ជាផ្នែកមួយនៃកិច្ចខិតខំប្រឹងប្រែងបន្តរបស់ខ្លួន ក្នុងនាមជាដៃគូយុទ្ធសាស្ត្ររបស់ប្រទេសកម្ពុជា ក្នុងការអភិវឌ្ឍវិស័យព័ត៌មានវិទ្យា ក្រុមហ៊ុន Huawei បានឧបត្ថម្ភសិក្ខាសាលាមួយរួមគ្នាជាមួយក្រុមហ៊ុន Smart ក្រសួងប្រៃសណីយ៍ និងទូរគមនាគមន៍ សហភាពទូរគមនាគមន៍អន្តរជាតិ (ITU) និងក្រសួងព័ត៌មាន នូវចំនួនហ្វ្រេកង់ 700 មេហ្គាហឺត សម្រាប់បណ្តាញ LTE ដែលប្រារព្ធធ្វើនៅសណ្ឋាគារសូហ្វីតែល ភូគីត្រា ភ្នំពេញ កាលពីថ្ងៃទី 27 ខែមេសាកន្លងទៅនេះ។ សិក្ខាសាលាដ៏ធំនេះ មានវត្តមានចូលរួមពីឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក Francois Rancy ប្រធានផ្នែករលកវិទ្យុនៃសហភាពទូរគមនាគមន៍អន្តរជាតិ លោក Shawn Yu ប្រធាននាយកដ្ឋានផែនការអភិវឌ្ឍរលកវិទ្យុ និងហ្វ្រេកង់របស់ក្រុមហ៊ុន Huawei និងលោក Mr. Thomas Hundt អគ្គនាយកក្រុមហ៊ុន Smart Axiata ប្រចាំនៅកម្ពុជា។
បើយោងតាម ប្រសាសន៍របស់ ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ កម្ពុជាបានលើកឡើងថា៖ «កត្តាចម្បងទី1ផ្អែកលើនិន្នាការចម្បង និងឥរិយាបថអតិថិជនដែលប្រើអ៊ីនធើណេតតាមផ្ទះ និងតាមទូរស័ព្ទដៃ។ អ្នកទាំងអស់គ្នាអាចសម្គាល់បានថា វិស័យឌីជីថល និងទិន្នន័យធំៗ គឺជាបញ្ហាក្តៅដែលនឹងត្រូវលើកយកទៅពិភាក្សាក្នុងសិក្ខាសាលា និង GSMA នាចុងឆ្នាំ2015នេះ។ កត្តាចម្បងទី2 ការសម្រេចចិត្តស្តីអំពី WRC-12 ដើម្បីបែងចែក 694-790 Mhz ban ទៅផ្នែកសេវាកម្មទូរស័ព្ទចល័តក្នុងតំបន់1 (លើកលែង aeronautical mobile) នឹងជួយបើកផ្លូវសម្រាប់ការតភ្ជាប់ដោយទូលាយ និងកាន់តែរលូននៃតំណភ្ជាប់បច្ចេកវិទ្យា 700, 800, 900 Mhz bans សម្រាប់ទូរគមនាគមន៍ទូរស័ព្ទចល័តជាអន្តរជាតិ (International Mobile Telecommunications – IMT) ។ កត្តាចម្បងទី3 ភាគលាភផ្នែកឌីជីថល គឺជាកត្តាដ៍សំខាន់ក្នុងការជំរុញការរីកចម្រើនសេដ្ឋកិច្ច និងបំពេញនូវតម្រូវការដ៏ឆាប់រហ័សធៀបនឹងតម្រូវការសព្វថ្ងៃនេះ។»
