(អាត្លង់តា)៖ ខ្យល់ព្យុះត្រូពិកឈ្មោះ Claudette បានផ្ដាច់ជីវិតមនុស្ស ១២នាក់នៅក្នុងរដ្ឋ Alabama ដោយវាបានបោកបក់ឆ្លងកាត់ភាគអាគ្នេយ៍សហរដ្ឋអាមេរិក និងបានបង្កឱ្យកើតមានព្យុះកួចកំណាច Torndoes ដែលនាំមកជាមួយគ្រោះទឹកជំនន់បំផ្លាញផ្ទះសម្បែងរាប់សិបខ្នងផងដែរ។
ខ្យល់ព្យុះកួចដ៏កំណាច Torndoes ដែលត្រូវបានបង្កឡើង នៅក្នុងកំឡុងពេលកើតមានខ្យល់ព្យុះត្រូពិក Claudette បានធ្វើឱ្យមនុស្ស ១០នាក់ស្លាប់ កាលពីចុងសប្ដាហ៍កន្លងទៅ (ពេលវេលានៅអាមេរិក) នៅក្នុងគ្រោះថ្នាក់ចរាចរណ៍ដ៏សាហាវមួយនៅចម្ងាយប្រហែល ៥៥គីឡូម៉ែត្រពីភាគខាងត្បូងនៃទីក្រុង ម៉ុនហ្គោម៉ឺរី (Montgomery) រដ្ឋ Alabama ខណ:មនុស្សជាច្រើនទៀតបានរងរបួស។ ចំណែកឯ មនុស្ស ២នាក់ទៀតដែលរស់នៅទីក្រុង Tuscaloosa រដ្ឋ Alabama ក៏បានស្លាប់ផងដែរ ដោយសារដើមឈើរលំសង្កត់។
ករណីស្លាប់នេះបានកើតឡើងនៅពេលមានភ្លៀងធ្លាក់ខ្លាំង នៅភាគខាងជើងនៃរដ្ឋ Alabama និងរដ្ឋ ចរចៀ (Georgia) កាលពីល្ងាចថ្ងៃសៅរ៍សប្ដាហ៍មុន។ ទឹកភ្លៀងប្រហែល ៣០សង់ទីម៉ែត្រ ត្រូវបានគេរាយការណ៍នៅតាមបណ្តោយឈូងសមុទ្ររដ្ឋ មីស៊ីស៊ីពពី (Mississippi)៕
ប្រភព៖ AP
មតិយោបល់