ធ្វើជាអ្នកដឹកនាំគេម្នាក់ មិនមែនជារឿងងាយស្រួលនោះទេ គឺត្រូវលុតដំខ្លួនឯង និងត្រូវឆ្លងកាត់បទពិសោធន៍ជាច្រើននៅក្នុងជីវិតការងារ និងផ្ដល់ខ្លួន ជាពិសេសគឺទាំងផ្លូវកាយ និងចិត្ត។
ខាងក្រោមនេះគឺជាដំបូន្មាន ៥យ៉ាង ដើម្បីក្លាយជាអ្នកដឹកនាំដ៏ល្អ៖
០១) ការតស៊ូ
មនុស្សម្នាក់ៗត្រូវតែមានការតស៊ូ និងមានក្ដីសង្ឃឹមជានិច្ច ទើបឈានដល់ភាពជោគជ័យ និងសម្រេចបាននូវគោលដៅរបស់ខ្លួន។ ការលុតដំផ្លូវកាយ មិនគ្រប់គ្រាន់នោះទេ ត្រូវលុតដំផ្លូវចិត្តថែមទៀត បើមិនដូច្នេះទេគឺមិនអាចដោះស្រាយបញ្ហាដែលកើតមាននៅចំពោះមុខបាននោះទេ។ លោក Bill Gates ស្ថាបនិក Microsoft និងជាមហាសេដ្ឋី ដែលមានលុយច្រើនជាងគេ បាននិយាយថា នៅពេលដែលបុគ្គលិកក្រោមឱវាទធ្វើអ្វីមួយខុស មិនត្រូវស្ដីបន្ទោសភ្លាមនោះទេ ត្រូវតែសង្កេតមើលថា គាត់មានបញ្ហាអ្វីមួយនៅក្នុងគ្រួសារ ឬជាមួយមិត្តរួមការងារដែរ ឬអត់? ហេតុផលដែលលោកលើកយកចំណុចនេះមកនិយាយថា ព្រោះថា លោកក៏ធ្លាប់ត្រូវបានគេស្ដីបន្ទោស ខណៈពេលលោកកំពុងសិក្សា ហើយអារម្មណ៍បែបនោះគឺលោកចាំច្បាស់។ ការតស៊ូ ជាកត្តាដ៏សំខាន់មួយក្នុងការជំរុញឲ្យមនុស្សម្នាក់ ឈានទៅរកចំណុចជោគជ័យ ដូចពាក្យស្លោកខ្មែរមួយឃ្លាបានពោលថា “តស៊ូ គង់បានសម្រេច”។
០២) ស្វែងរកមិត្តភាពស្មោះត្រង់
ទំនាក់ទំនងគឺជារឿងសំខាន់ ប៉ុន្តែភាពស្មោះត្រង់នឹងគ្នាក៏ជារឿងសំខាន់មួយផងដែរ បើសិនជាសម្រេចចិត្តដើរនៅលើផ្លូវតែមួយជាមួយគ្នាហើយនោះ ត្រូវតែស្មោះត្រង់។ ធ្វើជាអ្នកដឹកនាំគេម្នាក់ ភាពស្មោះត្រង់ជារឿងសំខាន់ បើមិនស្មោះត្រង់ទេ នោះអ្នកនៅក្រោមឱវាទ នឹងលែងស្ដាប់បង្គាប់ ហើយដើរចោលជាមិនខាន ព្រោះគេគិតថា ធ្វើការជាមួយមនុស្សមិនស្មោះត្រង់គឺគ្មានផ្លូវល្អសម្រាប់អនាគតទេ។ ទំនាក់ទំនងរវាងអ្នកដឹកនាំ និងបុគ្គលនៅក្រោមឱវាទ ជារឿងមួយខុសពីមិត្តភាពរវាងមិត្តភ័ក្តិ ព្រោះថា អ្នកដឹកនាំ និងបុគ្គលនៅក្រោមឱវាទ ជាមនុស្សពីរនាក់ដើរនៅលើផ្លូវតែមួយ បើសិនជាមានមួយមិនស្មោះត្រង់នោះនឹងមិនអាចទៅដល់គោលដៅទេ។
