៦ ថ្ងៃ តាំងពីក្រុមតាលីបង់ត្រលប់ទៅក្តោបក្តាប់អំណាចវិញសាជាថ្មី ភាពជ្រួលច្របល់នៅតែបន្តកើតមានយ៉ាងខ្លាំងដដែលក្នុងប្រទេសអាហ្វហា្កនីស្ថាន។ នាខណ:ពេលនេះ ថ្នាក់ដឹកនាំកំពូលតាលីបង់កំពុងតែគិតគូរនិងពិភាក្សាជាមួយភាគីជាច្រើន ដើម្បីបង្កើតរដ្ឋាភិបាលចម្រុះ។ ចំណែកសហរដ្ឋអាមេរិកឯណោះវិញ កំពុងបន្តប្រតិបត្តិការជម្លៀសពលរដ្ឋអាមេរិកាំង និងសម្ព័ន្ធមិត្តអាហ្វហ្កានីស្ថានដែលធ្លាប់បម្រើការងារឲ្យខ្លួនយ៉ាងសស្រាក់សស្រាំជាទីបំផុត។
ស្របពេលដែលប្រតិបត្តិការជម្លៀសកំពុងបន្តធ្វើ ប្រធានាធិបតីអាមេរិកលោក ចូ បៃដិន បានមុខថ្លែងជាថ្មីពីស្ថានការណ៍ក្នុងប្រទេសអាហ្វហ្កានីស្ថាន កាលពីថ្ងៃសុក្រម្សិលមិញនេះ។ នៅក្នុងអន្តរាគមន៍ជាលើកទី២ ក្រោយក្រុងកាប៊ុលធ្លាក់ក្នុងដៃពួកតាលីបង់ លោកបៃដិន បានគូសបញ្ជាក់ឲ្យដឹងថា សហរដ្ឋអាមេរិកជម្លៀសមនុស្សបានចំនួនប្រមាណ ១ម៉ឺន ៣ ពាន់នាក់ហើយ។
ថ្លែងចេញពីសេតវិមាន លោកបៃដិន ថា ការជម្លៀសមនុស្សចេញពីអាហ្វហ្កានីស្ថាន គឺជាប្រតិបត្តិការដ៏ធំ និងជាប្រតិបត្តិការដ៏ពិបាកមួយក្នុងប្រវត្តសាស្ត្រ។ ក៏ប៉ុន្តែលោកថា ការជម្លៀសពលរដ្ឋអាមេរិកដែលជាអាទិភាពចម្បងគេរបស់ក្រុងវ៉ាស៊ីនតាន មិនត្រូវបានរារាំងដោយក្រុមតាលីបង់ឡើយ។
“ជនជាតិអាមេរិកណាម្នាក់ដែលចង់ត្រលប់មកស្រុកកំណើតវិញ យើងនឹងនាំអ្នកមកផ្ទះវិញ”។ នេះជាការលើកឡើងរបស់ម្ចាស់សេតវិមានអាមេរិក។
មតិយោបល់