មេរោគកូវីដបំប្លែងខ្លួន “ដែលតា” ដ៏មហាឆ្លងដែលកំពុងរាតត្បាតចម្លងខ្លាំងនិងដែលគួរឱ្យព្រួយបារម្ភខ្លាំងពិសេសតែម្តង។ លេចឡើងជាដំបូងនៅប្រទេសឥណ្ឌា “ដែលតា” ជាមេរោគកូវីដបំប្លែងដែលឆ្លងខ្លាំងជាងបំផុតគ្មានប្រៀប កំពុងតែបង្កឱ្យមានសន្ទុះកំណើនអ្នកឆ្លងច្រើននៅអាស៊ី អាហ្វ្រិក និងកំពុងចាប់បំប៉ោងតួលេខនៅអឺរ៉ុបនិងសហរដ្ឋអាមេរិកទៀត។ អឺរ៉ុបដែលទើបបានបិទបញ្ចប់រលកចម្លងទីបី និងមានស្ថានភាពទូទៅធូរស្បើយបន្តិច ក៏ចាប់រាប់ឃើញចំនួនអ្នកវិជ្ជមានស្ទុះឡើងជាថ្មី។
ខ្លាចមានរលកចម្លងជាលើកទីបួន រដ្ឋាភិបាលជាច្រើនបានចាប់ផ្តើមរឹតបន្តឹងវិធានការឡើងវិញ។ នៅហូឡង់ អេស្ប៉ាញ ដោយហេតុតែចំនួនអ្នកឆ្លងប្រចាំថ្ងៃបានកើនឡើងមួយជា៧ ក្នុងរយ:ពេលតែមួយសប្តាហ៍ រដ្ឋាភិបាលបានសម្រេចបិទអាហារដ្ឋាន រង្គសាលមុនទម្លាប់ នៅម៉ោង១២យប់។ ម៉ាល់ត៍ ជាប្រទេសនៅអឺរ៉ុបដំបូងគេដែលសម្រេចបិទព្រំដែនជាថ្មីមិនឱ្យទេសចរគ្មានវ៉ាក់សាំងចូល។
ប្រធានាធិបតីបារាំងត្រូវថ្លែងសុន្ទរកថាទៅកាន់ប្រជាជាតិ ស្តីពីស្ថានភាពសុខាភិបាលបង្កឡើងកូវីដ១៩ នៅចន្ទទី ១២កក្កដា តែអ្នកជំនាញវិទ្យាសាស្ត្របារាំង បានណែនាំឱ្យរដ្ឋាភិបាលបារាំងមួលខ្ចៅវិញ និងសំណូមពរឱ្យបញ្ចូលការចាក់ថ្នាំបង្ការប្រឆាំងកូវីដ១៩ ជាកាតព្វកិច្ចចាំបាច់របស់ពលរដ្ឋ។
នៅរុស្ស៊ី ចំនួនអ្នកឆ្លងនិងអ្នកស្លាប់ប្រចាំថ្ងៃ កើនឡើងបំបែកកំណត់ត្រាចាស់ជារៀងរាល់ថ្ងៃ។ កូរ៉េខាងត្បូងដែលល្បីខាងមានចំណាត់ការប្រឆាំងកូវីដ១៩ល្អជាងគេ ត្រៀមដាក់ក្រុងសេអ៊ូលក្នុងបម្រាមដ៏តឹងតែងបំផុតជាថ្មីដូចកាលផ្ទុះជំងឺរាតត្បាតដំបូង ព្រោះចំនួនអ្នកឆ្លងមានកើនឡើងខ្លាំងបំផុតបីថ្ងៃជាប់គ្នាមកហើយ។ ហុកដៃដូ ហ្វូគុស្ហ៊ីម៉ា បានសម្រេចដើរតាមគន្លងក្រុងតូក្យូ មិនអនុញ្ញាតឱ្យទស្សនជនចូលមើលការប្រកួតកីឡាអូឡាំពិកទេ៕
មតិយោបល់