(Reuters) - កាលពីថ្ងៃពុធ ប្រធានាធិបតីម៉ិកស៊ិកបានសាទរចំពោះការសម្រេចចិត្តរបស់សហរដ្ឋអាមេរិកក្នុងការបើកព្រំដែនរួមគ្នារបស់ពួកគេនៅខែវិច្ឆិកាខាងមុខនេះ បន្ទាប់ពីមានការរឹតត្បិតនៃជំងឺរាតត្បាតជាង ១៨ខែកន្លងមកនេះ ទោះបីប្រជាជនម៉ិកស៊ិករាប់លាននាក់ចាក់វ៉ាក់សាំងចិន និងរុស្ស៊ីក៏ដោយ ក៏ប្រទេសនេះប្រឈមមុខនឹងការបិទព្រំដែន។
ព្រំដែនគោកដែលមមាញឹកបំផុតនៅលើពិភពលោក ដែលមានមនុស្សប្រមាណមួយលាននាក់បានឆ្លងកាត់ជារៀងរាល់ថ្ងៃមុនពេលជំងឺកូរ៉ូណារាតត្បាតផ្ទុះឡើង ដោយត្រូវបានបិទការធ្វើដំណើរដែលមិនមានការចាំបាច់ចាប់តាំងពីខែមីនា ឆ្នាំ២០២០។
ប្រធានាធិបតីលោក Andres Manuel Lopez Obrador បានប្រាប់សន្និសីទសារព័ត៌មានប្រចាំថ្ងៃនាពេលព្រឹករបស់លោកថា “ការបើកព្រំដែនភាគខាងជើងបានសម្រេចហើយ យើងនឹងមានភាពប្រក្រតីឡើងវិញ”។
រដ្ឋមន្ត្រីការបរទេសលោក Marcelo Ebrard បានបន្ថែមថា សហរដ្ឋអាមេរិកនឹងកំណត់កាលបរិច្ឆេទពិតប្រាកដនៃការបើកព្រំដែន ប៉ុន្តែវានឹងកើតឡើងនៅដើមខែវិច្ឆិកាខាងមុខនេះ។
ដោយសហរដ្ឋអាមេរិកមានគម្រោងអនុញ្ញាតឱ្យចូលតែភ្ញៀវទេសចរណា ដែលបានចាក់ថ្នាំវ៉ាក់សាំងការពារដោយអង្គការសុខភាពពិភពលោក (WHO) ទទួលស្គាល់ជាផ្លូវការប៉ុណ្ណោះ ខណ:ដែលលោក Lopez Obrador បានទទូចឱ្យអង្គការសុខភាពពិភពលោកអនុម័តវ៉ាក់សាំងកូវីដ-១៩ ផ្សេងទៀតឲ្យប្រើបាស់ជាសាធារណ:។
លោក Lopez Obrador បាននិយាយថា អង្គការសុខភាពពិភពលោកត្រូវធ្វើសកម្មភាពឱ្យបានត្រឹមត្រូវដោយមិនប្រកាន់និន្នាការនយោបាយ ឬមនោគមវិជ្ជា ដោយប្រកាន់ខ្ជាប់នូវវិទ្យាសាស្ត្រដោយនិយាយសំដៅលើការយឺតយ៉ាវក្នុងការទទួលស្គាលវ៉ាក់សាំងរបស់រុស្ស៊ី និងវ៉ាក់សាំងមួយចំនួនរបស់ចិន ៕
មតិយោបល់