ភ្នំពេញ៖ នៅព្រឹកថ្ងៃទី១៦ ខែវិច្ឆិកា ឆ្នាំ២០១៥នេះ កម្លាំងសមត្ថកិច្ច និងអាជ្ញាធរ ខណ្ឌទួលគោក ដឹកនាំដោយ ព្រះរាជអាជ្ញារង វង្ស ប៊ុនពិសិដ្ឋ ចុះអនុវត្តសាលក្រម រឹបអូសយកផ្ទះលេខ ៦២E0E1E2 តាមផ្លូវលេខ៥៩៨ សង្កាត់បឹងកក់ទី២ ខណ្ឌទួលគោក ស្រាប់តែភាគីចុងបណ្តឹងចង់ដុតសម្លាប់ ខ្លួន ដែលធ្វើឲ្យសមត្ថកិច្ចពិបាកក្នុងការចាត់ការ និងផ្អាក់សកម្មភាពតែម្តង ។
សមត្ថកិច្ចបានប្រាប់ឲ្យដឹងថា ភាគីដើមបណ្តឹងមានឈ្មោះ ឡៅ ស៊ុនប៉ា រីឯភាគីម្ចាស់ផ្ទះ ដែលជាចុងបណ្តឹងមានឈ្មោះ យិន សុវណ្ណនី ។
ដើមហេតុដែលធ្វើឲ្យមានការរឹមអូសយកផ្ទះនេះ គឺមកពីខាងចុងបណ្តឹងបានខ្ចីលុយពីដើមបណ្តឹងចំនួន ១៨ម៉ឺនដុល្លារ ហើយមិនសង ។ រឿងនេះដែរ ត្រូវបានលោក ឡៅ ស៊ុនប៉ា ដើមបណ្តឹងបានប្តឹងទៅតុលា ហើយឈ្នះក្តីទាំង០៣ថ្នាក់ តែភាគីចុងបណ្តឹងនៅតែមិនសង ទើបតុលាការចេញសាលក្រមយកផ្ទះទៅលក់ឡៃឡុងតែម្តង។
បើតាមសម្តីចុងបណ្តឹង យិន សុវណ្ណនី បានប្រាប់ថា កន្លងមកគាត់បានសងប្រាក់ចំនួន ២៩ម៉ឺនដុល្លារ ទៅឲ្យភាគីម្ខាងទៀត ហេតុអ្វីក៏មកនៅតែរឹបអូសយកផ្ទះគាត់យ៉ាងដូច្នោះទៀត ។
ករណីរឹមអូសបែកផ្សែងនេះដែរ វាបានអូសបន្លាយឲ្យមានភាពតានតឹង រហូតដល់ចុងបណ្តឹង យិន សុវណ្ណនី ប្រឹងចាក់សាំង ដុតកង់ឡាន និងប៉ងសម្លាប់ខ្លួន តែត្រូវសមត្ថកិច្ចយកចេញទាន់ ហើយរឿងរឹមអូសផ្ទះនេះដែរ ត្រូវបានផ្អាកព្រោះម្ចាស់ផ្ទះមិនព្រមឡើយ៕
មតិយោបល់