ក្រុមហ៊ុនបច្ចេកវិទ្យាយក្ស Apple គ្រោងលក់មូលបត្របំណុលនៅក្នុងពេលណាមួយ នាពេលឆាប់ៗទៅ ឲ្យបានយ៉ាងហោចណាស់ ៦,៥ពាន់លានដុល្លារអាមេរិក ដើម្បីបំពេញតម្រូវការរបស់វិនិយោគិន នេះបើយោងតាមការចុះផ្សាយរបស់ AP។
ក្រុមហ៊ុនផលិត iPhone មួយនេះ គ្រោងលក់មូលបត្របំណុលក្នុងរយៈពេល ៥ ទៅ៣០ឆ្នាំ ឲ្យបានយ៉ាងហោចណាស់ ៥ពាន់លានដុល្លារអាមេរិក ប៉ុន្តែដោយសារតែមានតម្រូវការខ្លាំងពីវិនិយោគិន Apple ក៏សម្រេចលក់រហូតដល់ ៦,៥ពាន់លានដុល្លារអាមេរិក។
នេះមិនមែនជាការលក់មូលបត្របំណុល ដែលមានទ្រង់ទ្រាធំនោះទេ ដោយកាលពីឆ្នាំ ២០១៣ ក្រុមហ៊ុនមួយនេះ បានលក់រហូតដល់ ១៧ពាន់លានដុល្លារអាមេរិក ហើយនៅឆ្នាំ ២០១៤ កន្លងទៅនេះ លក់ក្នុងតម្លៃ ១២ពាន់លានដុល្លារអាមេរិក។
គួរបញ្ជាក់ផងដែរថា ក្រុមហ៊ុន Apple ទទួលបានប្រាក់ចំណេញ ១៨ពាន់លានដុល្លារអាមេរិក និងចំណូល ៧៤,៦ពាន់លានដុល្លារអាមេរិក ក្នុងត្រីមាសចុងឆ្នាំ ២០១៤៕
ព័ត៌មានជាតិ
មតិយោបល់