ក្រុមជើងឯកអាល្លឺម៉ង់ Bayern Munich បានសម្រេចក្នុងការនាំយកខ្សែការពារស្លាបឆ្វេង Omar Richard ពីក្លិបអង់គ្លេស Reading ដោយគ្មានតម្លៃផ្ទេរ។ កីឡាករវ័យ ២៣ឆ្នាំដែលចេញពីថ្នាលយុវជនរបស់ Reading កាលពីឆ្នាំ២០១៤ បានឡើងមកលេងក្រុមធំនៅឆ្នាំ២០១៧ និងបានបង្ហាញខ្លួនសរុប ១០៦លើកមកដល់ពេលនេះ។
Richard ថ្មីៗនេះបានបដិសេធមិនបន្តកិច្ចសន្យាជាមួយ Reading ឡើយ ដែលធ្វើឲ្យគេនឹងផ្លាស់មកកាន់ Bayern Munich នៅរដូវក្តៅខាងមុខ ក្រោយឈានដល់កិច្ចព្រមព្រៀងកិច្ចសន្យាដល់ឆ្នាំ២០២៥។ Omar Richard នឹងប្រជែងតំណែងជួរមុខជាមួយខ្សែការពារស្លាបឆ្វេង Alphonso Davies។
Bayern Munich កំពុងស្វែងរកកីឡាករពង្រឹងតំបន់ការពាររបស់ខ្លួន បន្ទាប់ពីការចាកចេញរបស់ David Alaba និង Jerome Boateng តែខ្សែការពារកណ្តាល Dayot Upamcano នឹងផ្លាស់ពី Leipzig មកកាន់ Bayern Munich ក្នុងតំលៃប្រមាណជិត ៤០លានផោន៕
មតិយោបល់