រដ្ឋមន្ត្រីក្រសួងប្រៃសណីយ៍ និងទូរគមនាគមន៍នៃប្រទេសកម្ពុជា ឯកឧត្តម ប្រាក់ សុខុន បានធ្វើដំណើរទស្សនកិច្ចទៅកាន់ទីក្រុងបាសេឡូណា តាមការអញ្ជើញរបស់មហាសន្និបាតទូរស័ព្ទពិភពលោក និងក្រុមហ៊ុន Huawei ដែលមានស្តង់ពិព័រណ៍របស់ខ្លួន នៅទីក្រុងបាសេឡូណា កាលពីថ្ងៃទី ០៣ ខែមីនា ឆ្នាំ ២០១៥ ។
ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានដឹកនាំគណៈប្រតិភូ ដែលរួមមានតំណាងចំនួន៨រូប មកពីក្រសួងប្រៃសណីយ៍ និងទូរគមនាគមន៍ និយតករទូរគមនាគមន៍នៃប្រទេសកម្ពុជា មន្ត្រីនៃវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន បានធ្វើទស្សនកិច្ចនៅពិព័រណ៍មហាសន្និបាតទូរស័ព្ទពិភពលោក រួមទាំងស្តង់ពិព័រណ៍ដ៏ធំរបស់ក្រុមហ៊ុន Huawei ផងដែរ។
គណៈប្រតិភូបានទស្សនាស្តង់ពិព័រណ៍របស់ក្រុមហ៊ុន Huawei និងការធ្វើបទបង្ហាញនានាលើដំណោះស្រាយប្រព័ន្ធ ICT និងផលិតផលថ្មីៗ ទំនើបៗ ជាច្រើន។
បន្ទាប់ពីទស្សនកិច្ចនេះ ឯកឧត្តម ប្រាក់ សុខុន បានជួបពិភាក្សា និងសំណេះសំណាលជាមួយតំណាងកំពូលរបស់ថ្នាក់ដឹកនាំក្រុមហ៊ុន Huawei ប្រកបដោយភាពស្និទ្ធស្នាល លើប្រធានបទ ការធ្វើផែនការអភិវឌ្ឍប្រព័ន្ធ ICT បណ្តាញសុវត្ថិភាពអ៊ីនធើណេត និងការបណ្តុះបណ្តាលធនធានមនុស្ស។
ឯកឧត្តម ប្រាក់ សុខុន បានលើកឡើងថា៖ «យើងសូមថ្លែងអំណរគុណចំពោះការរួមចំណែកដ៏ធំធេងរបស់ក្រុមហ៊ុន Huawei លើវិស័យបច្ចេកវិជ្ជាព័ត៌មាន និងទូរគមនាគមន៍នៅកម្ពុជា និង ជំនួយនានាចំពោះរាជរដ្ឋាភិបាលកម្ពុជា ជាពិសេសក្រសួងប្រៃសណីយ៍ និងទូរគមនាគមន៍។ យើងសង្ឃឹមថា ក្រុមហ៊ុន Huawei នឹងបន្តបំពេញបន្ថែមនូវរាល់តម្រូវការនានារបស់សង្គម ក៏ដូចជាការទទួលខុសត្រូវរបស់ក្រុមហ៊ុន ចំពោះសង្គម (CSR) ផងដែរ។ »
