ចាកាតា៖ កងទ័ពឥណ្ឌូនេស៊ី បានថ្លែងឲ្យដឹងនៅថ្ងៃអង្គារទី ២៧ ខែមករា ឆ្នាំ ២០១៥ ថា ប្រតិបត្តិការ​ស្វែង​រក​យន្តហោះ AirAsia Flight QZ8501 ត្រូវបានបញ្ឈប់ បន្ទាប់ពី​​ការស្វែងរកបាន​ប្រព្រឹត្ត​ទៅ​អស់​រយៈ​ពេល ១ខែ។ នេះបើយោងតាមការចេញផ្សាយរបស់ CNN នៅថ្ងៃទី ២៧ ខែមករា ឆ្នាំ ២០១៥។

ក្រុមស្រាវជ្រាវ និងទីភ្នាក់ងារជួយសង្គ្រោះបាននិយាយា ពួកគេនឹងបន្ដស្វែងរកសាកសព​ដែលបានបាត់ខ្លួនទៀតនៅកន្លែង​ដែល​បានប្រទះ​ឃើញ​តួលយន្តហោះ ក្នុងសមុទ្រ Java Sea។ កងទ័ពឥណ្ឌូនេស៊ី បានសុំអភ័យទោសដល់ក្រុមគ្រួសារនៃជនរងគ្រោះ​ផងដែរ ចំពោះ​ការ​​បញ្ឈប់ប្រតិបត្តិការនេះ ដោយកងទ័ពឥណ្ឌូនេស៊ី បានលើកឡើងនូវហេតុផលថា បញ្ហាអាកាសធាតុ និង​បញ្ហាបច្ចេកទេស​ទើបធ្វើ​សម្រេចចិត្ត​បញ្ឈប់តែម្ដង។

គួរបញ្ជាក់ផងដែរថា យន្តហោះ AirAsia Flight QZ8501 បានធ្លាក់នៅថ្ងៃទី២៨ ខែធ្នូ ឆ្នាំ ២០១៤ ដោយមានមនុស្ស ១៦២នាក់ ហើយ​គិត​មកដល់ពេលនេះ មានសាកសព​ចំនួន ៧០ត្រូវបានស្រង់ចេញពីទឹក៕