​ខ្សែបំរើ Manchester City, Kevin de Bruyne បាន​ក្លាយជា​ម្ចាស់​ពាន​កីឡាករ​ឆ្នើម​បំផុត​ប្រចាំឆ្នាំ​របស់ PFA ពីរ​រដូវ​កាល​ជាប់​គ្នា ​ក្រោយ​ជួយ​ក្រុម​ឈ្នះ​ជើងឯក English Premier League​។

មិត្ត​រួម​ក្រុម Phil Foden ក៏​ឈ្នះ​ពាន​កីឡាករ​យុវជន​ឆ្នើម​បំផុត​ផងដែរ​របស់ PFA​។​ កីឡាករ​ទាំងពីរ​គឺជា​សមាជិក​សំខាន់​របស់ Manchester City ដែល​ឈ្នះ​ពាន Premier League ៣លើក ក្នុង ៤រដូវ​កាល​ចុងក្រោយ​រួមជាមួយ​នឹង​ពាន Carabao Cup ផងដែរ​។​

​Kevin de Bruyne បាន​ក្លាយជា​កីឡា​ករទី២ ដែល​ឈ្នះ​ពាន​កីឡាករ​ឆ្នើម​របស់ PFA ២រដូវ​កាល​ជាប់​គ្នា​បន្ទាប់ពី Cristiano Ronaldo ដែល​ធ្វើបាន​ដូចគ្នា​កាល​នៅ Manchester United​។​ ​កីឡាករ​ជំរើសជាតិ​ប៊ែ​ល​ហ្ស៊ិ​ក​រូបនេះ​រកបាន ៦គ្រាប់​នៅ Premier League និង​បញ្ជូន ១២លើក​ក្នុងការ​បង្ហាញខ្លួន​លើ​ទីលាន​សរុប ២០០១នាទី​។

​Kevin de Bruyne ជា​សមាជិក​សំខាន់​ដែល​នាំ Manchester City ឡើង​វគ្គ​ផ្តាច់ព្រ័ត្រ UEFA Champions League លើកដំបូង​តែ​ចាញ់ Chelsea និង​ថែមទាំង​មាន​របួស​ច្រមុះ និង​ភ្នែក​ តែ​អាច​រួម​ដំណើរ​ជាមួយ​ក្រុម​ប៊ែ​ល​ហ្ស៊ិ​កបានក្នុង​ព្រឹត្តិការណ៍ Euro ២០២០៕