តាមរយ:Facebook របស់ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ថ្ងៃអង្គារ ទី១០ សីហា ២០២១ នេះ បានដឹកនាំក្រុមការងារ ទៅខេត្តបន្ទាយមានជ័យ និងខេត្តប៉ៃលិន ដើម្បីពិនិត្យការរៀបចំទីតាំងបន្ថែមសម្រាប់ត្រៀមព្យាបាលបងប្អូនប្រជាពលករខ្មែរដែលវិលត្រលប់ពីប្រទេសថៃ ក្នុងករណីមានជំងឺកូវីដ-១៩។

ឯកឧត្តម ហ៊ុន ម៉ាណែត បានលើកឡើង៖ ថាការរៀបចំទីតាំងបន្ថែមទាំងនេះគឺជាការ ត្រៀមលក្ខណ:ជាងមុនក្នុងករណី បងប្អូនប្រជាពលករខ្មែរដែលវិលត្រលប់ពីប្រទេសថៃ មានជំងឺកូវីដ-១៩។

<< រាជរដ្ឋាភិបាលក៏ដូចជាក្រុមការងារសង្ឃឹមថាបងប្អូនប្រជាពលករយើងមានសុខភាពល្អនិងជៀសផុតពីជំងឺកូវីដ-១៩ ទាំងអស់គ្នា>>។

ឯកឧត្តម បានបន្តថា <<ទោះជាយ៉ាងណាក៏ដោយ ការរៀបចំមណ្ឌលព្យាបាលនៅតាមព្រំដែននេះ គឺជាការត្រៀមលក្ខណ:មួយក្នុងករណីចាំបាច់ដែលបងប្អូនឆ្លងជំងឺកូវីដ-១៩ ដែលអាចឲ្យរាជរដ្ឋាភិបាលមានលទ្ធភាពផ្តល់ទីកន្លែងជូនបងប្អូនស្នាក់នៅនិងទទួលការព្យាបាលបានល្អសមរម្យ និងទាន់ពេលវេលា ដើម្បីបានជាសះស្បើយមុននិងបងប្អូនវិលត្រលប់ទៅស្រុកកំណើតខ្លួនវិញ។>>

សូមជម្រាបជូនថា ក្រោយរកឃើញ មេរោគកូវីដ-១៩បម្លែងខ្លួន(Delta) លើពលករចំណាកស្រុកមកពីប្រទេសថៃ រាជរដ្ឋាភិបាលបានចេញនូវវិធានការជាបន្តបន្ទាប់ដើម្បីទប់ស្កាត់មិនឱ្យមេរោគនេះចម្លងចូលទៅក្នុងសហគមន៍៕