ក្នុងទឹកមុខដ៏ក្រៀមក្រំ ពិការដៃពិការជើងអង្គុយក្បែរជើងភ្នំបាណន់ ក្មេងប្រុស ឈ្មោះ វិច្ឆិកា បាននិយាយរដិបរដុបថា ខ្លួនមិនបានទៅរៀនដូចគេដូចឯងនោះទេ ដោយសារតែជីវភាពគ្រួសារក្រលំបាក ទើបមកសុំទាននៅជើងភ្នំនេះ គ្រាន់នឹងចិញ្ចឹមជីវិត ។
ភ្ញៀវទេសចរណ៍ជាច្រើន ដែលទៅលេងកម្សាន្ត នៅភ្នំបាណន់ ក្នុងទឹកដីបាត់ដំបង ជាច្រើន ប្រាកដជាបានឃើញ ក្មេងប្រុសពិការដៃ ពិការជើង ឈ្មោះ វិច្ឆិកាអង្គុយក្បែរកាំជណ្តើរជើងភ្នំ ក៏ប៉ុន្តែយើងសង្កេតឃើញថា ភ្ញៀវទេសចរណ៍ទាំងនោះ ភាគច្រើនដើរហួស សូម្បីតែមួយកាក់មួយសេន ក៏មិនដាក់ឲ្យដែរ ។
កុមារ វិច្ឆិកា បានប្រាប់ថា ជារៀងរាល់ថ្ងៃខ្លួនមកអង្គុយសុំទាននៅទីនេះ ដោយថ្ងៃខ្លះបាន ថ្ងៃខ្លះក៏អត់បាន ដើម្បីយកទៅផ្គត់ផ្គង់គ្រួសារ ។ ក្មេងប្រុសអាយុ ៨ ឆ្នាំរូបនេះ បានបន្តថា ម្តាយឪពុករបស់ខ្លួន ជាកម្មករសំណង់ រស់នៅក្បែរជើងភ្នំនេះ ដោយខ្វះខាតជាទីបំផុត ។
អ្នកលក់ម្នាក់នៅជើងភ្នំ សូមមិនបញ្ចេឈ្មោះ បានប្រាប់ថា គ្រួសារក្មេងប្រុសនេះ ក្រលំបាកខ្លាំងណាស់ ហើយក្មេងប្រុសរូបនេះក៏មិនបានទៅរៀនដូចគេដែរ ដោយមកសុំទាននៅជើងភ្នំជារៀងរាល់ថ្ងៃ ហេតុដូច្នោះ សូមសម្បុរសជន ជួយសម្លឹងឃើញផង ៕
ព័ត៌មានជាតិ
មតិយោបល់