(Reuters) - កាលពីថ្ងៃអង្គារ៍អាជ្ញាធរប្រទេសហៃទីបានស្វែងរកជនរងគ្រោះបន្ទាប់ពីផ្ទុះរថយន្តដឹកប្រេងឥន្ធន:នៅទីក្រុង Cap-Haitien ដែលបានសម្លាប់មនុស្សយ៉ាងហោចណាស់ចំនួន ៦០នាក់ ខណ:ដែលមានរបាយការណ៍ថា អ្នកស្រុកដែលនៅក្បែរនោះបានព្យាយាមដួសយកប្រេងចេញពីរថយន្តមុនពេលផ្ទុះ។
កាលពីថ្ងៃអង្គារ៍ មនុស្សរាប់រយនាក់កំពុងតែស្ថិតនៅកន្លែងកើតហេតុនៃការផ្ទុះកាលពីយប់ថ្ងៃច័ន្ទនៅឡើង ដោយមានរួមទាំងអ្នកជិតខាងដែលមានភាពតក់ស្លុត និងកំពុងតែស្វែងរកមនុស្សជាទីស្រលាញ់ នៅតាមផ្ទះដែលត្រូវបានបំផ្លាញ ហើយក៏មានមនុស្សមួយចំនួនព្យាយាមរុះរើសំណល់ដែកដែលឆេះខ្លោចចេញពីរថយន្តនោះផងដែរ។
លោក Justorme Louis Fils អាយុ ៦៤ឆ្នាំដែលរស់នៅក្បែរកន្លែងកើតហេតុបាននិយាយថា “ខ្ញុំមានការព្រួយបារម្ភយ៉ាងខ្លាំងអំពីចំនួនអ្នកស្លាប់។ ខ្ញុំអាចស្គាល់ផ្ទះមួយចំនួនរបស់អ្នកដែលខ្ញុំស្គាល់ ប៉ុន្តែខ្ញុំមិនអាចកំណត់អត្តសញ្ញាណរបស់ពួកគេក្នុងចំណោមជនរងគ្រោះបានទេ”។
លោកបានបន្ថែមថា រថយន្តដឹកប្រេងឥន្ធន:នោះបានក្រឡាប់ ខណ:ដែលព្យាយាមគេចពីម៉ូតូមួយ។
កាសែត Haitian Le Nouvelliste របស់ប្រទេសហៃទី បានដកស្រង់សម្តីលោក Patrick Almonor ដែលជាគណ:កម្មាធិការក្រុង Cap-Haitien ថា “អ្នកស្រុកកំពុងសម្រុកទៅរករថយន្តដឹកប្រេងឥន្ធន:នោះ នៅពេលដែលវាផ្ទុះ”។
ដោយសារតែការខ្វះខាតប្រេងឥន្ធន:ធ្ងន់ធ្ងរក្នុងប៉ុន្មានខែថ្មីៗនេះ បានធ្វើឲ្យប្រជាជនហៃទីជាច្រើននាក់ មានការព្រួយបារម្មណ៍នឹងការធានាក្នុងការផ្គត់ផ្គង់ប្រេងឥន្ធន: ៕
មតិយោបល់