(ហ្សឺណែវ)៖ ទីក្រុងប៉េកាំងនឹងបរិច្ចាគវ៉ាក់សាំងបង្ការ COVID-19 ក្នុងកញ្ចប់ដំបូងចំនួន «៣លានដូស» ទៅដល់ប្រទេសអាហ្វហ្កានីស្ថាន ខណៈជំនួយចាំបាច់ផ្សេងៗទៀត ក៏នឹងត្រូវផ្តល់ជូនផងដែរក្នុងពេលបន្តបន្ទាប់។

ការសន្យាផ្ដល់ជំនួយបន្ថែមខាងលើធ្វើឡើងដោយប្រធានបេសកកម្មការទូតចិនប្រចាំទីភ្នាក់ស្នាក់ការអង្គការសហប្រជាជាតិ (UN) ក្នុងទីក្រុងហ្សឺណែវ លោក Chen Xu។
ចិន នឹងផ្តល់ជូនជាចាំបាច់ទៅកាន់ប្រទេសអាហ្វហ្កានីស្ថាន នោះមានដូចជា ចំណីអាហារ, សម្ភារៈប្រើប្រាស់ក្នុងរដូវរងា, វ៉ាក់សាំងបង្ការ COVID-19 និងថ្នាំពេទ្យជាដើម ដែលសរុបជាទឹកប្រាក់ចំនួន ២០០លានយ័ន ឬស្មើនឹងជាង ៣០លានដុល្លារអាមេរិក។

បើតាមលោក Chen Xu ចិនតែងតែគោរពអធិបតេយ្យភាព, ឯករាជភាព និងបូរណភាពទឹកដី នៃប្រទេសអាហ្វហ្កានីស្ថាន ក្នុងនាមជាមិត្តជិតខាងដ៏ស្និទ្ធស្នាល ដោយចិនមិនដែលលូកលាន់ កិច្ចការផ្ទៃក្នុងប្រទេសដទៃនោះឡើយ ហើយចិនតែងតែអនុវត្តគោលនយោបាយ ប្រកបដោយលក្ខណៈមិត្តភាព ជាមួយប្រជាជនអាហ្វហ្កានីស្ថានទាំងអស់៕

ប្រភព៖​​​​​​ CGTN