រលកយក្សចម្លងកូវីដលើកទី៣ កំពុងបោកបក់ទៅលើប្រេស៊ីលដែលជាប្រទេសដ៏ធំមួយនៅអាមេរិកខាងត្បូង។ ការឆ្លងរាតត្បាតកូវីដ១៩ នៅតែមានសន្ទុះខ្លាំង ហើយបើតាមរដ្ឋមន្រ្តីក្រសួងសុខាភិបាលប្រេស៊ីល លោក ម៉ាសេឡូ កេរ៉ូហ្គា (Marcelo Queiroga) រហូតមកទល់នឹងពេលនេះ មនុស្សចំនួនជាង ៥ សែននាក់បានបាត់បង់ដោយសារជំងឺកូវីដ។
កាលពីថ្ងៃសៅរ៍ ទី១៩ មិថុនាម្សិលមិញ អាជ្ញាធរសុខាភិបាលប្រេស៊ីលបានរាយការណ៍ថាក្នុងចំណោមអ្នកស្លាប់ចំនួន ៥សែន ៨ រយនាក់ មាន ២ ៤០១ នាក់ បានស្លាប់ក្នុងរយ:ពេល ២៤ ចុងក្រោយ។ នេះគឺជាអត្រាដ៏ច្រើន ក៏ប៉ុន្តែក្រុមអ្នកជំនាញបានលើកឡើងថាចំនួនអ្នកស្លាប់ពិតជាក់ស្តែងមានច្រើនជាងនេះទៅទៀត។
នៅសប្តាហ៍នេះ ចំនួនមធ្យមនៃអ្នកស្លាប់ប្រចាំថ្ងៃដោយសារកូវីដមានលើសពី ២ ពាន់នាក់ ជាលើកដំបូងចាប់តាំងពីសប្តាហ៍ទី២ខែឧសភាមក។ លោក Ethel Maciel អ្នកជំនាញខាងជំងឺរាតត្បាតម្នាក់មកពីសាកលវិទ្យាល័យមួយរបស់ប្រេស៊ីលបានប្រាប់ទីភ្នាក់ងារព័ត៌មាន AFP ថារលកចម្លងយក្សកូវីដទីបីមកដល់ប្រេស៊ីលហើយ ហើយវាកំពុងធ្វើឲ្យកើនឡើងនូវចំនួនអ្នកឆ្លងនិងអ្នកស្លាប់នៅក្នុងប្រទេសអាមេរិកខាងត្បូងមួយនេះ។
ក្រុមអ្នកជំនាញបានបង្ហាញក្តីបារម្ភខ្លាំងចំពោះស្ថានភាពកូវីដនៅប្រេស៊ីលថាអាចនឹងមានសភាពកាន់តែអាកក្រក់ទៅៗ ពីព្រោះថាការចាក់វ៉ាក់សាំងបង្ការកូវីដមានភាពយឺតយ៉ាវខ្លាំង។ ជាក់ស្តែង រហូតមកទល់នឹងពេលនេះមានតែមនុស្សពេញវ័យចំនួនត្រឹមតែ ១៥ % ប៉ុណ្ណោះ ដែលបានទទួលការចាក់ថ្នាំបង្ការកូវីពេញលេញ។ នេះ បើតាមវិទ្យាស្ថានសុខភាព Fiocruz។
ប្រធានាធិបតីប្រេស៊ីលលោកហ្សាអៀរ បុលសូណារ៉ូ បានរងការរិះគន់យ៉ាងខ្លាំងចំពោះការមិនព្រមចាត់វិធានថ្នាក់ជាតិតឹងរ៉ឹងដើម្បីទប់ស្កាត់ការឆ្លងរីករាលដាលកូវីដ។ មានមតិជាច្រើនបានលើកឡើងថាស្ថានភាពកូវីដនៅប្រេស៊ីលមិនអាចល្អប្រសើរឡើង ពីព្រោះតែលោកប្រធានាធិបតីនៅបដិសេធមិនព្រមដាក់ចេញនូវវិធានការដូចជា ការបិទខ្ទប់ប្រទេស រក្សាគម្លាតសង្គម និងកាតព្វកិច្ចពាក់ម៉ាស់ជាដើម។ល។
ចំណែកលោកប្រធានាធិបតី បុលសូណារ៉ូវិញបានលើកឡើងថា ផលប៉ះពាល់សេដ្ឋកិច្ចបណ្តាលមកពីការបិទខ្ទប់ប្រទេស គឺធ្ងន់ធ្ងរខ្លាំង ជាងផលប៉ះពាល់បង្កឡើងដោយជំងឺកូវីដ១៩ទៅទៀត។ បន្ថែមលើនេះ លោកបានសង្កត់ធ្ងន់ថា លោកបានប្រឹងប្រែងអស់ពីសមត្ថភាពហើយក្នុងការទិញវ៉ាក់សាំងប្រឆាំងកូវីដពីប្រទេសមួយចំនួនដើម្បីយកមកចាក់ជូនប្រជាជន៕
មតិយោបល់