០៣) រៀនដោះស្រាយបញ្ហា
ធ្វើជាអ្នកដឹកនាំល្អម្នាក់ត្រូវតែប្រឈមមុខនឹងបញ្ហាខ្ពស់ ដោយសារតែត្រូវរាប់រង់នូវបញ្ហាជាច្រើន បើទោះបីជាបញ្ហានោះជាមិនមែនជាកំហុសរបស់ខ្លួនក៏ដោយ។ នៅពេលថ្នាក់ក្រោមកើតមានបញ្ហាអ្វីមួយ អ្នកដឹកនាំល្អ ត្រូវតែចេញមុខដោះស្រាយ មិនមែនឈរចង្អុយដោយបុគ្គលនៅក្រោមឱវាទដោះស្រាយ ហើយខ្លួនឯងអង្គុយចាំស្ដាប់ ឬយកផលចំណេញនោះទេ ជាអ្នកដឹកនាំដ៏ល្អ ត្រូវតែដើរនាំមុខកូនចៅជានិច្ច និងត្រូវចេះការងារកូនចៅ មិនមែនចាំតែបញ្ជានោះទេ។
០៤) ចូលរួមសកម្មភាពពេញលេញ
មិនបានផ្ដោតទៅលើកម្មវិធីជប់លៀង ឬកម្មវិធីសប្បាយៗនោះទេ ប៉ុន្តែផ្ដោតទៅលើសកម្មភាពការងារជាក្រុម។ អ្នកដឹកនាំល្អ ត្រូវតែចូលខ្លួននៅក្នុងការងារ បើទោះបីជាការងារនោះត្រូវបានប្រគល់ដល់អ្នកដទៃក្ដី ប៉ុន្តែត្រូវដឹកថា គម្រោង ឬផែនការនោះបានឈានដល់ចំណុចណាហើយ តើវាមានបញ្ហាអ្វីកើតឡើង។ ត្រូវចាំថា កូនចៅមានអារម្មណ៍សប្បាយរីករាយបំផុតនៅពេលឃើញអ្នកដឹកនាំរបស់ខ្លួនចូលរួមនៅក្នុងសកម្មភាពការងារ បើទោះបីជាមិនបានធ្វើអ្វីក៏ដោយ។
០៥) រៀនបន្ថែមពីភាពជាអ្នកដឹកនាំ
នៅពេលដែលអ្នកកំពុងតែដឹកនាំគេនោះ អ្នកមិនបានដឹងទេថា ទង្វើ ឬសកម្មភាពរបស់អ្នកត្រូវ ឬខុស និងម្យ៉ាងទៀត អ្នកមិនអាចដឹងថា ការដឹកនាំដោយជោគជ័យទាំងស្រុងនោះ ត្រូវការបទពិសោធន៍ និងចំណុចសំខាន់អ្វីខ្លះទេ។ អ្នកជោគជ័យ និងអ្នកដឹកនាំល្អភាគច្រើន សុទ្ធតែបានណែនាំឲ្យអានសៀវភៅ ព្រោះថា ចំណេះវិជ្ជាគ្មានព្រំដែន អានច្រើន ចេះច្រើន ជាក់ស្ដែង លោក Bill Gates បាននិយាយថា ក្នុងមួយថ្ងៃ លោកចំណាយពេលអានសៀវភៅយ៉ាងតិច ១ម៉ោង ទៅ២ម៉ោង ចំណេក លោក Mark Zuckerberg នាយកប្រតិបត្តិ Facebook វិញបានបង្ហាញពីគោលបំណងរបស់លោក អានសៀវភៅឲ្យបានច្រើនមុខបំផុតនៅក្នុងឆ្នាំនេះ៕
មតិយោបល់