នៅថ្ងៃចន្ទទី០២ ខែកុម្ភៈ ឆ្នាំ ២០១៥ ប្រទេសកូរ៉េខាងត្បូង បានអំពាវនាវឲ្យមានកិច្ចពិភាក្សាជាថ្មី ជាមួយសាធារណរដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) បន្ទាប់ពីការស្នើសុំពិភាក្សានៅក្នុងខែមករាបានបរាជ័យ ក្នុងគ្រាមានជម្លោះលើបញ្ហាជាច្រើន នេះបើយោងតាមការចេញផ្សាយរបស់ទីភ្នាក់ងារព័ត៌មានចិន ស៊ិនហួ។
តំណាងសម្របសម្រួលរបស់កូរ៉េខាងត្បូង លោក Lim Byeong-cheol បានប្រាប់សារព័ត៌មានថា រដ្ឋាភិបាលក្រុងសេអ៊ូល នៅតែអំពាវនាវឲ្យមានកិច្ចពិភាក្សាជាមួយនឹងកូរ៉េខាងជើង បើទោះបីជាកូរ៉េខាងជើងបានច្រានចោលការស្នើសុំពិភាក្សាជាច្រើនដងក្ដី។ កាលពីខែធ្នូ កន្លងទៅនេះ កូរ៉េខាងត្បូង បានស្នើសុំឲ្យមានកិច្ចពិភាក្សានៅក្នុងខែមករា ប៉ុន្តែការស្នើសុំត្រូវបានបរាជ័យ។
កូរ៉េខាងត្បូង សង្ឃឹមថា កូរ៉េខាងជើងនឹងយល់ព្រមលើការស្នើសុំ តាមសំណើដើម្បីឲ្យក្រុមគ្រួសារកូរ៉េទាំងពីរបានជួបគ្នានៅថ្ងៃបុណ្យចូលឆ្នាំថ្មីនៅពាក្យកណ្ដាលខែកុម្ភៈ។
គួរបញ្ជាក់ផងដែរថា សង្គ្រាមកូរ៉េបានផ្ទុះឡើងនៅឆ្នាំ ១៩៥០ ដល់ ១៩៥៣ ដោយបានបែងចែកប្រទេសកូរ៉េជាពីរ និងបានធ្វើឲ្យក្រុមគ្រួសារជាច្រើនត្រូវបានបែកគ្នា ហើយការស្នើសុំនេះគឺដើម្បីចង់ឲ្យប្រជាជននៃប្រទេសទាំងពីរបានជួបគ្នាវិញ៕
ព័ត៌មានជាតិ
មតិយោបល់