Post News Media ព័ត៌មានជាតិ រដ្ឋាភិបាលកាណ...

រដ្ឋាភិបាលកាណាដា ត្រៀមថវិកាជាងពីរពាន់លានដុល្លារ សម្រាប់ជួយដល់ប្រទេសក្រីក្រ ដែលរងការប៉ះពាល់ដោយបម្រែបម្រួលអាកាសធាតុ

ភ្នំពេញ: នៅក្នុងជំនួបសំដែងការគួរសមនិងពិភាក្សាការងារ ជាមួយសម្តេចអគ្គមហាសេនា​បតីតេជោ ហ៊ុន សែន នាយករដ្ឋមន្ត្រីកម្ពុជា នៅវិមានសន្តិភាព កាលពីព្រឹកថ្ងៃទី២ខែកញ្ញានេះ លោក ស្តេហ្វេន ឌីអន ( Stephane Dion) រដ្ឋមន្ត្រីការបរទេសកាណាដា បានបញ្ជាក់ថា ប្រទេសកាណាដា បានត្រៀមថវិកា​ចំនួនពីរពាន់ ប្រាំមួយលានដុល្លារអាមេរិក (២០០៦លាន) ដើម្បីជួយដល់ប្រទេសក្រីក្រ ដែលរងផលប៉ះពាល់​ដោយ​​ការប្រែប្រួលអាកាសធាតុ។

ទន្ទឹមនេះ រដ្ឋាភិបាលកាណាដា ក៏កំពុងយកចិត្តទុកដាក់យ៉ាងខ្លាំង ជាមួយប្រទេសកម្ពុជា ទៅលើការផ្លាស់ប្តូរអា​កាស​ធាតុនេះដែរ។ នេះបើតាមការឲ្យដឹងពី លោក អ៊ាង សុផ្លែត ជំនួយការផ្ទាល់សម្តេចតេជោ នាយករដ្ឋមន្ត្រី នៅក្រោយ ជំនួបពិភាក្សាការងារនេះ។

លោក អ៊ាង សុផល្លែត បានឲ្យដឹងដែរថា រដ្ឋាភិបាលកាណាដា ក៏កំពុងយកចិត្តទុកដាក់ និងជំរុញការវិនិយោគ លើវិស័យធានារ៉ាប់រង វិស័យព័ត៌មានវិទ្យា វិស័យគ្រប់គ្រងទឹក និងបញ្ហាបរិស្ថានផងដែរ ។ នៅក្នុងជំនួបនេះ សម្តេចតេជោ ហ៊ុន សែន បានថ្លែងអំណរគុណចំពោះ រដ្ឋមន្ត្រីការបរទេសកាណាដា ជាពិសេសរដ្ឋាភិបាល​និងប្រ​ជា​ជនកាណាដាតែម្តង ដែលកន្លងមកបានចូលរួមចំណែក ក្នុងការស្វែងរកសន្តិភាព និងការអភិវឌ្ឍន៍សម្រាប់​ប្រ​ទេសកម្ពុជា។

សម្តេចតេជោ បានបញ្ជាក់ថា ឆ្នាំនេះកម្ពុជាបានរងការប៉ះពាល់ជាច្រើនដោយគ្រោះធម្មជាតិ រាំងស្ងួត ខ្យល់កន្ត្រាក់ និង រន្ទះបាញ់ជាដើម។ ដូចនេះ កម្ពុជា កំពុងស្វែងរកវិធី និងធ្វើការងារ ដើម្បីបន្ស៊ាំទៅនឹងការប្រែប្រួល​អាកាស​ធាតុនេះ។ ក្នុងន័យនេះ សម្តេចតេជោ បានស្នើឲ្យប្រទេសកាណាដា ជួយដល់កម្ពុជា លើវិស័យនេះ និងបាន​ស្នើ សុំឲ្យបណ្តារប្រទេសអភិវឌ្ឍន៍ទាំងឡាយ មានការទទួលខុសត្រូវកាន់តែខ្ពស់ថែមទៀត ជាមួយនឹងការប្រែ ប្រួល​អាកាសធាតុ ស្របពេលដែលប្រទេសទាំងនោះ កំពុងប្រើប្រាស់ធនធានធម្មជាតិ ដើម្បីជំរុញការអភិវឌ្ឍន៍​ប្រ​ទេស របស់ខ្លួន ។ដោយឡែក សម្តេចតេជោក៏បានស្នើប្រទេសកាណាដា ជួយដល់មជ្ឈមណ្ឌលមីនអាស៊ាន នៅ កម្ពុជាផងដែរ។

សូមបញ្ជាក់ថា ដំណើរទស្សនកិច្ចនៅកម្ពុជា របស់លោក ស្តេហ្វេន រដ្ឋមន្ត្រីការបរទេសកាណាដា គឺក្នុងគោល​បំណង ពង្រឹងភាពជាដៃគូ រវាងប្រទេសទាំងពីរឲ្យកាន់តែរឹងមាំថែមទៀត៕

រដ្ឋាភិបាលកាណាដា

រដ្ឋាភិបាលកាណាដា

រដ្ឋាភិបាលកាណាដា