រដ្ឋាភិបាលសហរដ្ឋអាមេរិកដែលដឹកនាំដោយលោកប្រធានាធិបតី Joe Biden បានប្រកាសធ្វើពហិការការទូតមិនចូលរួមនៅក្នុងព្រឹត្តិការណ៍កីឡាអូឡាំពិករដូវរងាក្នុងទីក្រុងប៉េកាំង ប្រទេសចិន ដែលនឹងប្រព្រឹត្តទៅចាប់ពីថ្ងៃទី ៤ ដល់ថ្ងៃទី ២០ ខែកុម្ភ: ឆ្នាំ ២០២២ ខាងមុខនេះ។
អ្នកនាំពាក្យសេតវិមានអ្នកស្រី Jen Psaki បានប្រាប់ក្រុមអ្នកសារព័ត៌មានកាលពីថ្ងៃចន្ទម្សិលមិញថា រដ្ឋបាលរបស់លោក Biden «នឹងមិនបញ្ជូនតំណាងការទូត ឬតំណាងផ្លូវការណាមួយ» ទៅចូលរួមនៅក្នុងព្រឹត្តិការណ៍កីឡាអូឡាំពិករដូវរងានេះទេ ដោយសារតែចិននៅបន្តប្រព្រឹត្តិ «អំពើប្រល័យពូជសាសន៍ និងឧក្រិដ្ឋកម្មប្រឆាំងនឹងមនុស្សជាតិក្នុងតំបន់ Xinjiang និងការរំលោភសិទ្ធិមនុស្សផ្សេងៗទៀត»។
ការធ្វើពហិការការទូតនេះមានន័យថា មិនមានមន្ត្រីផ្លូវការអាមេរិកណាម្នាក់នឹងចូលរួមនៅក្នុងព្រឹត្តិការណ៍កីឡាអូឡាំពិកនេះទេ ប៉ុន្តែក្រុមកីឡាករជម្រើសជាតិសហរដ្ឋអាមេរិក នឹងនៅតែទៅចូលរួមប្រកួតនៅក្នុងកីឡានេះដដែល។
អ្នកស្រី Psaki បាននិយាយថា៖ «ក្រុមកីឡាករជម្រើសជាតិអាមេរិក នឹងទទួលបានការគាំទ្រពេញទំហឹងពីរដ្ឋាភិបាលសហរដ្ឋអាមេរិក។ យើងនឹងគាំទ្រលើកទឹកចិត្តពួកគេ ១០០% ពីសហរដ្ឋអាមេរិក»។
មុនពេលសេតវិមានប្រកាសអំពីការធ្វើពហិការការទូតនេះកាលពីថ្ងៃចន្ទ អ្នកនាំពាក្យក្រសួងការបរទេសចិនលោក Zhao Lijian បានចោទប្រកាន់សមាជិកសភាអាមេរិកដែលដាក់សម្ពាធលើលោក Biden ឲ្យធ្វើពហិការការទូតនេះថា ធ្វើឡើងដើម្បី «ទាក់ទាញចំណាប់អារម្មណ៍» តែប៉ុណ្ណោះ។
លោក Lijian បានប្រាប់ក្រុមអ្នកសារព័ត៌មានក្នុងទីក្រុងប៉េកាំងថា ប្រទេសចិននឹងចាត់ «វិធានការតបតវិញ» ប្រសិនបើរដ្ឋាភិបាលក្រុងវ៉ាស៊ីនតោនពិតជាធ្វើដូចនេះមែននោះ៕
មតិយោបល់