៊ុន។ លោក Ma បាននិយាយថា កាលពីលោកមានបំណងចង់បង្កើតក្រុមហ៊ុន Alibaba ដំបូង លោកបានប្រមូលមិត្តភ័ក្តិ និងមនុស្សដែលទុកចិត្តជាច្រើននាក់ ដើម្បីចូលរួមពិភាក្សា បង្កើតអាជីវកម្មឡើង ពេលនោះលោកគឺគ្រាន់តែជាមនុស្សម្នាក់ដែលមានជំនាញភាសាអង់គ្លេសខ្លាំងជាគេប៉ុណ្ណោះ ចំណែកជំនាញផ្សេងៗគឺមិនមាននោះទេ។ លោកបានបន្តទៀតថា Alibaba គឺជាក្រុមហ៊ុនលក់ទំនិញអនឡាញ ហើយរូបលោកចេះត្រឹមតែផ្ញើអ៊ីមេលប៉ុណ្ណោះ ដូច្នេះលោកត្រូវការអ្នកមានជំនាញដើម្បីជួយ។ រហូតមកដល់ពេលសម្រេចចិត្តចេញលក់ IPO លោក Ma បានបញ្ជាក់ថា លោកបានជួលក្រុមអ្នកជំនាញជាច្រើនដើម្បីឲ្យជួយកិច្ចការនេះ ហើយជាលទ្ធផលគឺជោគជ័យពិតមែន។
០២) បង្ហាញការពិតគ្រប់យ៉ាង
ចិនជាប្រទេសមហាអំណាចសេដ្ឋកិច្ចលំដាប់ទី២ ហើយក៏មានអ្នកវិនិយោគទុនក្នុងស្រុក ក្រៅស្រុកជាច្រើន ដូច្នេះដើម្បីទទួលបានជោគជ័យ និងឈ្នះលើក្រុមហ៊ុនផ្សេងៗទៀត លោក Ma បាននិយាយថា រាល់ផែនការ និងគម្រោងទាំងអស់លោកតែងតែបង្ហាញដល់ក្រុមអ្នកវិនិយោគ ឲ្យដឹងឮ ហើយលោកក៏បានបង្ហាញនូវរបាយការណ៍ការភាគលាភជាសាធារណៈ។ ការធ្វើបែបនេះគឺជាការបង្ហាញពីភាពស្មោះត្រង់ និងការផ្ដល់ទំនុកចិត្ត ជាពិសេសគឺទាក់ទាញអារម្មណ៍អ្នកវិនិយោគ។
០៣) ផ្ដោតសំខាន់លើយុទ្ធសាស្ត្រ និងគោលបំណរបស់អ្នក
តើក្រុមហ៊ុនរបស់អ្នក ជាក្រុមហ៊ុនអ្វីដែរ? ហើយខ្លួនអ្នកដែលជាសហគ្រិននេះចង់ធ្វើអ្វី ហើយកំពុងតែធ្វើអ្វី? លោក Ma បាននិយាយថា Google, Facebook និង Amazon ពួកគេបានប្រជែងគ្នាលើដងវិថីអនឡាញ បើទោះបីជាពួកគេមានផលិតផល និងសេវាកម្មខុសគ្នាក្ដី ប៉ុន្តែការប្រជែងគ្នានោះ មិនសំដៅផលផលិតផល ឬសេវាកម្មទេ ពោលគឺសំដៅលើអតិថិជន។ លោក Ma បានបន្ថែមថា
លោកចង់ឲ្យមនុស្សទូទាំងពិភពលោកស្គាល់ Alibaba ដូច្នេះហើយលោកបានចំណាយលុយ ៤ពាន់លានដុល្លារអាមេរិក សម្រាប់ធ្វើការផ្សព្វផ្សាយពាណិជ្ជកម្ម និងរៀបចំឯកសារសម្រាប់លក់ IPO ព្រោះថា បើសិនជាគេមិនស្គាល់ Alibaba ផងនោះ តើលក់ IPO ធ្វើអ្វី ហើយមានមនុស្សប៉ុន្មាននាក់នឹងទិញ IPO របស់ Alibaba។ Jack Ma បានបង្ហាញពីចក្ខុវិស័យផ្ទាល់ខ្លួនថា លោកនឹងពង្រីកឥទ្ធិពលរបស់ខ្លួនទៅកាន់ទីផ្សារអឺរ៉ុប ហើយនឹងវាលុយអាជីវកម្មផ្សេងៗ តាមតែអាចធ្វើទៅបាន បើសិនជាទិញភាគហ៊ុនមិនបាន ទិញយកក្រុមហ៊ុនទាំងមូល បើទិញយកមិនបាន ងាយមកសហការ៕
ប្រែសម្រួល និងដកស្រង់ចេញពី៖ Forbes
មតិយោបល់