បាតុកម្មប្រឆាំង រដ្ឋប្រហារយោធាភូមា ដែលមួយចំនួន នាំមុខដោយព្រះសង្ឃភូមា បានផ្ទុះឡើងនៅភូមិ ក្រុងជាច្រើន ពេញផ្ទៃប្រទេសភូមា នៅថ្ងៃអាទិត្យ។ បាតុកម្ម ទ្រង់ទ្រាយធំ ក្នុងប្រទេស កើតមានជួនចំពេលនឹងបាតុកម្មរបស់សហគមន៍ភូមា នៅទឹកដីបរទេស ដែលនៅក្នុងនោះ មានផងដែរ តៃវ៉ាន់។
នៅក្នុងប្រទេសភូមា នៅក្នុងចំណោម មនុស្ស៥នាក់ ដែលស្លាប់ដោយសារការបាញ់ប្រហារ បង្រ្កាបរបស់កងទ័ពភូមា មាន២នាក់ នៅតំបន់ភាគកណ្តាលប្រទេស ២នាក់ នៅរដ្ឋស្ហាន ភាគឦសានភូមា ជាប់ជាមួយប្រទេសថៃ និង១នាក់ទៀត នៅរដ្ឋកាឈីន ជាប់ព្រំដែនចិន។
ចាប់តាំងពីកើតមានបាតុកម្មប្រឆាំងរដ្ឋប្រហារយោធា ភូមា កាលពី ៣ខែមុន កងទ័ពភូមា បានធ្វើការបង្រ្កាប បាញ់គ្រាប់កាំភ្លើងពិត សម្លាប់បាតុករភូមា យ៉ាងតិច ៧៥៩នាក់។ នៅបីខែមកនេះ កងទ័ពភូមាបានជាប់ដៃប្រយុទ្ធផងដែរ ជាមួយ ពួកឧទ្ទាមទ័ពព្រៃ ការ៉ែន ដែលមានអំណាចគ្រប់គ្រងតំបន់ការ៉ែន នៅភាគខាងកើត ជាប់ប្រទេសថៃ។
ពួកឧទ្ទាមការ៉ែន ក្រោមឈ្មោះថា សហភាពជាតិការ៉ែន ដែលចេញមុខប្រយុទ្ធ វាយដណ្តើមបន្ទាយទាហានភូមា ដើម្បី បុព្វហេតុ គាំទ្រការទាមទាររបស់បាតុករភូមា បានអះអាងថា នៅមួយរយ:ចុងក្រោយនេះ មានពួកក្រុមប្រឆាំងភូមា ជាង ២ពាន់នាក់ ដែលបានរត់ភៀសខ្លួនពីការយាយីធ្វើបាបរបស់កងទ័ព ដើម្បី ចូលរួមក្នុងក្រុមខ្លួន។
នៅថ្ងៃអាទិត្យ ពួកឧទ្ទាមការ៉ែន បានអំពាវនាវឲ្យចលនាតស៊ូជនជាតិភាគតិចផ្សេងទៀត ក្នុងរដ្ឋការ៉ែន ចូលរួមកម្លាំងជាមួយក្រុមខ្លួន ដើម្បីប្រយុទ្ធប្រឆាំងនឹងកងទ័ពភូមា។
នៅក្នុងលិខិតផ្ញើទៅកាន់ក្រុមឧទ្ទាមដទៃទៀត អ្នកទទួលខុសត្រូវកងទ័ពការ៉ែន លោក Baw Kyaw Heh បានបញ្ជាក់ថា “នៅក្នុងបដិវត្តជាង៧០ឆ្នាំ នេះជាឱកាសដ៏ល្អ ដែលគេត្រូវឆក់ចាប់ឲ្យបាន ដើម្បីប្រយុទ្ធផ្តួលរំលំរបបផ្តាច់ការយោធាភូមា”។
ភូមាមានក្រុមឧទ្ទាមជនជាតិភាគតិច ចំនួន ១៣៥ ដែលគ្រប់គ្រង មួយភាគបីនៃទឹកដីភូមា។ ចាប់តាំងពីភូមាទទួលបានឯករាជ្យ រួចផុតពីអាណានិគមអង់គ្លេស ឆ្នាំ ១៩៤៨ ការប្រយុទ្ធគ្នារវាង កងទ័ពភូមា និងពួកឧទ្ទាមគ្រប់ជនជាតិ បានផ្ទុះឡើង យ៉ាងតិច ២០ដង។ បន្ទាប់ពីស្ងាត់មអស់ប៉ុន្មានឆ្នាំ ទៅតាមកិច្ចព្រមព្រៀងស្តីពីបទឈប់បាញ់រវាងភាគីជម្លោះទាំងពីរ ការប្រយុទ្ធគ្នាបានកើតឡើងវិញ ចាប់តាំង ពីខែមីនា នៅក្រោយ ក្រុមឧទ្ទាមការ៉ែនចេញមុខ គាំទ្រ ក្រុមបាតុករភូមា ដែលរងការបង្រ្កាបហិង្សា ពីសំណាក់កងទ័ពភូមា៕
ប្រភព៖ RFI
មតិយោបល់