នាយកប្រតិបត្តិរបស់ក្រុមហ៊ុន Huawei បានបញ្ជាក់ថា៖ «ក្រុមហ៊ុន Huawei នឹងបំពេញតាមការសន្យារបស់ខ្លួន ដើម្បីធ្វើឱ្យកិច្ចខិតខំប្រឹងប្រែងក្នុងការផ្តល់នូវដំណោះស្រាយ និងសេវាកម្មនានា នៅក្នុងប្រទេសកម្ពុជាឲ្យមានប្រសិទ្ធភាពខ្ពស់ទ្វេឡើង។ ក្នុងនោះ ក្រុមហ៊ុនក៏បានប្តេជ្ញាចិត្តជាថ្មីទៀត ដើម្បីធ្វើការឲ្យកាន់តែជិតស្និទ្ធជាមួយក្រសួងប្រៃសណីយ៍ និងទូរគមនាគមន៍កម្ពុជា ក្នុងការបង្កើនកិច្ចសហប្រតិបត្តិការលើផ្នែកហេដ្ឋារចនាសម្ព័ន្ធទូរគមនាគមន៍ ពិគ្រោះយោបលពីគោលនយោបាយ ICT និងមន្ទីរបណ្តុះបណ្តាធនធានមនុស្សជាដើម។»
ដំណើរទស្សនកិច្ចរបស់ ឯកឧត្តម ប្រាក់ សុខុន មកកាន់ស្តង់ពិព័រណ៍d_ធំរបស់ក្រុមហ៊ុន Huawei បានលើកកម្ពស់កិច្ចសហប្រតិបត្តិការ រវាងក្រសួងប្រៃសណីយ៍ និងទូរគមនាគមន៍ និងក្រុមហ៊ុន Huawei ឈានដល់ដំណាក់កាលថ្មីមួយកាន់តែប្រសើរឡើងតាមរយៈសមិទ្ធផលនានាជាច្រើននាពេលកន្លងមក៕
អំពីគ្រុបអាជីវកម្មសម្រាប់អតិថិជន Huawei
ជាមួយនឹងមជ្ឈមណ្ឌលស្រាវជ្រាវ និងអភិវឌ្ឍន៍ ចំនួន ១៦ នៅក្នុងប្រទេសជាច្រើន រួមមាន ប្រទេសអាល្លឺម៉ង់ ស៊ុយអែត អាមេរិក បារាំង អ៊ីតាលី រុស្ស៊ី ឥណ្ឌា និងចិន ផលិតផល និងសេវាកម្មរបស់ក្រុមហ៊ុន Huawei ពង្រីកដល់ជាង ១៧០ ប្រទេស កំពុងបម្រើមួយភាគបី នៃចំនួនប្រជាជនសរុបក្នុងពិភពលោក។ នៅឆ្នាំ ២០១៤ ការនាំចេញស្មាតហ្វូនរបស់ក្រុមហ៊ុន Huawei បានជាប់លំដាប់ថ្នាក់លេខបីនៅលើពិភពលោក។ គ្រុបអាជីវកម្មមួយ ក្នុងចំណោមគ្រុបអាជីវកម្មបីរបស់ក្រុមហ៊ុន Huawei មានដូចជា គ្រុបអាជីវកម្មសម្រាប់អតិថិជន Huawei (BG) ដែលចែកចាយនូវផលិតផល រួមមាន ទូរស័ព្ទដៃ ឧបករណ៍អ៊ីនធើណេតតាមទូរស័ព្ទ (MBB) និងឧបករណ៍អ៊ីនធើណេតតាមផ្ទះ។ ជាមួយនឹងបទពិសោធន៍អាជីវកម្មដ៏លើសលប់ផ្នែកបច្ចេកវិជ្ជាព័ត៌មាន និងទូរគមនាគមន៍(ICT) អស់រយៈពេលជាង២០ឆ្នាំ ជាបណ្តាញសកលដ៏ទូលំទូលាយ ប្រតិបត្ដិការអាជីវកម្មលំដាប់ពិភពលោក ព្រមទាំងជាដៃគូដ៏មានបទពិសោធន៍ គ្រុបអាជីវកម្មសម្រាប់អតិថិជន Huawei (BG) បានប្តេជ្ញាពាំនាំយកបច្ចេកវិជ្ជាចុងក្រោយបំផុត ជូនដល់អតិថិជន ផ្តល់ជូនពិភពលោកនូវលទ្ធភាពនានា និងការបង្កើតបទពិសោធន៍ដ៏អស្ចារ្យសម្រាប់អ្នកប្រើប្រាស់គ្រប់ទីកន្លែង៕
មតិយោបល់