ការអានសៀវភៅបានផ្ដល់នូវអត្ថប្រយោជន៍ជាច្រើន រហូតដល់អ្នកខ្លះទុកការអានសៀវភៅជាទម្លាប់ និង​ជា​មេរៀនសម្រាប់រៀន​ដោយ​ខ្លួន​ទៀត​ផង។ ប្រសិនបើគ្រាន់តែមើលលេងៗ ឬគ្រាន់តែអានឲ្យចប់ហើយ ទុកសៀវភៅចោល នោះគឺមិន​ហៅ​ថា​ជា​អ្នក​អានសៀវភៅនៅទេ។

លោក Bill Gates ស្ថាបនិក Microsoft និងជាកំពូលមហាសេដ្ឋីលំដាប់ពិភពលោក ដែលមានលុយច្រើនជាងគេបំផុតរហូតដល់
៨០ពាន់លានដុល្លារអាមេរិក តែង​តែ​អានសៀវភៅជាប្រចាំថ្ងៃ​ហើយសៀវភៅដែលលោកអានភាគច្រើនជាសៀវភៅយុទ្ធសាស្ត្រ​ពាក់ព័ន្ធ​នឹង​ការ​ធ្វើ​ជំនួញ ការអប់រំ សុខភាព និង​ការគ្រប់គ្រង។ លោក Gates ត្រូវបានមហាជនទទួលស្គាល់ថា ជាបុគ្គលមួយរូប​ដែល​ចូល​ចិត្ត​អាន​សៀវភៅ​បំផុត។

នៅក្នុងកិច្ចសម្ភាសន៍មួយ លោក Bill Gates បាននិយាយ មូលហេតុដែលលោកតែងតែអាន​សៀវភៅ​នៅ​មុន​ពេល​ចូល​ដេក​គឺ​ដោយ​សារ​តែជាមួយផ្នែកមួយដែលធ្វើឲ្យអាជីវកម្មរបស់លោករីកលូតលាស់។ លោកបានបន្តទៀតថា ក្រៅពីផ្ដល់នូវចំណេះដឹង សៀវភៅ​ជា​មិត្តដ៏ល្អ និង​ជា​អ្នកដោះស្រាយបញ្ហា ព្រមទាំងបំភ្លឺផ្លូវ នៅពេលដែល​យើងជួបបញ្ហា។ លោកមិនដែល​ចម្ងាយពេល​វេលា​ច្រើន​ក្នុង​ការ​អាន​សៀវភៅ​នោះ​ទេ ប៉ុន្តែ​លោកតែងតែអានវាជារៀងរាល់ថ្ងៃ ពោលគឺមួយថ្ងៃអានយ៉ាងតិច ១ម៉ោង ហើយអ្វីដែល​លោក​បាន​អាន​គឺ​លោក​ចាំ​បាន​ភាគច្រើនព្រោះថា​លោកអានវាដោយយកចិត្តទុកដាក់ និងអាចដោយសភាពយឺតៗ។

គួរបញ្ជាក់ផងដែរថា នៅក្នុងឆ្នាំ ២០១៤ មានសៀវភៅ ៥មុខ ដែល Bill Gates បានអានចប់ ទី១៖ Business Adventures
សរសេរ​ដោយ John Brooks, ទី២៖ Capital in the Twenty-First Century សរសេរដោយ Thomas Piketty, ទី៣៖ How Asia Works សរសេរដោយ Joe Studwell, ទី៤៖ The Rosie Effect សរសេរដោយ Graeme Simsion និង Making the Modern World: Materials and Dematerialization សរសេរដោយ Vaclav Smil៕

ប្រែសម្រួល និងដកស្រង់៖ Business Insider