ភ្នំពេញ​៖ផលិតកម្ម BKS កន្លះខែ​ខាងមុខទៀតនេះ នឹងបោះទុនធំ ផលិតសាច់រឿងខ្នាតធំ ប្រកួតប្រជែងលើទីផ្សារ ជាមួយនឹងផលិតកម្មធំៗផ្សេងទៀត ដើម្បិបម្រើដល់អារម្មណ៍ ប្រិយមិត្ត ជិតឆ្ងាយរបស់ខ្លួន​។​

ជាមួយនឹងវីសាលភាព​ផលិតសាច់រឿង​ក្នុងស្រុកខ្មែរ ងើបស្ទុះឡើង លោក ឈុន សុវណ្ណភក្តី ​ជាអ្នកគ្រប់គ្រងក្នុងផលិតកម្ម BKS បាន​​ប្រាប់ដល់សារព័ត៌មាន ដំណឹង ថា “ផលិតកម្ម BKS ក្រៅពីផលិតចម្រៀង ជាស្នាដៃកូនខ្មែរ នោះ ខ្លួនក៏​បានត្រៀមខ្លួនរួចរាល់ហើយផងដែរ ដោយត្រូវចាយទុនធំ ​ផលិតរឿង “នេនគ្រឿន អាចារ្យក្រូច” ជាភាពយន្តខ្នាតធំ​ យ៉ាងយូរបំផុត​គឺ កន្លះខែ ទៀតពោលគឺចុងខែ កុម្ភៈនេះ នឹង​ចាប់ផ្តើមផលិត”។ អ្នកគ្រប់គ្រងវ័យក្មេងរូបនេះ​បានបន្តទៀតថា រឿង “នេនគ្រឿន អាចារ្យក្រូច” ជាសាច់រឿងបែបកំប្លែង ដោយមាន​តារាប្រុសស្រី ល្បីៗ​ជាច្រើន ចូលរួមថត ហើយក៏ជារឿងដែលនឹងចាយទុនធំផងដែរ ។ ឈុន សុវណ្ណភក្តី បានបន្ថែមទៀតថា សម្រាប់ទុនធំ ផលិតសាច់រឿងនេះ យើងមិនទាន់ដឹងថា ត្រូវចាយ​ប៉ុន្មាននោះទេ តែទោះជាចាយទុនធំយ៉ាងណា ក៏យើងត្រូវចាយដែរ ដើម្បី​ផលិតសាច់រឿងនេះឲ្យបាន ។​

បញ្ជាក់ផងដែរថា ផលិតកម្ម BKS ជាផលិតកម្មមួយ ​ក្មេងខ្ចីបំផុត តែ​សមត្ថភាព និង គោលការណ៍របស់ខ្លួនផ្អែកលើផែនការ​ មិនចម្លងគេ ចាំបាច់បំផុតគឺផលិតបទចម្រៀង ជាស្នាដៃកូនខ្មែរ ​ដើម្បីលើកស្រួយដល់វប្បធម៌ខ្មែរ ឲ្យថ្កុំថ្កើង ៕​