លោក Shawn Yu ប្រធាននាយកដ្ឋានផែនការអភិវឌ្ឍរលកវិទ្យុ និងហ្វ្រេកង់របស់ក្រុមហ៊ុន Huawei ក៏បានលើកឡើងផងដែរថា៖ «APT700 គឺជាវិធីដ៏ឆាប់រហ័សមួយដើម្បីឈ្នះ MBB នាពេលអនាគតដ៏ខ្លីខាងមុខដែលនឹងមានប្រតិបត្តិករកាន់តែច្រើនជ្រើសរើសយក APT700 ។ យើងសង្ឃឹមថា APT700 នឹងក្លាយជាជម្រើសថ្មីនៅក្នុងទីផ្សារទូរគមនាគមន៍កម្ពុជា»។
ចាប់តាំងពីការដំឡើងមាត្រដ្ឋាននៃរលកអាកាស APT700 MHz ទៅជា Band 28 ដោយ 3GPP ក្រុមហ៊ុនលក់បន្ទះឈីប និងហេដ្ឋារចនាសម្ព័ន្ធ ដូចជា Huawei, Qualcomm និងប្រតិបត្តិករទូទាំងពិភពលោកបានបង្ហាញការប្តេជ្ញាចិត្ត និងចំណាប់អារម្មណ៍របស់ខ្លួនជាបន្តបន្ទាប់។ APT700 អាចផ្តល់ការគ្របដណ្តប់នៅក្នុងទីក្រុង និងការជ្រៀតចូលបានល្អបំផុត ដែលមានន័យថា វាជាវិធីដែលមានប្រសិទ្ធភាពស័ក្តិសមនឹងតម្លៃក្នុងការដោះស្រាយបញ្ហារលកវិទ្យុ MBB ។ បច្ចុប្បន្ននេះមានប្រតិបត្តិករចំនួន៨ ដែលបានចាប់ផ្តើម បណ្តាញ LTE ដោយប្រើប្រាស់កម្រិត APT700 មានបណ្តាញពាណិជ្ជកម្មថ្មី១៥ នឹងចាប់ផ្តើមដំណើរការនៅឆ្នាំ ២០១៥ និង ការដេញថ្លៃ APT700 ជាង ២០ នឹងកើតឡើងនៅទូទាំងពិភពលោក។
លោក Kevin Weng អគ្គនាយករង ក្រុមហ៊ុន Huawei កម្ពុជា បានលើកឡើងថា៖ «ទន្ទឹមនឹងសេដ្ឋកិច្ច កម្ពុជាកំពុងបន្តរីកចម្រើនជាលំដាប់ ការអភិវឌ្ឍហេដ្ឋារចនាសម្ព័ន្ធ ICT គឺសំខាន់ណាស់ដើម្បីគាំទ្រដល់សេចក្តីត្រូវការរបស់ឧស្សាហកម្មនានា ក៏ដូចជាតម្រូវការជាលក្ខណៈបុគ្គលរបស់អតិថិជនយើង។ សិក្ខាសាលានេះ គឺជាជំហានដ៏សំខាន់ឆ្ពោះទៅរកការយល់ដឹងជាលើកដំបូង អំពីអត្ថប្រយោជន៍ដ៏សម្បូរបែបនៃហ្វ្រេកង់កម្រិត 700 មេហ្គាហឺត» ។
គួរកត់សម្គាល់ថា ក្នុងសិក្ខាសាលាដែលរៀបចំដោយក្រសួងប្រៃសណីយ៍ និងទូរគមនាគមន៍ ដែលឧបត្ថម្ភដោយ ក្រុមហ៊ុន Huawei នាពេលនេះ ក្រុមហ៊ុនក៏បានដាក់តាំងបង្ហាញ និងអញ្ជើញភ្ញៀវកិត្តិយសដែលបានចូលរួមទាំងអស់ តេស្តស្មាតហ្វូនស៊េរីថ្មីៗទំនើបៗ ដូចជា HUAWEI Mate 7 (Silver/Gold), Honor 6 plus, Honor 6, Huawei G7, Huawei 4x, Huawei Y550, Huawei Holly, Huawei Y625 ៕
មតិយោបល់