ស្ថានការណ៍នៅក្នុងប្រទេសអាហ្វហ្កានីស្ថានកំពុងបន្តក្លាយជាបច្ចុប្បន្នភាពយ៉ាងក្តៅគគុក។ អ្នកនំាពាក្យតាលីបង់បានប្រកាសលើទំព័រ Twitter នាថ្ងៃសុក្រ ទី២៧ សីហាថា គណៈប្រតិភូបារាំងបានជួបក្រុមអ្នកតំណាងតាលីបង់នៅក្នុងទីក្រុងដូហា ប្រទេសកាតាក្នុងថ្ងៃព្រហស្បតិ៍ ទី២៦ សីហា។
នេះជាជំនួបលើកទី១ រវាងភាគីបារាំង និងតាលីបង់តាំងពីចលនាមួយនេះដណ្តើមបានអំណាចកាលពីជិត ២សប្តាហ៍មុន។ ចំណែកប្រទេសតួកគីក៏បានប្រកាសពីការជជែកជាមួយពួកតាលីបង់លើកទី១ ដែរ តែនៅក្រុងកាប៊ុល។ ដំណឹងនេះបានធ្លាក់មក ក្រោយពីមានអំពើភេរវកម្មអត្តឃាតបង្កដោយពួកជីហាតអង្គការរដ្ឋអ៊ីស្លាមនៅអាកាសយានដ្ឋានក្រុងកាប៊ុលដែលបានផ្តាច់ជីវិតមនុស្ស ៨៥នាក់ និងរបួសជាង ១៦០នាក់។ អ្នកជំនាញជនជាតិបារាំងនៅសកលវិទ្យាល័យក្នុងខេត្តលីយ៉ុងលោកស៊ីម៉ុង គ្រីវេបានយល់ឃើញថា អ្វីដែលច្បាស់ចាប់ពីពេលនេះតទៅ អាមេរិក និងក្រុមប្រទេសបស្ចិមលោកដទៃទៀតនឹងត្រូវសហការជាមួយពួកតាលីបង់។
«អាមេរិកកំពុងស្ថិតនៅក្នុងស្ថានការណ៍ពិសេសមួយ ព្រោះពួកតាលីបង់បានក្លាយជាចៅហ្វាយថ្មីរបស់ប្រទេសអាហ្វហ្កានីស្ថាន។ គឺសុទ្ធសឹងជាពួកដែលអ្នកខ្លះធ្លាប់ធ្វើជាអ្នកតស៊ូ និងអ្នកខ្លះទៀតធ្លាប់ជាភេរវជន ហើយឥឡូវពួកគេបានចូលក្តោបក្តាប់អំណាច។ ដល់អ៊ីចឹងទៅ អាមេរិកក៏ដូចជាបណ្តាប្រទេសផ្សេងទៀតនឹងត្រូវរួមសហការ ឬមួយក៏ត្រូវមានកិច្ចសន្ទនាជាមួយពួកគេ។ វាពិតជារឿងមួយពិបាកខ្លាំងណាស់។
បន្ទាប់មក ទាក់ទងនឹងរឿងការតាមកំចាត់ជនដៃដល់ដែលទទួលខុសត្រូវនៅក្នុងអំពើភេរវកម្មវិញ រឿងនេះក៏ពិបាកដែរ ព្រោះវាគំនិតនៃរូបភាពសង្រ្គាមថ្មីប្រយុទ្ធប្រឆាំងនឹងភេរវនិយម និងអំពើគួរឲ្យភ័យខ្លាចដែលបានចាប់ផ្តើមតាំងពីឆ្នាំ ២០០១ ពោលក្រោយព្រឹត្តិការណ៍មហាភេរវកម្មថ្ងៃ១១ កញ្ញា ២០០១ នៅអាមេរិក។
ប្រធានាធិបតីអាមេរិកគ្រប់រូបតាំងពីលោក George W Bushពួកគេព្យាយាមតាមកំចាត់ពួកភេរវជន និងក្រុមជនសង្ស័យ ពិសេសពួកដែលចង់វាយប្រហារ និងចង់បំផ្លាញផលប្រយោជន៍អាមេរិក។ ជាទូទៅនៅក្នុងសង្រ្គាមថ្មីប្រយុទ្ធប្រឆាំងនឹងភេរវនិយមនេះ អាមេរិកបានប្រើដ្រូនបាញ់លើផ្ទាំងស៊ីបរបស់ក្រុមភេរវជន។ តែពេលខ្លះ ការវាយប្រហារដោយប្រើដ្រូននេះបានបណ្តាលឲ្យមានជនរងគ្រោះជាច្រើនដែលភាគច្រើនជាជនស៊ីវិលស្លូតត្រង់។
ដូច្នេះ ការដកខ្លួនចេញរបស់អាមេរិកនៅប៉ុន្មានថ្ងៃខាងមុខបង្កហានិភ័យឲ្យមានសង្រ្គាមមួយនេះឡើងវិញ។ តែជាសង្គ្រាមមួយដែលមិនងាយនឹងចប់ទេ»៕
មតិយោបល់