សៀមរាបៈលោកគ្រូអ្នកគ្រូនៃវិទ្យាល័យ១០មករា១៩៧៩ក្រុងសៀមរាប ប្រមាណ១២៦នាក់ ក្នុងចំណោម១៧៦នាក់ នៅព្រឹកថ្ងៃទី២៥ខែកុម្ភៈបានធ្វើកូដកម្ម មិនចូលបង្រៀនសិស្ស ដោយទាមទារឲ្យប្តូរលោកគ្រូម្នាក់ចេញ បន្ទាប់ពីបានដាក់សំណើរទៅមន្ទីរ បីដងរួចមកហើយ តែគ្មានដំណោះស្រាយ។
គ្រូដែលត្រូវទាមទារឲ្យប្តូរចេញ មានឈ្មោះជាន ស៊ន បង្រៀនថ្នាក់អនុវិទ្យាល័យ នៃវិទ្យាល័យ១០មករា១៩៧៩ ក្រុង ខេត្តសៀមរាប។
ក្រុមគ្រូបង្រៀនដែលធ្វើកូដកម្ម បាននិយាយថា ពួកគាត់មិនអាចគាំទ្រឲ្យលោកគ្រូឈ្មោះជាន ស៊ននៅបំរើការក្នុងសាលានេះទៀតបានទេ មូលហេតុដោយសាគ្រូម្នាក់នេះ បង្កបញ្ហាទៅលើគ្រូផ្សេងៗ ៦ទៅ៧ដងរួចមកហើយ ហើយមិនកែប្រែតាមការស្នើសុំ។ កាលពីកន្លងទៅថ្មីៗនេះ គ្រូរូបនេះបង្ករបួសស្នាមជាមួយលោកគ្រូម្នាក់ទៀត នៅក្នុងពិធីមង្គលការ ដោយយករូបភាពវាយតប់ ទៅបង្ហោះក្នុងសង្គមហ្វេសប៊ុក បង្កការប៉ះពាល់ដល់សាលា។
ប្រភពបានបន្តថា ការដែលមានជម្លោះឯកជន ហើយយករូបភាពទាំងនោះទៅធ្វើជាល្បែងលេងបែបនេះមិនត្រឹមតែប៉ះពាល់ដល់សាលាទេ គឺថែមទាំងមានការរិះគន់ពីអាណាព្យាបាលសិស្សរាប់រយនាក់ រហូតមានធ្លាយពាក្យពីអាណាព្យាបាលសិស្សថា វិទ្យាល័យ១០មករា មិនសាកសមជាកន្លែងបណ្តុះបណ្តាយ ដល់សិស្សា នុសិស្សឡើយ។ គឺគួតែប្តូរធ្វើទៅជាសង្វៀនប្រដាល់វិញទើបសម។ ប៉ុន្តែចំពោះការធ្វើកូដកម្មនេះ គឺមិនពាក់ពន្ធ័នឹងជម្លោះឯកជនឡើយ ប្រសិនបើគ្រូរូបនោះ មិនធ្វើឲ្យប៉ះពាល់ដល់សាលា។
លោកគ្រូម្នាក់ឈ្មោះប៊ី ប៊ុនសុផុន្នី ដែលជាគូជម្លោះឯកជន បានបរិយាយថា កាលពីថ្ងៃទី២៧ខែធ្នូឆ្នាំ២០១៤កន្លងទៅ រូបគាត់ត្រូវលោកគ្រូឈ្មោះជាន ស៊ន វាយឲ្យរបួសនៅក្នុងពិធីមង្គលការ នៅភោជនីយដ្ឋានបូរី អាពាហ៏ពិពាហ៏ក្រុងសៀមរាប។ តែការបង្ករបួសស្នាមនោះ រូបលោកបានប្តឹងទៅតុលាការហើយ ដោយទាមទារសំណង២០០០០ដុល្លារ។ ចឹងទេរឿងឯកជន គឺបានស្វែងរកផ្លូវច្បាប់ ជាដំណោះស្រាយ ឯរឿងធ្វើកូដកម្ម គឺជារឿងដែលបង្កការប៉ះពាល់ដល់កិត្តិយសសាលា តែក៏ផ្តើមចេញពីការបង្ករបួសស្នាមផងដែរ។
