ភ្នំពេញ ៖ សម្តេចអគ្គមហាសេ នាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណា ចក្រកម្ពុជា បានមាន ប្រសាសន៍បញ្ជាក់ថា អត្ថន័យ “ខ្មែរធ្វើបាន” គឺមិនសំដៅសម្រាប់លើកកម្ពស់តួនាទី របស់សម្តេច ក្នុងនាមជានាយករដ្ឋមន្ត្រីទេ គឺសំដៅគ្រប ដណ្ដប់ខ្មែរទាំងអស់ តាំងពីបុរាណកាលមក ដែលខ្មែរអាចកសាងប្រាសាទអង្គរវត្តបាន ខ្មែរអាចដឹកនាំប្រទេសឱ្យមានការរីកចម្រើនបានដល់សព្វថ្ងៃ ។

ក្នុងឱកាសអញ្ជើញទស្សនកិច្ច ចុះពិនិត្យមើលហេដ្ឋារចនា សម្ព័ន្ធផ្លូវថ្នល់ ខេត្តព្រះសីហនុ នា ថ្ងៃទី០១ ខែធ្នូ ឆ្នាំ២០២១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា អ្វី ទៅដែលហៅថា ខ្មែរធ្វើបាន នេះមិនមែនសំដៅទៅរជ្ជកាលឬដំណាក់កាលដែលសម្តេចគ្រប់គ្រងប្រទេសនោះទេ ក៏ប៉ុន្តែសម្តេចចង់គ្របដណ្ដប់ទៅលើដំណើរជាតិរបស់កម្ពុជាតាំងពីដើមរៀងមក ។ សម្តេចតេជោ បានបន្តថា ពាក្យខ្មែរ ធ្វើបាន គឺខ្មែរធ្វើបានជានិច្ច ខ្មែរធ្វើប្រាសាទអង្គរវត្ត ខ្មែរធ្វើប្រាសាទព្រះវិហារ ខ្មែរធ្វើប្រាង្គប្រាសាទ ខ្មែរកសាងទឹកដីនេះ ដូច្នេះនេះគ្រាន់តែជាផ្នែកមួយតូចនៃអ្នកជំនាន់ក្រោយតែប៉ុណ្ណោះ ដែលសម្តេចដាក់នេះ មិនមែនសំដៅលើកកម្ពស់ តួនាទីរបស់សម្តេចឬគណបក្ស ប្រជាជនកម្ពុជាឬរាជរដ្ឋាភិ បាលបច្ចុប្បន្នទេ ប៉ុន្តែចង់គ្របដណ្ដប់ទឹកដីទាំងអស់ ដែលខ្មែរអាចធ្វើបានតាំងពីពេលមុនរហូតមកដល់ពេល នេះ ហើយពេលនេះទៅមុខខ្មែរក៏នៅតែធ្វើ នៅពេលដែលខ្មែរមានឱកាសគឺខ្មែរធ្វើបានទាំងអស់ ។

« អ៊ីចឹងនេះគឺជាចំណុចដែលខ្ញុំចង់បញ្ជាក់ប្រយ័ត្នច្រឡំថា នេះគ្រាន់តែសំដៅផ្នែកមួយនៃក្នុងទីតាំងនេះ ប៉ុន្តែអ្វីដែលសំខាន់គឺគ្រប់គ្រងទូទាំងប្រវត្តិសាស្ត្ររបស់កម្ពុជា ដែលជាមោទនភាពជាតិដូនតារបស់យើងបន្សល់ទុកនូវប្រាង្គប្រាសាទ នៅរបស់ដែលមានតម្លៃច្រើនណាស់ សម្រាប់ប្រទេសជាតិរបស់យើង ដែលយើងគ្រាន់តែជាអ្នកបន្តហើយយើងកសាងប្រទេសនេះដោយមានការ ពុះភ្នំ ដើម្បីធ្វើផ្លូវ អ៊ីចឹងខ្មែរធ្វើបានគឺធ្វើពិតហើយមិនមែនគ្រាន់ តែមួយដំណាក់កាលចុងក្រោ យនេះទេ ប៉ុន្តែគ្របដណ្ដប់ទូ ទាំងដំណាក់កាលនៃព្រះរាជា ណាចក្រកម្ពុជាទាំងអស់ » ៕