សៀមរាប៖ មន្ទីរព្យាបាលតាព្រហ្មរងការចោទប្រកាន់ថា បានដាក់ស៊ីរ៉ូមនិងចាក់ថ្នាំឲ្យអ្នកជម្ងឺលើសឈាមម្នាក់បណ្តាលឲ្យក្អួតទន់ដៃទន់ជើងធ្លាក់ខ្លួនឈឺធ្ងន់រហូតបញ្ជូនទៅមន្ទីរពេទ្យបង្កែកខេត្តសៀមរាប ហើយខាងមន្ទីរពេទ្យខេត្តក៏ឆ្លើយថា អស់លទ្ធភាពព្យាបាលដែរ រួចសាច់ញាតិក៏បញ្ជូនជនរងគ្រោះមកផ្ទះវិញបានមួយសន្ទុះក៏ស្លាប់តែម្តង។ ប្រភពពីគ្រួសារសពឈ្មោះ ម៉ៅ សុផល រស់នៅភូមិជ្រាវ សង្កាត់ជ្រាវបានឲ្យដឹងថា បងរបស់គាត់មានជម្ងឺវិលមុខក៏បញ្ជូនទៅពេទ្យតាព្រហ្ម នៅពេលនោះក្រុមគ្រូពេទ្យបានយកស៊ីរ៉ូមមួយផ្លោក និង ចាក់ថ្នាំចូល២អំពូល រួមក៏ព្យួរឲ្យបងប្រុសរបស់ខ្លួន មួយសន្ទុះក្រោយមកបងប្រុសរបស់គាត់ក៏មានសភាពក្អួតចង្អោររហូតទន់ដៃទន់ជើង ហើយខាងគ្លីនិកឯកជនយីហោ (មន្ទីរព្យាបាលតាព្រហ្ម)នេះបានប្រាប់ឲ្យក្រុមគ្រួសារបញ្ជូនជនរងគ្រោះទៅពេទ្យខេត្ត។លោកបន្តថា អស់រយៈពេល២ថ្ងៃខាងពេទ្យខេត្តក៏បានប្រាប់ថា អស់លទ្ធភាពព្យាបាលហើយដោយអ្នកជម្ងឺមានសភាពធ្ងន់ធ្ងរពេក។បន្ទាប់ពីបញ្ជូនមកដល់ផ្ទះមួយសន្ទុះអ្នកជម្ងឺក៏បានដាច់ខ្យល់ស្លាប់តែម្តង។ លោកបានបញ្ជាក់ថា មុនដំបូងឡើយបងប្រុសរបស់ខ្លួនមានសភាពធម្មតាប៉ុណ្ណោះ ពោលគឺ គាត់អាចជិះម៉ូតូពីក្រោយខ្ញុំបានដូចធម្មតា ប៉ុន្តែបន្ទាប់ពីគ្លីនិកតាព្រហ្ម បានព្យាបាលរួចក៏ បណ្តាលឲ្យទន់ដៃទន់ជើងដើរលែងរួចតែម្តង។លោកបញ្ជាក់ទៀតថា ករណីនេះលោកបានពិភាក្សាជាមួយបងប្អូនសាច់ញាតិរួចរាល់ហើយ ដោយសម្រេចថា មិនប្តឹងផ្តល់មន្ទីរពេទ្យតាព្រហ្មនោះទេ ដោយគាត់រវល់តែមើលបងប្រុស ហើយមិនបានប្រមូលភស្តុតាងទុកដាក់ទេ។ ជុំវិញករណីនេះដែរមន្ត្រីប៉ុស្តិនគរបាលសង្កាត់ជ្រាវម្នាក់បានឲ្យដឹងថា គ្រួសារជនរងគ្រោះមិនបានប្តឹងផ្តល់អ្វីនោះទេ ។មន្ត្រីប៉ុស្តិបានបន្តថា ជនរងគ្រោះដែលពេទ្យចាក់ថ្នាំឲ្យស្លាប់នោះមានឈ្មោះ ម៉ៅ ឡេង ភេទប្រុសអាយុ៦០ឆ្នាំមុខរបរគ្រូបង្រៀន ស្នាក់នៅភូមិជ្រាវ សង្កាត់ជ្រាវ។បច្ចុប្បន្នសាច់ញាតិក្រុមគ្រួសារបានធ្វើបុណ្យតាមប្រពៃណី។ ទាក់ទងនិងបញ្ហានេះគ្លីនិកតាព្រហ្មបានប្រាប់តាមទូរស័ព្ទនៅរសៀលថ្ងៃទី២១ខែមិនានេះថា ខាងគ្លីនិកពិតជាបានទទួលព្យាបាលអ្នកជម្ងឺម្នាក់មែន ដោយគ្រាន់តែដាក់ស៊ីរ៉ូម១កំប្លោកនិងចាក់ថ្នាំ២អំពូលតែប៉ុណ្ណោះ ហើយឃើញសភាពអ្នកជម្ងឺធ្ងន់ធ្ងរក៏យកទៅមន្ទីរពេទ្យខេត្តតែម្តង ប៉ុន្តែករណីនេះខាងគ្លីនិកបានស្នើសុំមិនឲ្យអ្នកកាសែតចុះផ្សាយផ្សាយព្រោះខ្លាចប៉ះពាល់កិត្តិយស។ ជុំវិញករណីខាងលើនេះផងដែរ លោក ក្រួស សារ៉ាត់ប្រធានមន្ទីរពេទ្យខេត្តមិនអាចសុំការបំភ្លឺបានទេដោយទូរស័ព្ទរបស់លោកនៅក្រៅតំបន់សេវា ។ គួរបញ្ជាក់ផងដែរថា កន្លែងព្យាបាលឯកជននៅក្នុងខេត្តសៀមរាបមួយចំនួនត្រូវបានពលរដ្ឋរិះគន់យ៉ាងចាស់ដៃពីភាពកំសោយ របស់អាជ្ញាធរក៏ដូចជាមន្ទីរសុខាភិបាល ៕
ព័ត៌មានជាតិ
មតិយោបល់