នៅក្នុងពេលដែលក្រុមលោកគ្រូ អ្នកគ្រូជាង១០០នាក់ធ្វើកូដកម្មមិនបង្រៀនសិស្ស លោកគ្រូឈ្មោះជាន ស៊ន ភាគីដែលត្រូវទាមទារឲ្យប្តូចេញពីសាលា បានលើកឡើងថា ការធ្វើកូដកម្មទាមទារធ្វីមួយ គឺជាសិទ្ធិរបស់គ្រូទាំងអស់គ្នា។ ពីព្រោះរូបគាត់ ពុំដែលបានធ្វើអ្វីឲ្យប្រាសចាកអំពីវិន័យសាលាឡើយ។ ការដែលយករូបភាពក្នុងជម្លោះទៅបង្ហោះក្នុងហ្វេសប៊ុក គឺគ្រាន់តែចង់បង្ហាញទៅក្រុមមិត្តភក្ត័ ឲ្យបានដឹងអំពីរឿងរ៉ាវនៃការវ៉ៃតប់គ្នាប៉ុណ្ណោះ។ ម្យ៉ាងវិញទៀតក្នុងពេលវ៉ៃតប់គ្នា រូបខ្ញុំមានតែម្នាក់ឯង រីឯភាគីម្ខាង គឺមានគ្នា៤នាក់ ចឹងហើយទើបបង្ហោះឲ្យមិត្តភក្ត័បានដឹង។
គ្រូដដែលបន្តថា តាមពិតពួកគេធ្វើនេះគឺគ្រាន់តែជាបក្ខពួកនិយម។ ពួកគេធ្វើនេះគឺស្របពេលដែលតុលាការបំរ៉ុងចាប់ខ្លួនលោក ដោយចោទថា មិនព្រមចូលខ្លួនទៅបំភ្លឺតាមដីការ។ ធាតុពិតគឺពុំដែលមាននណាយកដីការមកឲ្យម្តងណាទេ។ តែមិនថ្វីទេរូបខ្ញុំ(ជាន ស៊ន) អាចតតាំងតាមផ្លូវច្បាប់ ចំពោះរឿងវាយតប់គ្នា។ ឯរឿងកូដកម្ម ថាត្រូវធ្វើដល់កំរិតណានោះ ជាសិទ្ធិរបស់ពួកគាត់ចុះ។
យ៉ាងណាក៏ដោយគេសង្កេតឃើញថា កូដកម្មមួយនេះហាក់មានភាពចម្លែក ពីព្រោះសិស្សរាប់រយនាក់ក្នុងឯកសណ្ឋានខៀវសឈរត្រៀបត្រា រងចាំចូលរៀន ឯក្រុមគ្រូបង្រៀនអង្គុយជាផ្នែកៗរងចាំការដោះស្រាយពីអាជ្ញាធរឬមន្ទីរអប់រំ។ ប៉ុន្តែពេញមួយព្រឹកធំ គឺពុំមានអាជ្ញាធរឬខាងមន្ទីរអប់រំ ចេញមុខទៅរកដំណោះស្រាយណាមួយនោះទេ។ ទីបំផុតសិស្សរាប់រយនាក់ក៏ត្រឡប់ទៅផ្ទះវិញ ទាំងជិតដល់ថ្ងៃត្រូវប្រលង។
ជុំវិញហេតុការណ៏នេះលោកអ៊ុង សិរីឌី ប្រធានមន្ទីរអប់រំយុវជននិងកីឡាខេត្ត បានថ្លែងតាមទូរសព្ទ័ថាតាមពិតរឿងនេះ គឺផ្តើមចេញពីរឿងជម្លោះបុគ្គលនៅក្រៅរបងសាលាទេ ហើក៏ទាញភ្ជាប់មកដល់រឿងក្នុងសាលា។ រឿងកើតមានកន្លងមកខាងមន្ទីរបានព្យាយាមដោះស្រាយជាបន្តបន្ទាប់ហើយ តែជាដំណាក់កាល ពីព្រោះមន្ទីរក៏ត្រូវការ ការសម្រេសពីថ្នាក់ខេត្តដែរ។ ចឹងទេរឿងប៉ុណ្ណឹងមិនគួរកើតមានដល់ត្រូវធ្វើកូដកម្មនោះឡើយ។លោកបានបន្តថា ចំពោះរឿងនេះគណកម្មការវិន័យ របស់មន្ទីរបានទៅពិនិត្យ និងធ្វើការសម្របសម្រួលហើយ ឯលទ្ធផលយ៉ាងណានោះ គឺមិនទាន់ចេញជាផ្លែផ្កានៅឡើយទេ។
លោកគ្រូឈ្មោះប៊ី ប៊ុនសុផុន្នី បានបញ្ជាក់ចុងក្រោយថា ពួកគេនឹងបន្តធ្វើកូដកម្មរហូតបីថ្ងៃ ប្រសិនបើគ្មានដំណោះស្រាយ។ ក្រោយចប់បីថ្ងៃ និងអាចបន្តធ្វើជាទ្រង់ទ្រាយធំ រហូតដុតកង់ឡានទៀត នោះប្រសិនបើនៅតែគ្មានដំណោះស្រាយ៕
មតិយោបល់