បើទោះបីជា Mark Zuckerberg ស្ថាបនិក និងជានាយកប្រតិបត្តិ Facebook មិនមានលុយច្រើនដូច Bill Gates មេធំ Microsoft ក្ដី ប៉ុន្តែលោកក៏ជាកំពូលមហាសេដ្ឋីដែលមានវ័យក្មេងជាងគេមួយរូបផងដែរ។ ថ្មីៗនេះទស្សនាវដ្ដី Times បានសម្ភាសន៍ Mark Zuckerberg ពាក់ព័ន្ធនឹងភាពជោគជ័យ ដែលនាំឲ្យលោកក្លាយជាកំពូលមហាសេដ្ឋីវ័យក្មេង ដោយក្នុងនោះ Mark Zuckerberg បានណែនាំនូវចំណុចល្អ ៣យ៉ាងសម្រាប់ជាចង្គៀងបំភ្លឺផ្លូវដល់សហគ្រិនដែលចង់កសាងខ្លួនឲ្យជោគជ័យ។
០១) ចំណង់ចំណូលចិត្ត
ចាប់តាំងពីវ័យក្មេង លោក Mark Zuckerberg បានចូលចិត្តវិស័យបច្ចេកវិទ្យា រហូតដល់លោកឈានជើងចូលមហាវិទ្យា និងចាប់ផ្ដើមបង្កើត Facebook គឺលោកមានគោលបំណងធំមួយគឺចង់បង្កើតអ្វីដែលអស្ចារ្យសម្រាប់ពិភពលោក និងមនុស្សគ្រប់គ្នា។ លោក Mark Zuckerberg បាននិយាយថា “ខ្ញុំស្រឡាញ់ផ្នែកបច្ចេកវិទ្យា ហើយក្រុមគ្រួសាររបស់ខ្ញុំក៏បានជំរុញឲ្យខ្ញុំដើរលើផ្លូវនោះផងដែរ រហូតដល់ខ្ញុំបង្កើត Facebook ឡើង”។ លោកបានបន្តទៀតថា ចំណង់ចំណូលចិត្តគឺជាកត្តាធំបំផុត ដែលធ្វើឲ្យមនុស្សជោគជ័យបាន បើគ្មានចំណងចំណូលចិត្តទេ នោះមិនអាចឈានដល់ដំណាក់កាលជោគជ័យបាននោះទេ។
០២) គោលដៅ
លោក Mark Zuckerberg បានបញ្ជាក់ថា បើគ្មានគោលដៅនោះទេ លោកមិនអាចសម្រេចបានល្អដូចថ្ងៃនេះដែរ។ “គោលដៅរបស់ខ្ញុំគឺបង្កើត Facebook ដើម្បីភ្ជាប់មនុស្សទូទាំងពីភពលោកឲ្យនៅក្បែរគ្នា ហើយនឹងចែករំលែកនូវអ្វីដែលមានឲ្យគ្នាទៅវិញទៅមក”។ នេះជាសំដីរបស់ Mark Zuckerberg បញ្ជាក់ឲ្យដឹងបន្ថែម។ លោកបានបន្តទៀតថា ក្រៅពី Facebook លោកបានចំណាយពេលវេលា និងប្រាក់រាប់លានដុល្លារអាមេរិក ដើម្បីនាំយកអ៊ីនធើណែតទៅកាន់តំបន់ដែលគ្មានអ៊ីនធើណែតប្រើ ដោយនេះជាគោលដៅរបស់លោកមួយផងដែរ ក្នុងការបង្កើតក្រុមហ៊ុន Internet.org ឡើង។
០៣) ភាពស្មោះត្រង់
ភាពស្មោះត្រង់ បានធ្វើឲ្យមនុស្សជាច្រើនទទួលបានភាពជោគជ័យ និងកេរ្តិ៍ល្អ មិនសាបសូន្យ។ ជាក់ស្ដែង លោក Mark Zuckerberg បាននិយាយកាលពី Facebook មិនទាន់ដំណើរការដូចសព្វថ្ងៃថា លោកនឹងចែកភាគលាភសម្រាប់មនុស្សគ្រប់គ្នាទាំងអស់ ដែលបានជួយដល់ Facebook មិនថាអ្នកនោះបានជួយក្នុងវិធិសាស្ត្រណាទេ ពោលគឺឲ្យតែមានចំណែកចូលរួម លោកនឹងផ្ដល់ភាគលាភឲ្យ។ ក្រោយពេល Facebook បានប្រកាសលក់ IPO លោក Mark Zuckerberg បានចាប់ផ្ដើមចែកភាគហ៊ុន និងលក់ភាគហ៊ុនឲ្យបុគ្គលិកក្នុងតម្លៃទាប ព្រមទាំងបានផ្ដល់ភាគលាភផ្សេងៗ។
គួរបញ្ជាក់ផងដែរថា ក្រុមអ្នកវិនិយោគទុនភាគច្រើនបានចូលចិត្ត Facebook ជាង Google ក៏ព្រោះតែថា Facebook បានបង្ហាញចក្ខុវិស័យ និងគម្រោងសម្រាប់អនាគតដល់អ្នកវិនិយោគទាំងអស់ឲ្យបានដឹង ពោលគឺមិនមានការលាក់បាំងឡើយ៕
ដកស្រង់ និងប្រែសម្រួលពី៖ Business Insider
មតិយោបល់