ចិនតែងចាត់ទុកតៃវ៉ាន់ ជាចំណែកមួយនៃដែនដីរបស់ខ្លួន និងបានទាំងប្តេជ្ញាដណ្តើមគ្រប់គ្រងដែនកោះមួយដុំនេះវិញ ដោយប្រើកម្លាំងយោធាផង បើចាំបាច់។ ហើយគិតចាប់តាំងពីសម័យម៉ៅសេទុងមក លោក ស៊ី ជីនពីង ជាប្រធានាធិបតីដែលនិយមសង្គ្រាមបំផុត ក្នុងសំណុំរឿងតៃវ៉ាន់។ លោក ស៊ីជីនពីង យល់ថាការវាយយកដែនកោះតៃវ៉ាន់ មិនអាចគេចវៀងបានទេ។
នៅក្នុងលិខិតអបអរជោគជ័យរបស់លោក អេរិច ជូ ជាប្រធានគណបក្សគួមីងតាង បក្សគាំទ្រនយោបាយខិតរកប៉េកាំង លោក ស៊ីជីនពីង បានគូសបញ្ជាក់ថា គណបក្សកុម្មុយនិស្តចិន និងគណបក្សគួមីងតាង ធ្លាប់បានព្រមព្រៀងគ្នា កាលពីឆ្នាំ១៩៩២ ប្រឆាំងនឹងការទាមទារឯករាជ្យតៃវ៉ាន់ ដើម្បីបង្កើតឱ្យមានទំនាក់ទំនងសន្តិភាពនៅតំបន់ច្រកសមុទ្ទដែលញែកចិននិងតៃវ៉ាន់។ ប៉ុន្តែពេលនេះ ស្ថានភាពនៅតំបន់ច្រកសមុទ្ទតៃវ៉ាន់ ស្មុគស្មាញនិងអាប់អួរខ្លាំង។ ដូច្នេះគណបក្សទាំងពីរ ត្រូវប្រឹងធ្វើការរួមគ្នាដើម្បី សន្តិភាពនិងការបង្រួបបង្រួមប្រទេស។ នេះបើតាមសំណេររបស់លោក ស៊ី ជីនពីង ដែលគណបក្សគួមីងតាងបានយកចុះផ្សាយ។
ជាចម្លើយតប លោក អេរិច ជូ ប្រមុខដឹកនាំថ្មីគណបក្សគួមីងតាង បានអះអាងថា គណបក្សកុម្មុយនិស្តចិន និងគួមីងតាង ត្រូវស្វែងរកមូលដ្ឋានគ្រឹះរួមគ្នាមួយ និងគោរពភាពខុសគ្នាទៅទិញទៅមកដើម្បីជំរុញសន្តិភាពនិងស្ថិរភាពតំបន់ដៃសមុទ្ទតៃវ៉ាន់។
សូមបញ្ជាក់ថា កាលពីឆ្នាំ១៩៩២ គណបក្សគួមីងតាង ដែលបច្ចុប្បន្នជាគណបក្សប្រឆាំងដ៏ចម្បងនៅតៃវ៉ាន់ បានចុះហត្ថលេខាលើកិច្ចព្រមព្រៀងមួយ ហៅថា “Concensusឆ្នាំ១៩៩២” ទទួលស្គាល់ថាដែនដីចិននិងតៃវ៉ាន់ ទាំងពីរដុំជារបស់ប្រទេសតែមួយ។ ប៉ុន្តែកិច្ចព្រមព្រៀងមិនបានបញ្ជាក់ទេថា ប្រទេសតែមួយដែលជាតំណាងស្របច្បាប់នោះជាចិន ឬជាតៃវ៉ាន់ទេ។ ក្រោយមក នៅរវាងពីឆ្នាំ ២០០៨ ដល់ឆ្នាំ២០១៦ ទំនាក់ទំនងចិននិងតៃវ៉ាន់ បានប្រសើរឡើងខ្លាំង ដោយកាលណោះ លោក ម៉ា យីនចូវ នៃគណបក្សគួមីងតាង បានឈ្នះឆ្នោតក្លាយជាប្រធានាធិបតីតៃវ៉ាន់។ ប៉ុន្តែចាប់ពីឆ្នាំ២០១៦មក ក្រោមអាណត្តិរបស់លោកស្រីប្រធានាធិបតី សៃ អ៊ីងវេន ដែលចាត់ទុកតៃវ៉ាន់ជាដែនអធិបតេយ្យមួយមក ទំនាក់ទំនងជាមួយប៉េកាំង បានធ្លាក់ចុះជាលំដាប់។ ចិនបានបង្កើនគំនាបសេដ្ឋកិច្ច យោធា និងការទូតកាន់តែខ្លាំង លើតៃវ៉ាន់៕
មតិយោបល់