(ព្រុចសែល)៖ សហភាពអឺរ៉ុប នៅថ្ងៃច័ន្ទសប្ដាហ៍នេះ បានឯកភាពគ្នាថារាល់ការឈ្លានពានណាមួយរបស់រុស្ស៊ីប្រឆាំងនឹងអ៊ុយក្រែន នឹងជំរុញឱ្យមានការដាក់ទណ្ឌកម្ម សេដ្ឋកិច្ចលើទីក្រុងម៉ូស្គូ។ ការព្រមាននេះគឺស្រដៀងគ្នាទៅនឹងសេចក្ដីថ្លែងការណ៍របស់អង្គការ NATO និងក្រុមបណ្ដាប្រទេស G7 ។

សហភាពអឺរ៉ុប និងសហរដ្ឋអាមេរិក បានដាក់ទណ្ឌកម្មសេដ្ឋកិច្ចលើរុស្ស៊ីតាំងតែពីឆ្នាំ២០១៤មកម្ល៉េះ ដោយមានគោលដៅចម្បងលើវិស័យថាមពល, ធនាគារ និងឧស្សាហកម្មអាវុធ ហើយបច្ចុប្បន្នក៏កំពុងពិចារណាដាក់ទណ្ឌកម្មបន្ថែមផងដែរ នៅក្នុងករណីរុស្ស៊ីប្រើកម្លាំងយោធាវាយប្រហារលើអ៊ុយក្រែន ដែលក្រុមមន្ត្រីចារកម្ម អាមេរិកជឿថាអាចនឹងកើតឡើងនៅដើមឆ្នាំ២០២២ខាងមុខ។

នៅក្នុងសន្និសីទសារព័ត៌មាន ប្រធានគោលនយោបាយការបរទេសអឺរ៉ុប លោក Josep Borrell បានលើកឡើងថា «សហភាពអឺរ៉ុប មានការឯកភាពគ្នាក្នុងការគាំទ្រ អធិបតេយ្យភាព និងបូរណភាពទឹកដីរបស់អ៊ុយក្រែន។ ច្បាស់ណាស់ថាការឈ្លានពានណាមួយលើអ៊ុយក្រែននឹងបង្កជាផលវិបាកនយោបាយ និងការខាតបង់សេដ្ឋកិច្ចយ៉ាងធ្ងន់ធ្ងរសម្រាប់រុស្ស៊ី»៕

ប្រភព៖ AFP