កំពូលកីឡាករប្រដាល់ហ្វីលីពីន Manny Pacquiao បានចាប់ផ្តើមគិតពីរឿងចូលនិវត្តន៍ហើយក្រោយចាញ់កីឡាករគុយបា Yordenis Ugas កាលពីថ្ងៃអាទិត្យ។ ការប្រកួតកាលពីថ្ងៃអាទិត្យម្សិលមិញជាប្រកួតដំបូងប៉ុណ្ណោះសំរាប់ Pacquiao ក្នុងរយៈពេល ២ឆ្នាំបន្ទាប់ពីប្រកួតចុងក្រោយបំផុតយកឈ្នះ Keith Thurman ដណ្តើមខ្សែក្រវាត់ WBA កាលពីខែកក្កដា ឆ្នាំ២០១៩។
ក្រោយចប់ការប្រកួត Pacquiao បាននិយាយថា អនាគតទៅមុខអ្នកប្រហែលជាលែងឃើញ Pacquiao ប្រកួតនៅលើសង្វៀនទៀតហើយ។ កីឡាករវ័យ ៤២ឆ្នាំរូបនេះក៏បាននិយាយប្រាប់សារព័ត៌មាន ESPN ដែរថា រូបគេកំពុងគិតពីរឿងចូលនិវត្តន៍។ ក្រោយចាញ់ Ugas, Pacquiao នៅពេលនេះមានស្ថិតិប្រកួត ៧២ប្រកួត ឈ្នះ ៦២ ចាញ់ ៨ ស្មើ ២ ចំណែក Yordenis Ugas ជ័យជំនះលើ Pacquiao គឺជាជ័យជំនះទី២៧ របស់ខ្លួនក្នុងចំណោម ៣១ប្រកួតចាញ់ ៤។
ត្រឹមជាកីឡាករជំនួសប៉ុណ្ណោះ Ugas បានធ្វើឱ្យពិភពលោកភ្ញាក់ផ្អើលក្រោយយកឈ្នះ Manny Pacquiao ដោយពិន្ទុក្រោយប្រកួត ១២ទឹកដ៏ស្វិតស្វាញ។ Yordenis Ugas គឺជាកីឡាករជំនួស Errol Spence ដែលមិនអាចប្រកួតបានដោយសាររបួសភ្នែក ខណៈដែល Ugas មានពេលហ្វឹកហាត់ត្រៀមត្រឹម ២សប្តាហ៍ប៉ុណ្ណោះ៕
ប្រភព៖ BTV
មតិយោបល់