ថ្ងៃទី៣កញ្ញា លោក យ៉ូស្ហ៊ីហ៊ីដេ ស៊ូហ្កា បានប្រកាសប្រាប់អ្នកកាសែតថា លោកចង់ទុកកម្លាំងថាមពល និងពេលវេលា ដើម្បីដោះស្រាយបញ្ហាវិបត្តិជំងឺឆ្លងកូវីដ១៩ ដែលកំពុងអង្រួនប្រទេសជប៉ុននាពេលបច្ចុប្បន្ននេះ។ ដូច្នេះលោកនឹងមិនឈរឈ្មោះ ក្នុងការបោះឆ្នោត ជ្រើសរើសប្រធានគណបក្សសេរីប្រជាធិបតេយ្យ (PLD) នៅថ្ងៃទី២៩កញ្ញាខាងមុខនេះ។
លោកបញ្ជាក់ថា កិច្ចការដឹកនាំគណបក្ស គឺតម្រូវឲ្យចំណាយពេលវេលា នឹងថាមពលច្រើនណាស់ ដែលធ្វើឲ្យលោកត្រូវតែបង្ខំចិត្ត សម្រេចបោះបង់ចោល ដើម្បីផ្តុំកម្លាំងនិងពេលវេលា គិតគូរពីបញ្ហាកូវីដវិញ។ លោកនាយករដ្ឋមន្ត្រីជប៉ុន លើកឡើងថា នៅសប្តាហ៍ក្រោយ លោកនឹងធ្វើសន្និសីទកាសែតមួយទៀត ទាក់ទិននឹងបញ្ហានេះ។
គួរបញ្ជាក់ថា យោងតាមការស្ទាបស្ទង់មតិ ក្នុងការបោះឆ្នោតផ្ទៃក្នុងបក្ស គឺលោក លោក យ៉ូស្ហ៊ីហ៊ីដេ ស៊ូហ្កា ពិតជាមានសង្ឃឹមថាអាចជាប់ជាប្រធានបក្សម្តងទៀត។ ការដែលលោកបានសម្រេចចិត្តមិនឈរឈ្មោះនេះ មានន័យថា លោកបានសម្រេចចិត្តបោះបង់បេក្ខភាពលោក ក្នុងនាមជានាយករដ្ឋមន្ត្រីមួយអាណត្តិទៀត។
ក្នុងវ័យ ៧២ឆ្នាំ លោក លោក យ៉ូស្ហ៊ីហ៊ីដេ ស៊ូហ្កា បានចូលមកកាន់តំណែង បន្តពីលោក ស៊ីនហ្សូ អាបេ នៅខែកញ្ញាឆ្នាំ២០២០ បន្ទាប់ពីលោក ស៊ីនហ្សូ អាបេ បានលាចេញពីតំណែង ដោយសារបញ្ហាសុខភាព។ មានការគាំត្រខ្លាំងពេលដំបូង ពីសំណាក់ប្រជាជនជប៉ុន ប្រជាប្រិយភាពរបស់លោក យ៉ូស្ហ៊ីហ៊ីដេ ស៊ូហ្កា បានធ្លាក់ចុះខ្លាំង ប្រមាណ១ឆ្នាំមកនេះ ដោយសារតែបញ្ហាជំងឺឆ្លងកូវីដ១៩។
យោងតាមការស្ទាបស្ទង់មតិចុងក្រោយ រដ្ឋាភិបាលរបស់លោកបានទទួលការពេញចិត្តពីសំណាក់ប្រជាជនជប៉ុន មិនដល់៣០%ផងទេ។ ប្រជាជនជប៉ុនភាគច្រើន បានរិះគន់រដ្ឋាភិបាលរបស់លោក ដែលមាន:ចង់រៀបចំកម្មវិធីប្រកួតកីឡាអូឡាំពិក នៅទីក្រុងតូក្យូ ខណ:ដែលវិបត្តិជំងឺឆ្លងកូវីដ១៩ មានស្ថានភាពធ្ងន់ធ្ងរ។ ជាងនេះទៀត យុទ្ធនាការចាក់វ៉ាក់សាំងបង្ការនៅជប៉ុន បានដំណើរការទៅយ៉ាងយឺតយ៉ាវបំផុត។
គួរបញ្ជាក់ថា អ្នកដែលនឹងឡើងមកធ្វើជាប្រធានគណបក្ស សេរីប្រជាធិបតេយ្យ ក្រោយការបោះឆ្នោតថ្ងៃទៅ២៩កញ្ញាខាងមុខនេះ គឺនឹងអាចឡើងជានាយករដ្ឋមន្ត្រីជប៉ុន ដោយសារតែគណបក្សនេះ មានសម្លេងភាគច្រើននៅក្នុងសភាស្រេចទៅហើយ៕
មតិយោបល់