(វែលីងតោន)៖ នាយករដ្ឋមន្រ្តីនូវែលសេឡង់ លោកស្រី Jacinda Ardern នៅថ្ងៃអង្គារនេះ បានប្រកាសពីការអនុវត្តវិធានការបិទខ្ទប់ នៅទូទាំងប្រទេស បន្ទាប់ពី មានសេចក្ដីរាយការណ៍ពីការរកឃើញករណីឆ្លង COVID-19 ចំនួន១ករណីថ្មី តែប៉ុណ្ណោះក្នុងទីក្រុង Auckland ដែលជាទីក្រុងមានមនុស្សរស់នៅច្រើនបំផុត របស់នូវែលសេឡង់។
បើតាមលោកស្រី Jacinda Ardern វិធានការបិទខ្ទប់នឹងត្រូវអនុវត្ត នៅទីក្រុង Auckland រយៈពេល៧ថ្ងៃ ខណៈនៅតំបន់ផ្សេងទៀត គឺមានរយៈពេល៣ថ្ងៃ។ លោកស្រី បន្ថែមថាអាជ្ញាធរកំពុងសន្មត់ថា ករណីឆ្លងថ្មីនោះ គឺជាករណីវីរុសបំប្លែងថ្មី Delta ដែលមានសមត្ថភាពឆ្លងរាលដាលយ៉ាងឆាប់រហ័ស ប៉ុន្តែវាមិនទាន់ត្រូវបានកំណត់ច្បាស់នៅឡើយទេ។
ករណីឆ្លងថ្មី ១ករណីខាងលើនេះ គឺជាករណីឆ្លងក្នុងសហគមន៍ ដែលត្រូវបានរកឃើញជាលើកដំបូងឡើងវិញ នៅនូវែលសេឡង់ ក្នុងរយៈពេល៦ខែមកនេះ៕
ប្រភព៖ Reuters
មតិយោបល់