លោករដ្ឋមន្ត្រីការបរទេសអាមេរិក បានឆ្លៀតរំលឹកផងដែរទៅកាន់ ក្រុមប្រទេសអាស៊ាន អំពីគោលការណ៍គ្រិះនៃធម្មនុញ្ញអាស៊ាន ដែលប្រទេសអាស៊ានត្រូវតែគោរព ទាក់ទិននឹង នីតិរដ្ឋ អភិបាលកិច្ចល្អ លទ្ធិប្រជាធិបតេយ្យ ព្រមទាំងការគោរពសិទ្ធិមនុស្ស។
សូមបញ្ជាក់ថា កាលដើមខែកក្កដានេះ រដ្ឋាភិបាលអាមេរិក បានសម្រេចដាក់ទណ្ឌកម្ម ទៅលើមនុស្សចំនួន២២នាក់ ដែលមានចំណែកពាក់ព័ន្ធជាមួយនឹងការធ្វើរដ្ឋប្រហារ របស់កងទ័ពភូមា ព្រមទាំងក្នុងការបំផ្លាញលទ្ធិប្រជាធិបតេយ្យនៅភូមា។
កាលពីថ្ងៃអង្គារ របបសឹកភូមា បានប្រកាសឲ្យដឹងអំពីបទចោទប្រកាន់ចំនួន៤ផ្សេងទៀត ទៅលើរូបលោកស្រី អ៊ុងសាន ស៊ូជី ដែលពាក់ព័ន្ធនឹងអំពើពុករលួយ។ នេះបើផ្អែកតាមការបញ្ជាក់ឲ្យដឹង ពីលោក Khin Maung Zaw ប្រធានក្រុមមេធាវី ការពារលោកស្រី។ បទចោទប្រកាន់ថ្មីទាំងនេះ នឹងត្រូវយកទៅបើកសវនាកា នៅតុលាការក្រុងម៉ាន់ដាឡេ ចាប់ពីថ្ងៃទី ២២កក្កដាទៅ។
ដោយឡែក កាលពីថ្ងៃចន្ទ ក្រុមប្រឹក្សាសិទ្ធិមនុស្សនៃអង្គការសហប្រជាជាតិ បានចេញសេចក្តីសម្រេចចិត្តរួមមួយ ដោយមិនឆ្លងកាត់ការបោះឆ្នោត ដើម្បីថ្កោលទោសកងទ័ពភូមា អំពីសកម្មភាពរំលោភបំពានសិទ្ធិមនុស្សធ្ងន់ធ្ងរ ធ្វើទៅលើប្រជាជនរ៉ូហ៊ីងយ៉ា និងជនជាតិភាគតិចឯទៀតនៅភូមា។ ក្រុមប្រឹក្សាសិទ្ធិមនុស្ស បានអំពាវនាវ ថាត្រូវតែចាប់ផ្តើម បើកដំណើរការចរចា ដើម្បីបង្រួបបង្រួមជាតិភូមា៕
មតិយោបល់