បាត់ដំបង៖បុរសវ័យចំណាស់ម្នាក់ត្រូវបានសមត្ថកិច្ចឃាត់ខ្លួនកាលពីវេលាម៉ោង 9 ព្រឹក នាថ្ងៃទី 23-3-15 ត្រង់ចំនុចក្នុងបរិវេណឡឥដ្ឋ ស្ថិតក្នុងភូមិបឹងរាំង ឃុំធិបតី ស្រុកគាស់ក្រឡ ខេត្តបាត់ដំបង បន្ទាប់ពីសមត្ថកិច្ចទទួលបានពាក្យបណ្តឹង ដែលបានចោទប្រកាន់ថាបានចាប់រំលោភកូនស្រីចុងរបស់ខ្លួនរហូតបានសម្រេចពីរដង កាលពីអំឡុងខែមករា ឆ្នាំ 2015 នៅក្នុងទីតាំងឡឥដ្ឋកន្លងមក ប៉ុន្តែ រឿងនេះត្រូវបានលាក់ការណ៍យ៉ាងសំងាត់ដោយសារតែមានការគំរាមសំលាប់ពីសំណាក់ឪចុង។
យោងតាមពាក្យបណ្តឹងរបស់ស្ត្រីម្នាក់ដែលត្រូវជាម្តាយមីងជនរងគ្រោះ ដែលមានឈ្មោះ ផុន ប៉ិច អាយុ 47 ឆ្នាំ រស់នៅភូមិស្ពាន ឃុំគាស់ក្រឡស្រុកគាស់ក្រឡ បានរៀបរាប់ថារឿងនេះត្រូវបានក្មួយស្រីរបស់គាត់លាក់យ៉ាងសំងាត់ដោយសារតែខ្លាចស្លាប់ ប៉ុន្តែថ្មីៗនេះបងស្រីរបស់វាបានទូរស័ព្ទពីប្រទេសថៃមកសួរសុខទុក្ខទើបក្មួយស្រីវាហ៊ាននិយាយប្រាប់ការពិតអំពីរឿងដែលឪពុកចុងមានចិត្តអប្រីយ៍ហ៊ានចាប់រំលោភនាងរហូតបានសម្រេចពីរដងក្នុងយប់តែមួយ កាលពីក្នុងអំឡុងខែមករាកន្លងទៅប្រហែលពីរខែមកនេះ ។ក្រោយពីទទួលបានដំណឹងដ៏អកុសលបែបនេះភ្លាមបងស្រីរបស់វាដែលរស់នៅឯប្រទេសថៃ បានទូរស័ព្ទមកប្រាប់គាត់ឲ្យដាក់ពាក្យបណ្តឹងទៅសមត្ថកិច្ច ព្រោះបើសង្ឃឹមម្តាយវាគឺគ្មានប្រយោជន៍ទេ ដោយសារតែបច្ចុប្បន្នម្តាយក្មេងស្រីរងគ្រោះកំពុងមានជំងឺប្រចាំកាយដេកនៅនឹងកន្ទេលទៅហើយ ទើបគាត់សម្រេចចិត្តប្តឹងតែម្តង។
តាមការឆ្លើយបំភ្លឺរបស់នារីរងគ្រោះឈ្មោះ ភឿក គង្គារ អាយុ 15 ឆ្នាំ រស់នៅភូមិសំបុកអក ឃុំកំពងព្រៀង ស្រុកសង្កែ បានរៀបរាប់ថា នៅខែសីហា ឆ្នាំ2014 រូបនាងនិងក្រុមគ្រួសារ ក្នុងនោះមានរូបនាង ឪពុកចុងរបស់នាង ម្តាយនាង និងប្អូនប្រុសរបស់នាង បាននាំគ្នាទៅស៊ីឈ្នួលធ្វើការក្នុងឡឥដ្ឋមួយកន្លែងស្ថិតក្នុងភូមិបឹងរាំង ឃុំធិបតី ដើម្បីយកប្រាក់ទៅទប់ទល់ក្នុងជីវភាពប្រចាំថ្ងៃ។
នារីរងគ្រោះបានរៀបរាប់បន្តថា លុះនៅក្នុងអំឡុងខែមករា ឆ្នាំ 2015 គឺនៅយប់មួយនោះ រូបនាងត្រូវបានទទួលនូវការគំរាមយ៉ាងខ្លាំងពីសំណាក់ឪពុកចុងរបស់នាង ដោយសារតែគាត់បានលបចូលមកចាប់នាងរំលោភទាំងកម្រោល ហើយបើនាងហ៊ានយករឿងនេះទៅនិយាយប្រាប់គេនោះ គាត់នឹងអារ កសំលាប់នាងចោល ទីបំផុតរាងកាយរបស់នាងត្រូវបានខ្ទេចខ្ទីរហូតដល់ទៅពីរដងក្នុងយប់តែមួយគឺកាត់បានរំលោភរហូតបានសម្រេច។
ចាប់តាំងពីពេលនោះមកនាងសុខចិត្តខាំមាត់លេបថ្ម លេបគ្រួសមិនហ៊ាននិយាយប្រាប់អ្នកណាក្រៅពីម្តាយរបស់ខ្លួនឡើយប៉ុន្តែអ្វីៗក៏ត្រូវខកបំពងទាំងអស់ដោយសារតែម្តាយនាងមានជំងឺ ទៀចទឹក ដេកនៅតែនឹងកន្ទេល និងរស់ដោយសារតែប្តីជាអ្នករកស៊ីចិញ្ចឹម ទើបគាត់មិនហ៊ានរករឿងទៅលើស្វាមីឡើយ ដែលទុកឲ្យរឿងនេះកប់បាត់ស្ងាត់ឈឹងនៅក្នុងស្បៃអន្ធកាល។
ក្នុងទឹកមុខដ៏ស្រងូតស្រងាត់ នារីរងគ្រោះបានបន្ថែមថា ទីបំផុតរឿងនេះក៏ត្រូវបានផ្ទុះឡើង
ក្រោយពេលដែលបងស្រីរបស់នាងបានទូរស័ព្ទមកសួរសុខទុក្ខ ហើយនាងក៏បានទំលាយអាថ៌កំបាំង នេះឡើងដើម្បីបន្ធូរនូវភាពតានតឹងពីក្នុងទ្រូងដែលនាងខំលាក់ទុកជាយូរមកហើយ។
នៅពេលសមត្ថកិច្ចចុះទៅដល់គឺជនសង្ស័យមិនបានគេចខ្លួនទៅទីណានោះទេ ដោយសារតែ គេស្មានមិនដល់ថាអាចមានរឿងបែបនេះកើតឡើង ដោយនៅចំពោះមុខសមត្ថកិច្ចជនសង្ស័យដែលត្រូវជាឪពុកចុងឈ្មោះ ផៃ ម៉ាន់ អាយុ 57 ឆ្នាំ រស់នៅភូមិសំបុកអក បានសារភាពថា ខ្លួនពិតជាបានរំលោភទៅលើកូនស្រីរបស់ខ្លួនចំនួនពីរដងមែន ដោយការរំលោភនេះគឺបានសម្រេចទាំងពីរលើកផងដែរ។
ក្រោយពីទទួលបានចម្លើយសារភាពរួចមក សមត្ថកិច្ចកំពុងរៀបចំសំណុំរឿងដើម្បីបញ្ជូនខ្លួនជនសង្ស័យទៅកាន់សាលាដំបូងហើយ ដើម្បីចាត់ការទៅតាមផ្លូវច្បាប់៕
ព័ត៌មានជាតិ
មតិយោបល់