ប្រទេសធំៗប្រឹងប្រែងដឹកជម្លៀសប្រជាជនរបស់ខ្លួនចាក់ចេញពីអាហ្វហ្កានីស្ថាន មានជនជាតិអាមេរិក បារាំង អង់គ្លេស អាល្លឺម៉ង់ ហូឡង់ អេស្ប៉ាញ ប៊ែលស៊ិក ដាណឺម៉ាក់ កាណាដា ជាដើម។ល។ តាំងពីល្ងាចថ្ងៃអាទិត្យ ពលរដ្ឋអាហ្វាហ្កានីស្ថាន នៅក្រុងកាប៊ូល ជាច្រើន រាប់ពាន់នាក់ ភិតភ័យតក្កមា ស្លន់ស្លោ ខំប្រឹងស្រវ៉ាស្រទិញ ឡើងជញ្ជាំងថ្ម រំលងបន្លាលួស តោងចង់ឡើងយន្តហោះចាកចេញពីប្រទេសនឹងគេដែរ។ ក្រុងកាប៊ូល មានពលរដ្ឋប្រមាណ៧លាននាក់ គឺច្បាស់ជាមិនអាចឡើងយន្តហោះបានគ្រប់គ្នាឡើយ។
នៅជុំវិញបរិវេណអាកាសយានដ្ឋានក្រុងកាបូល គឺត្រូវធានាសុវត្ថិភាពដោយកងទ័ពអាមេរិក ប្រមាណ ៦ ពាន់នាក់។ អ្នកទទួលខុសត្រូវអាមេរិក ឲ្យដឹងថា ទាហានអាមេរិកបានបាញ់កាំភ្លើងឡើង ដើម្បីកំញើញ កុំឲ្យមនុស្សសម្រុកចូលព្រលានយន្ត ឬកុំឲ្យដណ្តើមប្រជែងគ្នាឡើងយន្តហោះ។ អាមេរិក ត្រូវជម្លៀសមន្ត្រីទូត ពលរដ្ឋរបស់ខ្លួន និងជនជាតិអាហ្វហ្កានីស្ថានដែលធ្វើការបម្រើអាមេរិក សរុប ៣ម៉ឺននាក់។
ប្រទេសបារាំងវិញ រដ្ឋមន្ត្រីការពារជាតិបារាំង អ្នកស្រី Florence Parly ថានឹងជម្លៀសប្រជាពលរដ្ឋបារាំងនៅល្ងាចថ្ងៃច័ន្ទ ឆ្ពោះទៅ Abu Dhabi រដ្ឋធានីរបស់ អេម៊ីរ៉ាត់ អារ៉ាប់រួម។
តុល្យការបឋម នៅក្នុងសភាពពពាក់ពពូន ដណ្តើមគ្នាឡើងយន្តហោះនេះ គឺមានស្លាប់មនុស្ស យ៉ាងហោច ៥ នាក់ នៅព្រលានយន្តហោះក្រុងកាប៊ូល។ នេះបើតាមសាក្សីនៅក្នុងហេតុការណ៍ ដែលបានថ្លែងប្រាប់ភ្នាក់ងារសារព័ត៌មាន Reuters។ គេមិនទាន់ដឹងថា សាកសពទាំង៥នាក់នេះ ស្លាប់ដោយត្រូវគ្រាប់កាំភ្លើង ឬយ៉ាងណាទេ។
ភ្នាក់ងារខាងអាកាសចរណ៍ស៊ីវិលអាហ្វហ្កានីស្ថាន ប្រកាសថា ផ្លូវហោះហើរត្រូវបិទចំពោះយន្តហោះស៊ីវិល វៀរលែងតែយន្តហោះយោធា។ យន្តហោះស៊ីវិល Air France ដែលហោះទៅឆ្ពោះអាស៊ី គឺបានជៀសវាង មិនហោះហើរឆ្លងកាត់លើដែនអាកាសអាហ្វហ្កានីស្ថាន។ យន្តហោះពាណិជ្ជកម្ម ដឹកនាំអ្នកដំណើរ និងយន្តហោះស៊ីវិលរបស់ក្រុមហ៊ុនអឺរ៉ុបជាច្រើនក្រុមហ៊ុន សម្រេចផ្អាក មិនធ្វើដំណើរទៅ អាហ្វហ្កានីស្ថាន រហូតដល់ទាល់តែមានការសម្រេចជាថ្មី។
មតិយោបល់