ជាមួយនឹងការឆ្លងរាលដាល ជំងឺកូវីដ១៩ ដែលពិភពលោកយើង កំពុងឆ្លងកាត់នាពេលបច្ចុប្បន្ននេះ នៅលើបណ្តាញសង្គមYoutube មានវីដេអូជាច្រើន បានលើកឡើងអះអាងដោយគ្មានប្រភពជាក់លាក់ អំពីគ្រោះថ្នាក់នៃវ៉ាក់សាំងបង្ការកូវីដ១៩។ វីដេអូខ្លះ អះអាងថា វ៉ាក់សាំងទាំងនោះ អាចបង្កគ្រោះថ្នាក់ ដូចជាជំងឺប្រចាំកាយ រឺអះអាងថា វ៉ាក់សាំងទាំងនោះ មិនអាចការពារមិនឲ្យឆ្លងជំងឺកូវីដបាន។ ហើយវីដេអូខ្លះទៀត បានផ្សព្វផ្សាយទិន្នន័យតួលេខ ដែលខុសពីការពិត ជាដើម។
បណ្តាញYoutube បានអះអាងថា ចាប់ពីពេលនេះទៅ គេនឹងលុបចោលវីដេអូទាំងអស់ ដែលនិយាយប្រឌិត បោកប្រាស់ ទាក់ទិននឹងគ្រោះថ្នាក់របស់វ៉ាក់សាំងគ្រប់មុខ មិនថាវ៉ាក់សាំងបង្ការកូវីដ វ៉ាក់សាំងបង្ការជំងឺកញ្ជ្រឹល វ៉ាក់សាំងបង្ការជំងឺថ្លើមប្រភេទB ជាដើម។ វីដេអូទាំងនោះ គឺរាប់បញ្ចូលទាំងវីដេអូ ដែលអះអាងថា វ៉ាក់សាំងអាចបង្កឲ្យមានជំងឺខ្សោយបញ្ញា ឬអូទីហ្សឹម បង្កជំងឺមហារីក ធ្វើឲ្យបាត់បង់សមត្ថភាពបង្កកំណើត ឬក៏ថានៅក្នុងវ៉ាក់សាំង មានសារធាតុម៉ាញ៉េទិក ដែលអាចធ្វើឲ្យគេ អាចតាមដានស្គាល់ទីតាំង របស់មនុស្សនោះ គ្រប់ទីកន្លែងជាដើម។
តែយ៉ាងណា Youtube នឹងនៅតែអនុញ្ញាត ឲ្យមានវីដេអូ ដែលលើកឡើង ពីគោលនយោបាយចាក់វ៉ាក់សាំង ការសាកល្បងវ៉ាក់សាំងថ្មីៗ ព្រមទាំងជោគជ័យ ឬក៏បរាជ័យនៃការស្រាវជ្រាវរកវ៉ាក់សាំងកន្លងមក និងវីដេអូស្តីពីបទពិសោធន៍ផ្ទាល់ខ្លួន របស់មនុស្សម្នាក់ៗ ទាក់ទិននឹងវ៉ាក់សាំង ដោយគោរពទៅតាមបទបញ្ញាទូទៅ របស់បណ្តាញសង្គមនេះ។
គួររំលឹកថា ប្រមាណ១ឆ្នាំមកហើយ ដែលក្រុមហ៊ុនYoutube បានចាប់ផ្តើមអនុវត្តវិធានការ ប្រយុទ្ធប្រឆាំងនឹងវីដេអូដែលផ្សព្វផ្សាយព័ត៌មានក្លែងក្លាយ ស្តីពីគ្រោះថ្នាក់បង្កឡើងដោយវ៉ាក់សាំងបង្ការកូវីដ១៩។ មានវីដេអូ ចំនួនជាង១៣ម៉ឺនវីដេអូ ដែលត្រូវបានYoutubeលុបចោល ឬរាំងខ្ទប់មិនឲ្យគេអាចមើលបាន។ ហើយចុងក្រោយនេះ គឺនៅថ្ងៃទី២៩កញ្ញា Youtubeបានសម្រេចព្យូរគណនីYoutubeរបស់ បណ្តាញទូរទស្សន៍រុស្ស៊ី RT ផ្សាយជាភាសាអាល្លឺម៉ង់ បន្ទាប់ពីគណនីនេះ បានផ្សព្វផ្សាយវីដេអូ ព័ត៌មានក្លែងក្លាយស្តីពីជំងឺកូវីដ១៩។ រដ្ឋាភិបាលរុស្ស៊ីបានគំរាមYoutube ថាគេអាចចាត់វិធានការសងសឹកYoutubeវិញ។
ក្រៅពីYoutube ហ្វេសបុកក៏បានចេញវិធានការដែរ កាលពីពាក់កណ្តាលខែកញ្ញានេះ ដើម្បីទប់ស្កាត់ ក្រុមអ្នកប្រើប្រាស់ ដែលជឿលើគំនិត ទ្រឹស្តីបោកប្រាស់ រវើរវាយ គ្មានប្រភពច្បាស់លាស់ និងហិង្សា។ ជាក់ស្តែង ក្រុមមួយនៅអាល្លឺម៉ង់ ឈ្មោះ Querdenken ដែលបានប្រកូកប្រកាសថា វិធានការរិតបន្តឹង ដោយសារកូវីដ១៩ គឺជាអំពើជិះជាន់សិទ្ធិសេរីភាព ដែលការពារដោយរដ្ឋធម្មនុញ្ញ។ ដូចគ្នាដែរ បណ្តាញ បណ្តាញTwitter បានរក្សាសិទ្ធិលប់ចោល នូវសារណា ដែលមានខ្លឹមសារផ្ទុយពីការពិត ហើយអាចបិទគណនីមនុស្សដែលសរសេរវាទៀតផង៕
មតិយោបល់